తిరుపతి స్పేస్ సిటీకి రష్యా భాగస్వామ్యం కోరిన లోకేష్!

ఆంధ్రప్రదేశ్ రాష్ట్రం అంతరిక్ష రంగంలో భారీ పెట్టుబడులను ఆకర్షించేందుకు వ్యూహాత్మక అడుగులు వేస్తోంది. రష్యాలోని మాస్కోలో జరుగుతున్న సెయింట్ పీటర్స్‌బర్గ్ ఇంటర్నేషనల్ ఎకనామిక్ ఫోరమ్‌లో పాల్గొన్న ఆంధ్రప్రదేశ్ ఐటీ శాఖ మంత్రి నారా లోకేష్, రాష్ట్రంలో అంతరిక్ష రంగాన్ని అభివృద్ధి చేయడానికి ఏకంగా 4 బిలియన్ డాలర్ల (సుమారు రూ. 33,000 కోట్లకు పైగా) పెట్టుబడులను ఆకర్షించాలని లక్ష్యంగా పెట్టుకున్నట్లు ప్రకటించారు. ఈ ప్రతిష్టాత్మక లక్ష్యాన్ని చేరుకోవడంలో భాగంగా, రష్యాకు చెందిన ప్రముఖ అంతరిక్ష పరిశోధన, తయారీ సంస్థలను ఆంధ్రప్రదేశ్‌లో భాగస్వాములు కావాలని ఆయన ఆహ్వానించారు.

రాష్ట్రంలో అంతరిక్ష, అనుబంధ రంగాల అభివృద్ధికి తమ ప్రభుత్వం ప్రత్యేక ప్రణాళికలను సిద్ధం చేసినట్లు మంత్రి తెలిపారు. ఇందులో భాగంగా ప్రభుత్వం ఇప్పటికే 'స్పేస్ పాలసీ 4.0'ని ఆవిష్కరించింది. కేవలం అంతరిక్ష పరిశోధనలకే పరిమితం కాకుండా, శాటిలైట్ తయారీ, లాంచ్ సిస్టమ్స్,డీప్-టెక్ ఇన్నోవేషన్‌ను ప్రోత్సహించేందుకు ప్రత్యేక 'స్పేస్ సిటీ'లను అభివృద్ధి చేస్తున్నట్లు వెల్లడించారు. శ్రీహరికోట సమీపంలో 3,000 ఎకరాల విస్తీర్ణంలో ప్రతిపాదించిన 'తిరుపతి స్పేస్ సిటీ' దీనికి ప్రధాన కేంద్రబిందువుగా నిలుస్తుందని, ఇది లాంచ్ వెహికల్ అసెంబ్లీ నుండి ఏవియానిక్స్ తయారీ వరకు అన్ని రకాల సాంకేతికతలకు నిలయంగా మారుతుందని ఆయన వివరించారు.

భారతదేశ అంతరిక్ష రంగంలో ఆంధ్రప్రదేశ్ కీలక పాత్రను మంత్రి గుర్తు చేశారు. దేశంలోనే ఏకైక క్రియాశీలక స్పేస్‌పోర్ట్ అయిన సతీష్ ధావన్ అంతరిక్ష కేంద్రం ఆంధ్రప్రదేశ్‌లోనే ఉండటం, ఇప్పటివరకు 100కు పైగా అంతరిక్ష ప్రయోగాలు విజయవంతంగా అక్కడి నుండే జరగడం రాష్ట్రానికి గొప్ప అనుకూలత అని పేర్కొన్నారు. రోస్కోస్మోస్ వంటి రష్యన్ సాంకేతిక భాగస్వాములకు, శాటిలైట్ ఇంటిగ్రేటర్లకు, స్పేస్-టెక్ సంస్థలకు ఆంధ్రప్రదేశ్ ఒక సహజసిద్ధమైన కేంద్రమని, ప్రపంచంలోనే అత్యంత వేగంగా అభివృద్ధి చెందుతున్న అంతరిక్ష ఆర్థిక వ్యవస్థలో భాగస్వాములు కావాలని ఆయన రష్యన్ పారిశ్రామికవేత్తలను కోరారు.

అంతరిక్ష రంగంతో పాటు ఇతర అధునాతన తయారీ రంగాలలోనూ రాష్ట్రం భారీ అవకాశాలను అందిస్తోంది. బెంగళూరుకు సమీపంలోని శ్రీ సత్యసాయి జిల్లాలో అభివృద్ధి చేస్తున్న అడ్వాన్స్‌డ్ మాన్యుఫ్యాక్చరింగ్ కారిడార్‌ను మంత్రి ప్రత్యేకంగా ప్రస్తావించారు. ఏరోస్పేస్ భాగాలు, డ్రోన్ల తయారీ, నౌకాదళ వ్యవస్థలు, సెమీకండక్టర్ పరిశ్రమలకు ఇది అద్భుతమైన గమ్యస్థానమని ఆయన పేర్కొన్నారు. భారత్ చేపట్టిన 'ఆత్మనిర్భర్ భారత్'లో భాగంగా, సెమీకండక్టర్లు, క్వాంటం కంప్యూటింగ్, మరియు అత్యాధునిక ఆరోగ్య సాంకేతికతలలో కూడా పెట్టుబడులకు రాష్ట్రంలో పుష్కలమైన అవకాశాలు ఉన్నాయని ఆయన స్పష్టం చేశారు.

భారత్-రష్యాల మధ్య దశాబ్దాల కాలంగా ఉన్న బలమైన సంబంధాలను మంత్రి ఈ సందర్భంగా గుర్తు చేశారు. 1975లో ఆర్యభట్ట ప్రయోగంతో మొదలైన ఇరు దేశాల అంతరిక్ష ప్రయాణం, ఇప్పుడు తదుపరి దశకు చేరుకోవాల్సిన సమయం ఆసన్నమైందని లోకేష్ అన్నారు. రష్యన్ పరిశ్రమలు, ఇంధన సంస్థలు కేవలం పెట్టుబడిదారులుగా మాత్రమే కాకుండా, భూమి మీద, సముద్రంపై, ఆకాశంలో స్థిరమైన వృద్ధిని సాధించేందుకు ఆంధ్రప్రదేశ్‌తో దీర్ఘకాలిక భాగస్వాములుగా కలిసి రావాలని ఆయన విజ్ఞప్తి చేశారు. ఇప్పటికే బియ్యం, రొయ్యల ఎగుమతులలో రష్యాతో బలమైన వాణిజ్య సంబంధాలు కలిగి ఉన్న ఆంధ్రప్రదేశ్, ఇప్పుడు సాంకేతిక రంగంలోనూ ఆ బంధాన్ని మరింత బలోపేతం చేయాలని ఆశిస్తోంది.