రాష్ట్రంలో శాంతిభద్రతలు పూర్తిగా క్షీణించాయి: కేటీఆర్

తెలంగాణలో కాంగ్రెస్ అధికారంలోకి వచ్చిన తర్వాత శాంతిభద్రతలు పూర్తిగా క్షీణించాయని బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా విమర్శించారు. రాష్ట్రవ్యాప్తంగా వరుసగా జరుగుతున్న దారుణ నేరాలు సామాన్య ప్రజలను అభద్రతా భావంలోకి నెట్టేస్తున్నాయని ఆయన ఆందోళన వ్యక్తం చేశారు. ఈ మేరకు 'ఎక్స్' (ట్విట్టర్) వేదికగా ప్రభుత్వ వైఫల్యాలను ఆయన ఎండగట్టారు.

పోలీసు యంత్రాంగం పట్ల కేటీఆర్ పలు కీలక ఆరోపణలు చేశారు. నేరాల నివారణపై దృష్టి పెట్టాల్సిన పోలీస్, ఇంటెలిజెన్స్ వ్యవస్థలను ప్రభుత్వం కేవలం రాజకీయ కక్షసాధింపులకే వాడుకుంటోందని మండిపడ్డారు. బీఆర్ఎస్ నాయకులు, కార్యకర్తలు, సోషల్ మీడియాలో ప్రశ్నించే గొంతులపై అక్రమ కేసులు బనాయించడమే లక్ష్యంగా పోలీస్ వ్యవస్థ పనిచేస్తోందని విమర్శించారు. పోలీసులను రాజకీయ వేధింపుల కోసం మళ్లించడం వల్లనే ప్రజల రక్షణ గాలిలో కలిసిపోయిందని ఆయన ధ్వజమెత్తారు.

నగరాన్ని ఉలిక్కిపడేలా చేసిన హత్యలు

శాంతిభద్రతల క్షీణతపై బీఆర్ఎస్ ప్రతినిధి బృందం డీజీపీని కలిసి ఫిర్యాదు చేస్తున్న సమయంలోనే, హైద‌రాబాద్ లోని ప్రశాసన్ నగర్‌లో రిటైర్డ్ డీజీ ర్యాంక్ ఐపీఎస్ అధికారి వినయ్ రంజన్ రాయ్ భార్య దారుణ హత్యకు గురికావడం తీవ్ర ఆందోళన కలిగించిందని కేటీఆర్ అన్నారు. కట్టుదిట్టమైన భద్రత ఉండే ప్రాంతంలో ఇలాంటి ఘటన జరగడం రాష్ట్ర పోలీసింగ్ పరిస్థితికి నిదర్శనమని పేర్కొన్నారు. అదే విధంగా, గురువారం రాత్రి సికింద్రాబాద్ లో నడిరోడ్డుపై ఓ యువకుడిని కత్తితో పొడిచి హత్య చేసిన ఘటన నగర ప్రజలను ఉలిక్కిపడేలా చేసిందన్నారు. ఈ వరుస సంఘటనలు సామాన్య పౌరుల్లో అభద్రతా భావాన్ని మరింత పెంచుతున్నాయని ఆయన తెలిపారు.

హోం శాఖను కూడా తన వద్దే ఉంచుకున్న ముఖ్యమంత్రి రేవంత్ రెడ్డి, ప్రజల ప్రాణాలను కాపాడటంలో ఘోరంగా విఫలమయ్యారని కేటీఆర్ ఆరోపించారు. తాజా ఎన్‌సీఆర్‌బీ నివేదికల ప్రకారం రాష్ట్రంలో మహిళలపై నేరాలు, సైబర్ నేరాలు భారీగా పెరగడం ప్రభుత్వ చేతకానితనమేనని ఎద్దేవా చేశారు. ఇప్పటికైనా ప్రభుత్వం రాజకీయ వేధింపులు ఆపి, పోలీస్ వ్యవస్థను బలోపేతం చేసి ప్రజల్లో భరోసా కల్పించాలని ఆయన డిమాండ్ చేశారు.