సెక్యులర్ పార్టీలతో బీజేపీని అడ్డుకోవడం సాధ్యం కాదు: ఎంపీ అసదుద్దీన్

దేశంలో బీజేపీ విస్తరణను “సెక్యులర్”గా చెప్పుకునే పార్టీలు అడ్డుకోలేవని, ముస్లింలు తమ స్వతంత్ర రాజకీయ నాయకత్వాన్ని నిర్మించుకోవాల్సిన అవసరం ఉందని హైద‌రాబాద్ ఎంపీ అసదుద్దీన్ ఓవైసీ వ్యాఖ్యానించారు. మంగళవారం ఆయన హైదరాబాద్‌లో మీడియాతో మాట్లాడుతూ.. పశ్చిమ బెంగాల్ అసెంబ్లీ ఎన్నికల ఫలితాల నేపథ్యంలో అనేక పార్టీలు గతంలో సాఫ్ట్ హిందుత్వ రాజకీయాలను అనుసరించాయని విమర్శించారు.

బెంగాల్‌లో టీఎంసీ ఓటమికి కారణాలివే..

పశ్చిమ బెంగాల్‌లో మమతా బెనర్జీ నేతృత్వంలోని తృణమూల్ కాంగ్రెస్ పరాజయానికి ప్రత్యేక ఓటరు జాబితా సవరణ (స‌ర్) ఒక కారణమని ఓవైసీ అభిప్రాయపడ్డారు. అయితే అది ఒక్కటే కారణం కాదని, ప్రభుత్వంపై తీవ్ర వ్యతిరేకత, అవినీతి ఆరోపణలు, అలాగే ముస్లిం సమాజం పట్ల జరిగిన నిర్లక్ష్యం కూడా ప్రధాన కారణాలుగా నిలిచాయని అన్నారు. తృణమూల్ ప్రభుత్వం ముస్లింలను పౌరులుగా కాకుండా కేవలం ఓటు బ్యాంకుగా చూసిందని ఆయన విమర్శించారు. నిజంగా ముస్లింలను సమాన పౌరులుగా భావించి ఉండి ఉంటే పశ్చిమ బెంగాల్‌లో మరింత అభివృద్ధి కనిపించేదని వ్యాఖ్యానించారు.

ఇటీవల జరిగిన రెండు దశల అసెంబ్లీ ఎన్నికల్లో భారతీయ జనతా పార్టీ 293 స్థానాల్లో 207 స్థానాలు గెలుచుకుని అధికారంలోకి వచ్చింది. ఈ తీర్పు ప్రజల నిర్ణయమని, దాన్ని గౌరవించాల్సిందేనని ఓవైసీ స్పష్టం చేశారు. అయితే ఈ ఫలితాలు మరోసారి ఒక విషయాన్ని స్పష్టం చేశాయని, బీజేపీ ఎదుగుదలను అడ్డుకోవడంలో సెక్యులర్ పార్టీల వ్యూహాలు విఫలమవుతున్నాయని అన్నారు. ప్రజలు వేసే ఓట్లు ఇలాంటి పార్టీలకు వెళ్తే అవి చివరికి వృథా అవుతున్నాయని ఆయన వ్యాఖ్యానించారు. ఆల్ ఇండియా మజ్లిస్-ఇత్తెహాదుల్ ముస్లిమీన్ పశ్చిమ బెంగాల్‌లో 11 మంది అభ్యర్థులను నిలబెట్టినా ఒక్కరూ గెలవలేకపోయారు. అయినప్పటికీ తమ పార్టీకి ఓటు వేసిన ప్రతి ఓటరికి ఆయన కృతజ్ఞతలు తెలిపారు. ఓటమి వచ్చినా ప్రజల మద్దతు తమకు ఎంతో విలువైనదని పేర్కొన్నారు.

ముస్లిం రాజకీయ నాయకత్వంపై ఒక విశ్లేషణ

ముస్లింలు ఇప్పుడు ఒకే వేదికపై ఐక్యంగా నిలబడి తమకంటూ స్వతంత్ర రాజకీయ నాయకత్వాన్ని నిర్మించుకోవాల్సిన సమయం వచ్చిందని ఓవైసీ అన్నారు. కనీసం తమ సమస్యలు, పక్కనబెట్టబడుతున్న వాస్తవాలు, అభివృద్ధి అవసరాలను స్పష్టంగా వినిపించే రాజకీయ స్వరం అవసరమని చెప్పారు. ప్రజాప్రతినిధులుగా ఎన్నికై అభివృద్ధి కోసం పనిచేసే నాయకత్వం ఉండాలని ఆయన అభిప్రాయపడ్డారు.

స‌ర్ అంశంపై తృణమూల్ వైఖరినీ ఆయన ప్రశ్నించారు. ఓటరు జాబితాల నుంచి పేర్లు తొలగించబడినప్పుడు రాష్ట్ర ప్రభుత్వం ఎందుకు బాధితులకు సహాయం చేయలేదని ప్రశ్నించారు. తృణమూల్ సుప్రీంకోర్టును ఆశ్రయించినా అది కేవలం ప్రతీకాత్మక చర్య మాత్రమేనని అన్నారు. ఈ విషయంలో హైదరాబాద్‌లోని తమ పార్టీ ప్రధాన కార్యాలయం నుంచి బాధితులకు సహాయం అందించామని చెప్పారు. అయితే స‌ర్ ను పౌరసత్వ అంశంతో అనుసంధానించడం సరైంది కాదని కూడా పేర్కొన్నారు.

కేరళ ఎన్నికల ఫలితాలపై స్పందిస్తూ, ఇండియన్ యూనియన్ ముస్లిం లీగ్ 22 స్థానాలు గెలుచుకోవడం ఆనందదాయకమని అన్నారు. ఈ విజయానికి దేవుడికి కృతజ్ఞతలు తెలిపారు. ఐయూఎంఎల్, యునైటెడ్ డెమోక్రాటిక్ ఫ్రంట్ లో భాగస్వామిగా నిలిచి మంచి ఫలితాలు సాధించిందని చెప్పారు.

అస్సాం పరిణామాలు, అంతర్జాతీయ సంబంధాలు

అస్సాంలోని పరిస్థితులపై కూడా ఓవైసీ తీవ్ర విమర్శలు చేశారు. హిమంత బిశ్వ శర్మ నేతృత్వంలోని ప్రభుత్వం సుమారు 50 వేల మంది ముస్లింలను నిర్వాసితులను చేసిందని ఆరోపించారు. ఆల్ ఇండియా యునైటెడ్ డెమోక్రాటిక్ ఫ్రంట్ కు మరిన్ని స్థానాలు వచ్చి ఉంటే ముస్లింలకు మరింత బలమైన స్వరం లభించేదని అన్నారు. బంగ్లాదేశ్‌కు రాత్రివేళల్లో సుమారు 1000 మందిని నెట్టేస్తున్నామన్న హిమంత బిశ్వ శర్మ వ్యాఖ్యలపై కూడా ఓవైసీ ప్రశ్నలు లేవనెత్తారు. అలాంటి చర్యలకు కేంద్ర హోం మంత్రిత్వ శాఖ అనుమతి ఇచ్చిందా అని ప్రశ్నించారు. ఈ తరహా వ్యాఖ్యలు భారత విదేశాంగ సంబంధాలపై, ముఖ్యంగా బంగ్లాదేశ్ తో సంబంధాలపై ప్రతికూల ప్రభావం చూపవచ్చని అన్నారు.

యూపీలో హత్యపై రైల్వే మంత్రికి లేఖ

ఉత్తరప్రదేశ్ లో కదులుతున్న రైలులో మౌలానా తౌసీఫ్ రజా మజారీ అనే వ్యక్తిని హత్య చేయడం 'హేట్ క్రైమ్' (ద్వేషపూరిత నేరం) అని ఓవైసీ అభివర్ణించారు. ఈ ఘటనపై నిష్పాక్షిక విచారణ జరిపించి, బాధిత కుటుంబానికి నష్టపరిహారం, ప్రభుత్వ ఉద్యోగం కల్పించాలని కోరుతూ రైల్వే మంత్రి అశ్విని వైష్ణవ్‌కు లేఖ రాసినట్లు ఆయన వెల్లడించారు.