‘ఇండియా’ కూటమి విచ్ఛిన్న దిశగా: బీజేపీ నేత ప్రకాష్ రెడ్డి

విపక్షాల ‘ఇండియా’ కూటమిలో అంతర్గత విభేదాలు రోజురోజుకూ తీవ్రమవుతున్నాయని, రాబోయే రోజుల్లో ప్రతిపక్ష పార్టీలన్నీ ఏకం కావడం అసాధ్యమని తెలంగాణ రాష్ట్ర బీజేపీ అధికార ప్రతినిధి ప్రకాష్ రెడ్డి ఆదివారం వ్యాఖ్యానించారు. ఈ కూటమి క్రమంగా విచ్ఛిన్నమవుతోందని ఆయన జోస్యం చెప్పారు.

ఈ సంద‌ర్భంగా ప్రకాష్ రెడ్డి మాట్లాడుతూ.. జూన్ 8న న్యూఢిల్లీలో జరగబోయే ఇండియా కూటమి కీలక సమావేశాన్ని బహిష్కరించాలని ఆ కూటమిలోని ప్రధాన భాగస్వామ్య పక్షమైన డీఎంకే నిర్ణయించుకుందని తెలిపారు. ఇటీవలి తమిళనాడు అసెంబ్లీ ఎన్నికల తర్వాత అక్కడ ఏర్పడిన రాజకీయ పరిణామాలే ఇందుకు ప్రధాన కారణమన్నారు. తమిళనాడు ఎన్నికల్లో టీవీకే పార్టీ విజయం సాధించగానే, కాంగ్రెస్ పార్టీ డీఎంకేను పక్కనబెట్టి టీవీకేతో జతకట్టిందని విమర్శించారు. కాంగ్రెస్ తీసుకున్న ఈ అవకాశవాద నిర్ణయం వల్లే కలత చెందిన ఎం.కె. స్టాలిన్ నేటి సమావేశానికి దూరంగా ఉండాలని నిర్ణయించుకున్నారని, ఇది కూటమి పతనానికి స్పష్టమైన సంకేతమని ఆయన ఎద్దేవా చేశారు.

మరోవైపు బీహార్ బీజేపీ చీఫ్ సంజయ్ సరోగి సైతం ఇండియా కూటమిపై మండిపడ్డారు. విపక్షాల శిబిరంలో తీవ్ర గందరగోళం, అంతర్గత పోరు నడుస్తోందని, వారి మధ్య కనీస సమన్వయం లేదని ఆరోపించారు. ఎన్డీయే కూటమి అంతా ఎంతో ఐక్యంగా ఉందని స్పష్టం చేశారు.

తృణమూల్ కాంగ్రెస్ (టీఎంసీ) సహా ఇతర పక్షాలు ఈ సమావేశానికి హాజరవుతున్నప్పటికీ, కూటమికి బలమైన స్తంభంగా ఉన్న డీఎంకే మాత్రం దూరంగా ఉండటం చర్చనీయాంశమైంది. తమిళనాడు ఎన్నికల్లో డీఎంకే నేతృత్వంలోని కూటమిలో భాగంగా పోటీ చేసి ఐదు స్థానాలు గెలుచుకున్న కాంగ్రెస్, ఎన్నికల తర్వాత టీవీకేకు మద్దతు ప్రకటించడంపై డీఎంకే శ్రేణులు తీవ్ర ఆగ్రహంతో ఉన్నారు. కాంగ్రెస్ చేసిన ఈ నమ్మకద్రోహం వల్ల తమ పార్టీ కార్యకర్తల మనోభావాలు తీవ్రంగా దెబ్బతిన్నాయని డీఎంకే ఒక ప్రకటనలో తెలిపింది. ముఖ్యంగా కాంగ్రెస్ పాల్గొనే ఈ సమావేశంలో తాము భాగస్వాములు కాలేమని డీఎంకే స్పష్టం చేసింది.