విచారణకు సహకరించేందుకు నా కుమారుడిని పోలీసులకు అప్పగించా: కేంద్ర మంత్రి బండి సంజయ్

తమపై వస్తున్న పోక్సో కేసు విచారణలో పోలీసులకు పూర్తిగా సహకరించాల్సిందిగా తన కుమారుడికి దిశానిర్దేశం చేశానని కేంద్ర మంత్రి బండి సంజయ్ కుమార్ బుధవారం తెలిపారు. ఇదే సమయంలో బీఆర్ఎస్ వర్కింగ్ ప్రెసిడెంట్ కేటీఆర్ పై ఆయన తీవ్రస్థాయిలో మండిపడ్డారు. కేటీఆర్ ఒక "ఫేక్ మీడియా ఫ్యాక్టరీ"ని నడుపుతున్నారని, తనపై అబద్ధాలను ప్రచారం చేస్తున్నారని ఆరోపించారు.

తన కుమారుడి అరెస్ట్, తదుపరి పరిణామాలపై మీడియా ప్రతినిధులు అడిగిన ప్రశ్నలకు బండి సంజయ్ స్పందించారు. ఈ పోక్సో కేసు ప్రస్తుతం న్యాయస్థానం పరిధిలో ఉందని ఆయన పేర్కొన్నారు. రాజకీయాల్లో ఏ తండ్రియైనా తన కుమారుడిని స్వయంగా పోలీసులకు అప్పగించిన సందర్భం ఉందా? ఈ విషయం తెలిసిన వెంటనే, విచారణకు సహకరించడం కోసం నేను నా కుమారుడిని పోలీసులకు అప్పగించాను. కేసీఆర్ కుమారుడు (కేటీఆర్) ఒక ఫేక్ మీడియా ఫ్యాక్టరీని నడుపుతున్నారు. ఈ కుట్రలన్నింటి వెనుక ఆయనే ఉన్నారు కాబట్టి, భవిష్యత్తులో ఏం జరుగుతుందో ఆయన్నే అడిగితే ఆయనే సమాధానం చెప్తారని సంజయ్ వ్యాఖ్యానించారు.

కేంద్ర మంత్రివర్గం నుండి తొలగింపు ఊహాగానాలపై స్పందన

ఈ కేసు నేపథ్యంలో మిమ్మల్ని కేంద్ర మంత్రివర్గం నుంచి తొలగిస్తారనే ఊహాగానాలు వస్తున్నాయని ప్రశ్నించగా, బండి సంజయ్ బీఆర్ఎస్ ని విమ‌ర్శించారు. బీఆర్ఎస్ పార్టీకి చెందిన అవినీతి సామ్రాజ్యాన్ని, కుటుంబ, భూస్వామ్య పాలనను బీజేపీ పూర్తిగా కూల్చివేసిందని.. ఆ కక్షతోనే బీఆర్ఎస్ నేతలు తనను మంత్రి పదవి నుంచి తొలగించాలని కోరుకుంటున్నారని ఆయన అన్నారు. అలాగే తాను సొంతంగా కొత్త పార్టీ పెట్టబోతున్నారంటూ వస్తున్న పుకార్లను బండి సంజయ్ తీవ్రంగా ఖండించారు. ప్రతి నిబద్ధత గల బీజేపీ కార్యకర్త తన మరణానంతరం తన భౌతికకాయంపై బీజేపీ జెండానే ఉండాలని కోరుకుంటాడని, తాను పార్టీ మారే ప్రసక్తే లేదని స్పష్టం చేశారు.

తన కుమారుడు భగీరథ్ అరెస్ట్ తర్వాత తనకు న్యాయవ్యవస్థపై పూర్తి నమ్మకం ఉందని, చివరికి సత్యమే గెలుస్తుందని కేంద్ర మంత్రి పునరుద్ఘాటించారు. కాగా, తెలంగాణ హైకోర్టు భగీరథ్‌కు ముందస్తు అరెస్ట్ నుంచి తాత్కాలిక రక్షణ కల్పించడానికి నిరాకరించడంతో, పోలీసులు ఆయనను మే 16వ తేదీన అరెస్ట్ చేసిన విషయం తెలిసిందే.