ఇండోనేషియాలో కుప్పకూలిన హెలికాప్టర్.. 8 మంది మృతి
ఇండోనేషియాలోని పశ్చిమ కలిమంతన్ ప్రాంతంలో గురువారం జరిగిన ఘోర హెలికాప్టర్ ప్రమాదంలో ఎనిమిది మంది ప్రాణాలు కోల్పోయారు. సింహువా వార్తా సంస్థ, ఇండోనేషియా జాతీయ పోలీసుల సమాచారం ప్రకారం, మారుమూల అటవీ ప్రాంతంలో హెలికాప్టర్ శకలాలను రెస్క్యూ టీమ్స్ గుర్తించాయి. విమానం అదృశ్యమైన కొద్దిసేపటికే గాలింపు చేపట్టిన అధికారులు, చివరకు ధ్వంసమైన స్థితిలో ఉన్న హెలికాప్టర్ను కనుగొన్నారు.
అడవిలో చెల్లాచెదురుగా శకలాలు
ప్రమాదానికి గురైన హెలికాప్టర్ను పి.టి. మాథ్యూ ఎయిర్ సంస్థకు చెందిన 'ఎయిర్బస్ హెచ్-130'గా గుర్తించారు. ప్రాథమిక సమాచారం ప్రకారం, ప్రమాద సమయంలో ఇందులో ఎనిమిది మంది ప్రయాణిస్తున్నారు. ఇండోనేషియా ఎయిర్ ఫోర్స్కు చెందిన సూపర్ ప్యూమా హెలికాప్టర్ గాలిస్తుండగా, మధ్యాహ్నం 3:25 గంటల సమయంలో తోక భాగం వంటి శకలాలు కనిపించాయి. చివరిసారిగా సంబంధాలు తెగిపోయిన ప్రాంతానికి కేవలం మూడు కిలోమీటర్ల దూరంలోనే ఈ ప్రమాదం జరిగినట్లు అధికారులు నిర్ధారించారు.
కొనసాగుతున్న మృతదేహాల వెలికితీత
ప్రమాద స్థలంలో సహాయక చర్యలు ముమ్మరంగా సాగుతున్నాయని రెస్క్యూ అధికారి లెఫ్టినెంట్ కల్నల్ నూరచ్మాన్ గింధా ద్రధిజ్య తెలిపారు. ఇప్పటివరకు నలుగురి మృతదేహాలను వెలికితీసి బాడీ బ్యాగుల్లో భద్రపరిచామని, మరో ముగ్గురి మృతదేహాలు హెలికాప్టర్ శిథిలాల మధ్య చిక్కుకుపోయాయని ఆయన వివరించారు. చివరి వ్యక్తి కోసం గాలింపు కొనసాగుతోందని చెప్పారు. శిథిలాలను తొలగించి లోపల ఉన్న మృతదేహాలను బయటకు తీయాల్సి ఉందని అధికారులు పేర్కొన్నారు.
అడ్డంకిగా మారిన చీకటి, దుర్భర పరిస్థితులు
సెకాడౌ ప్రాంతంలోని దట్టమైన అడవుల్లో ఈ ప్రమాదం జరగడంతో సహాయక చర్యలకు తీవ్ర ఆటంకాలు ఎదురవుతున్నాయి. ప్రమాద స్థలం అత్యంత క్లిష్టమైన భూభాగం కావడంతో పాటు, చీకటి పడటం, ప్రతికూల వాతావరణం కారణంగా గురువారం రాత్రికి ఆపరేషన్ను తాత్కాలికంగా నిలిపివేశారు. స్థానిక ప్రజల సహకారంతో గ్రౌండ్ టీమ్స్ ప్రమాద స్థలానికి చేరుకుంటున్నాయి.
అప్రమత్తమైన యంత్రాంగం
జాతీయ సెర్చ్ అండ్ రెస్క్యూ ఏజెన్సీ డిప్యూటీ ఎడి ప్రకాశో మాట్లాడుతూ.. ఏరియల్ మానిటరింగ్ ద్వారా ప్రమాద స్థలాన్ని గుర్తించి, ఆ కోఆర్డినేట్లను గ్రౌండ్ యూనిట్లకు పంపామని తెలిపారు. సహాయక చర్యల కోసం హులు పెనిటి గ్రామంలో అంబులెన్సులను సిద్ధంగా ఉంచారు. శుక్రవారం ఉదయమే మృతదేహాల వెలికితీత ప్రక్రియను తిరిగి ప్రారంభించిన అధికారులు.. నేడు రెస్క్యూ ఆపరేషన్ను పూర్తి చేసే అవకాశం ఉందని వెల్లడించారు.