హెడ్, క్లాసెన్ ధనాధన్ ఇన్నింగ్స్.. హైదరాబాద్ ఘన విజయం

ఐపీఎల్ 2026 సీజన్‌లో భాగంగా గురువారం ముంబైలోని వాంఖడే స్టేడియం పరుగుల వరదతో పోటెత్తింది. భారీ స్కోర్లు నమోదైన ఈ మ్యాచ్‌లో ముంబై ఇండియన్స్‌పై సన్‌రైజర్స్ హైదరాబాద్ అద్భుత విజయాన్ని అందుకుంది. రికార్డు స్థాయి లక్ష్యాన్ని మరో 8 బంతులు మిగిలి ఉండగానే ఛేదించిన ఆరెంజ్ ఆర్మీ, ఐపీఎల్ చరిత్రలోనే నాలుగో అత్యధిక పరుగుల ఛేదనను నమోదు చేసింది. ముంబై బ్యాటర్ ర్యాన్ రైకల్టన్ భారీ సెంచరీతో విరుచుకుపడినా, హైదరాబాద్ బ్యాటర్ల ధాటికి ముంబై బౌలర్లు నిలవలేకపోయారు.

రికెల్టన్ ఆకాశమే హద్దుగా..

టాస్ ఓడి తొలుత బ్యాటింగ్‌కు దిగిన ముంబై ఇండియన్స్‌కు ఓపెనర్ ర్యాన్ రికెల్టన్ కళ్లు చెదిరే ఆరంభాన్ని ఇచ్చాడు. ఆరంభం నుంచే ప్రత్యర్థి బౌలర్లపై విరుచుకుపడ్డ రికెల్టన్, కేవలం 55 బంతుల్లోనే 10 ఫోర్లు, 8 సిక్సర్లతో అజేయంగా 123 పరుగులు చేశాడు. తద్వారా ముంబై ఇండియన్స్ చరిత్రలోనే అత్యధిక వ్యక్తిగత స్కోరు సాధించిన ఆటగాడిగా సరికొత్త రికార్డు సృష్టించాడు. అతడికి తోడుగా ఇంగ్లాండ్ బ్యాటర్ విల్ జాక్స్ (46) రాణించడంతో మొదటి వికెట్‌కు 93 పరుగుల భాగస్వామ్యం నమోదైంది. చివర్లో కెప్టెన్ హార్దిక్ పాండ్యా (31) కూడా మెరుపులు మెరిపించడంతో ముంబై నిర్ణీత 20 ఓవర్లలో 5 వికెట్ల నష్టానికి 243 పరుగుల భారీ స్కోరు సాధించింది.

ఫీల్డింగ్ తప్పిదాలు.. హెడ్ సుడిగాలి ఇన్నింగ్స్

244 పరుగుల లక్ష్యంతో బరిలోకి దిగిన హైదరాబాద్‌కు ఆరంభంలో అదృష్టం కలిసివచ్చింది. ముంబై ఫీల్డర్ నమన్ ధీర్ రెండు క్యాచ్‌లను చేజార్చడం, ఒకసారి ఎడ్జ్ తీసుకున్న బంతిని ఎవరూ గమనించకపోవడం ట్రావిస్ హెడ్‌కు వరంగా మారింది. ఈ అవకాశాలను అందిపుచ్చుకున్న హెడ్ 30 బంతుల్లోనే 8 సిక్సర్లు, 4 ఫోర్లతో 76 పరుగులు చేసి ముంబై బౌలర్లను హడలెత్తించాడు. మరో ఓపెనర్ అభిషేక్ శర్మ కూడా ధాటిగా ఆడటంతో పవర్‌ప్లే ముగిసేసరికి హైదరాబాద్ స్కోరు బోర్డు పరుగులు పెట్టింది. ముంబై ప్రధాన అస్త్రం జస్ప్రీత్ బుమ్రా సైతం 54 పరుగులు సమర్పించుకొని వికెట్ తీయలేకపోవడం మ్యాచ్ మలుపు తిరగడానికి ప్రధాన కారణమైంది.

మిడిల్ ఓవర్లలో అల్లా గజన్ ఫర్ వరుసగా వికెట్లు తీసి ముంబైకి ఆశలు కల్పించినా, హెన్రిచ్ క్లాసెన్ అడ్డుగోడలా నిలిచాడు. క్లాసెన్ తన అనుభవాన్నంతా రంగరించి 30 బంతుల్లో 65 పరుగులు చేసి విజయాన్ని ఖాయం చేశాడు. చివర్లో సలీల్ అరోరా మెరుపుదాడి చేస్తూ కేవలం 10 బంతుల్లోనే 30 పరుగులు రాబట్టడంతో హైదరాబాద్ 18.4 ఓవర్లలోనే 4 వికెట్లు కోల్పోయి 249 పరుగులు సాధించింది. దీంతో 6 వికెట్ల తేడాతో హైదరాబాద్ చారిత్రక విజయాన్ని సొంతం చేసుకుంది.

సంక్షిప్త స్కోర్లు:

ముంబై ఇండియన్స్:

243/5 (ర్యాన్ రికెల్టన్ 123 నాటౌట్, విల్ జాక్స్ 46; టీ నటరాజన్ 1/38)

సన్‌రైజర్స్ హైదరాబాద్:

249/4 (18.4 ఓవర్లలో) (ట్రావిస్ హెడ్ 76, హెన్రిచ్ క్లాసెన్ 65 నాటౌట్, సలీల్ అరోరా 30 నాటౌట్).