చార్మినార్లో కల్తీ ఫాస్ట్ ఫుడ్ గోదాముపై హెచ్-ఫాస్ట్ దాడులు
నగరంలో ఆహార కల్తీ, అసురక్షిత ఆహార తయారీపై కఠిన చర్యలు కొనసాగుతున్నాయి. ఈ క్రమంలో హైదరాబాద్ ఫుడ్ అడల్టరేషన్ సర్వైలెన్స్ టీమ్ (హెచ్-ఫాస్ట్), ఫుడ్ సేఫ్టీ ఆఫీసర్ (ఎఫ్ఎస్వో)తో కలిసి చార్మినార్ పరిధిలోని హుస్సేనీఆలం పోలీస్ స్టేషన్ పరిధిలో అక్రమంగా నిర్వహిస్తున్న ఓ ఫాస్ట్ ఫుడ్ గోదాముపై ఆకస్మిక దాడి నిర్వహించింది.
నమ్మకమైన సమాచారం మేరకు చార్మినార్లోని పంచ్ మొహల్లా, న్యూ లాడ్ బజార్లో ఉన్న ‘మెసర్స్ అల్ అక్బర్ ఫాస్ట్ ఫుడ్ అండ్ గోడౌన్’ ప్రాంగణాన్ని అధికారులు తనిఖీ చేశారు. తనిఖీల్లో ప్రజారోగ్యానికి తీవ్ర ముప్పు కలిగించే పరిస్థితుల్లో ఆహార పదార్థాలను తయారు చేసి నిల్వ చేస్తున్నట్లు గుర్తించారు. నిర్బంధమైన ఎఫ్ఎస్ఎస్ఏఐ లైసెన్స్ లేకుండానే గోదామును నిర్వహిస్తున్నట్లు అధికారులు వెల్లడించారు. అలాగే నిషేధిత కృత్రిమ ఆహార రంగులు అయిన ఎంఎస్కే లయన్ గ్రీన్, రాస్బెర్రీ రెడ్ వినియోగిస్తున్నట్లు గుర్తించారు. పదేపదే వాడిన పాడైన వంటనూనెను ఉపయోగించడం, నీటి నాణ్యత ధ్రువీకరణ పత్రాలు లేకపోవడం, కీటకాల నియంత్రణ చర్యలు చేపట్టకపోవడం వంటి అనేక ఉల్లంఘనలను గుర్తించారు.
దాడిలో భాగంగా సుమారు 110 కిలోల తయారుచేసిన ఫ్రైడ్ చికెన్, 15 లీటర్ల చొప్పున ఆరు టిన్నుల వంటనూనె, కృత్రిమ రసాయన ఆహార రంగులను స్వాధీనం చేసుకున్నారు. ఈ అక్రమ కార్యకలాపాలకు పాల్పడుతున్న ఇద్దరు వ్యక్తులను అదుపులోకి తీసుకున్నారు.
ఇలాంటి కల్తీ, అపరిశుభ్రమైన ఆహారం తీసుకోవడం వల్ల ఫుడ్ పాయిజనింగ్, జీర్ణాశయ సంబంధిత ఇన్ఫెక్షన్లు, అలర్జీలు, కాలేయ సంబంధిత వ్యాధులు వచ్చే ప్రమాదం ఉందని అధికారులు హెచ్చరించారు. నిందితులపై ఫుడ్ సేఫ్టీ అండ్ స్టాండర్డ్స్ యాక్ట్-2006తో పాటు ఇతర సంబంధిత చట్టాల కింద హుస్సేనీఆలం పోలీస్ స్టేషన్లో కేసు నమోదు చేశారు. స్వాధీనం చేసుకున్న సామగ్రిని, నిందితులను తదుపరి విచారణ కోసం పోలీసులకు అప్పగించారు.
ఆహార భద్రత విషయంలో హైదరాబాద్ సిటీ పోలీస్ జీరో టాలరెన్స్ విధానాన్ని అమలు చేస్తోందని పేర్కొన్న అధికారులు, ప్రజలు ఆహార పదార్థాలు కొనుగోలు చేసే ముందు ఎఫ్ఎస్ఎస్ఏఐ లైసెన్స్ను తప్పనిసరిగా పరిశీలించాలని సూచించారు. అనుమానాస్పద ఆహార పదార్థాలపై ఫిర్యాదుల కోసం టోల్ఫ్రీ నంబర్ 8712661212ను సంప్రదించాలని కోరారు.