జడ్పీటీసీ నుంచి సీఎంగా.. రేవంత్ రెడ్డి రాజకీయ ప్రస్థానానికి 20 ఏళ్లు

తెలంగాణ ముఖ్యమంత్రి ఎ. రేవంత్ రెడ్డి శనివారం తన రాజకీయ జీవితంలో ఒక అత్యంత కీలకమైన మైలురాయిని చేరుకున్నారు. ఒక ప్రజాప్రతినిధిగా ఆయన విజయవంతంగా 20 సంవత్సరాల (రెండు దశాబ్దాల) ప్రస్థానాన్ని పూర్తి చేసుకున్నారు. 2006 జులై 4న ఆయన తొలిసారిగా ఒక స్థానిక సంస్థల ఎన్నికల్లో విజయం సాధించడంతో ఈ సుదీర్ఘ రాజకీయ ప్రయాణం ప్రారంభమైంది.

రేవంత్ రెడ్డి రెండు దశాబ్దాల రాజకీయ ప్రస్థానంలోని తన విద్యార్థి రాజకీయాలను ఏబీవీపీ ద్వారా ప్రారంభించినప్పటికీ, ప్రత్యక్ష ఎన్నికల బరిలోకి మాత్రం స్వతంత్రుడిగానే దిగారు. 2006 జులై 4న తన సొంత జిల్లా అయిన మహబూబ్‌నగర్‌లోని మిడ్జిల్ నుంచి ఆయన స్వతంత్ర అభ్యర్థిగా జడ్పీటీసీ సభ్యుడిగా గెలుపొందారు. తనదైన దూకుడు, వాగ్ధాటితో గుర్తింపు తెచ్చుకున్న ఆయన, మరుసటి ఏడాది (2007) లో మళ్లీ స్వతంత్ర అభ్యర్థిగానే శాసనమండలి సభ్యుడిగా ఎన్నికయ్యారు.

ఎమ్మెల్సీగా ఉన్న సమయంలోనే ఆయన తెలుగుదేశం పార్టీలో చేరారు. అప్పటి అధినేత నారా చంద్రబాబు నాయుడు నేతృత్వంలో పార్టీలో కీలక నేతగా ఎదిగారు. 2009, 2014 శాసనసభ ఎన్నికల్లో కొడంగల్ నియోజకవర్గం నుంచి ఎమ్మెల్యేగా విజయం సాధించారు. ఉమ్మడి ఆంధ్రప్రదేశ్ విభజన అనంతరం తెలంగాణ టీడీపీ వర్కింగ్ ప్రెసిడెంట్‌గా కూడా బాధ్యతలు నిర్వహించారు.

తెలంగాణలో టీడీపీ ఉనికి తగ్గుతున్న తరుణంలో, రేవంత్ రెడ్డి 2017లో కాంగ్రెస్ పార్టీలో చేరారు. అప్పటి అధికార బీఆర్ఎస్ ప్రభుత్వానికి, కేసీఆర్ కి వ్యతిరేకంగా రాజీలేని పోరాటం చేస్తూ కాంగ్రెస్‌లో తిరుగులేని ప్రజాదరణ సంపాదించుకున్నారు. 2018 అసెంబ్లీ ఎన్నికల్లో కొడంగల్ నుంచి ఆయన ఓటమిపాలయ్యారు. ఇది ఆయన రాజకీయ జీవితంలోనే ఏకైక ఓటమి.

అయితే, ఆ ఓటమి నుంచి త్వరగానే కోలుకుని 2019 లోక్‌సభ ఎన్నికల్లో మల్కాజ్‌గిరి పార్లమెంట్ స్థానం నుంచి ఎంపీగా గెలిచారు. ఆయన నాయకత్వ పటిమను గుర్తించిన ఏఐసీసీ, 2021లో ఆయనను తెలంగాణ కాంగ్రెస్ అధ్యక్షుడిగా నియమించింది. రేవంత్ రెడ్డి వ్యూహాత్మక సారథ్యంలో కాంగ్రెస్ పార్టీ 2023 అసెంబ్లీ ఎన్నికల్లో చారిత్రాత్మక విజయం సాధించి, 2023 డిసెంబర్ 7న ఆయన తెలంగాణకు రెండవ ముఖ్యమంత్రిగా ప్రమాణ స్వీకారం చేశారు.

ఆకాంక్షల నెరవేర్చేందుకు కృషి

56 ఏళ్ల రేవంత్ రెడ్డి ఈ 20 ఏళ్ల మైలురాయి సందర్భంగా.. కష్టకాలంలో తనకు అండగా నిలిచిన మద్దతుదారులకు, కార్యకర్తలకు సామాజిక మాధ్యమం ‘ఎక్స్’ వేదికగా కృతజ్ఞతలు తెలిపారు. లక్షల అక్షరాలతో రాసినా.. కోట్ల మాటలతో అల్లినా.. మరచిపోలేని ఒక మధుర జ్ఞాపకం.. ఈ రెండు దశాబ్దాల నా ప్రజాజీవితం. ఆనాడు మిడ్జిల్‌లో రేవంత్ రెడ్డిగా మొదలై.. ఈనాడు మీ అందరి గుండెల్లో 'రేవంతన్న'గా నిలిచిన ఈ అద్భుత ప్రయాణం నా జీవితంలో ఒక ప్రత్యేక అధ్యాయం. ఈ 20 ఏళ్ల ప్రయాణంలో ప్రతి పోరాటంలో నాకు అండగా నిలిచిన స్నేహితులకు, హితైషులకు, రాజకీయ కార్యకర్తలకు నా హృదయపూర్వక ధన్యవాదాలు. అదే స్ఫూర్తితో, భవిష్యత్తులో తెలంగాణ పునర్నిర్మాణంలో ఒక శ్రామికుడిగా, ప్రజల ఆకాంక్షలను నెరవేర్చే సేవకుడిగా ఉంటానని మాట ఇస్తున్నాను అని రేవంత్ రెడ్డి భావోద్వేగ పోస్ట్‌ చేశారు. ఈ సందర్భంగా రాష్ట్ర ఆరోగ్య శాఖ మంత్రి సి. దామోదర్ రాజనర్సింహతో పాటు పలువురు రాజకీయ ప్రముఖులు ముఖ్యమంత్రికి అభినందనలు తెలియజేశారు.