ఏపీలో ఖనిజ సంపద అన్వేషణ.. రాష్ట్రవ్యాప్తంగా ‘మినరల్ మ్యాపింగ్’‌కు సీఎం ఆదేశం

ఆంధ్రప్రదేశ్ రాష్ట్రంలో విలువైన ఖనిజ నిక్షేపాలను వెలికితీసేందుకు రాష్ట్రవ్యాప్తంగా సమగ్ర సర్వే (మినరల్ మ్యాపింగ్) చేపట్టాలని ముఖ్యమంత్రి నారా చంద్రబాబు నాయుడు అధికారులను ఆదేశించారు. మంగళవారం తన క్యాంపు కార్యాలయంలో గనుల శాఖ పనితీరుపై సీఎం ఉన్నత స్థాయి సమీక్ష నిర్వహించారు. ఈ సందర్భంగా ఖనిజాల ప్రాసెసింగ్ ద్వారా ‘వాల్యూ అడిషన్’ పెంచడంపై ఆయన ప్రత్యేకంగా దృష్టి సారించారు.

రాష్ట్రంలో ఉన్న అపారమైన ఖనిజ సంపద ద్వారా భారీగా ఆదాయాన్ని సృష్టించవచ్చని, వాణిజ్యపరంగా లబ్ధి పొందేందుకు అనేక అవకాశాలు ఉన్నాయని సీఎం చంద్రబాబు పేర్కొన్నారు. ప్రభుత్వ యాజమాన్యంలోని ఆంధ్రప్రదేశ్ ఖనిజాభివృద్ధి సంస్థ ఈ విలువైన ఖనిజ ఆస్తుల ద్వారా ఆదాయాన్ని ఆర్జించే మార్గాలను అన్వేషించాలని, ఇందుకోసం నిపుణుల సహాయంతో వివరణాత్మక అధ్యయనం చేయాలని ఆదేశించారు.

సముద్రతీర ఇసుక, రేర్ ఎర్త్ ఖనిజాలు, ఇనుప ఖనిజం, మాంగనీస్, అల్యూమినా వంటి ఖనిజాలకు స్థానికంగానే విలువ జోడించడం ద్వారా రాష్ట్రానికి భారీగా ఆదాయం సమకూరుతుందని సీఎం తెలిపారు. దేశంలోని పలు రాష్ట్రాలు కేవలం ఖనిజ ఆధారిత ఆదాయం ద్వారానే రెవెన్యూ మిగులును సాధించాయని సీఎం గుర్తుచేశారు. ఆర్థిక ప్రయోజనాలను పెంచడానికి, స్థానిక యువతకు పెద్ద ఎత్తున ఉపాధి కల్పించడానికి ఖనిజాల ప్రాసెసింగ్ ప్రక్రియ అంతా ఆంధ్రప్రదేశ్ లోపలే జరగాలని ఆయన స్పష్టం చేశారు.

ఆంధ్రప్రదేశ్, ఒడిశా, కేరళ రాష్ట్రాలను కలుపుతూ ఒక ప్రత్యేక 'రేర్ ఎర్త్ మినరల్స్ క్లస్టర్' ఏర్పాటును సీఎం ప్రతిపాదించారు. టైటానియం, ఇల్మేనైట్, మోనజైట్ వంటి అధిక విలువ కలిగిన ఖనిజ నిల్వలను అంచనా వేయాలన్నారు. ఇవి ఎలక్ట్రానిక్స్, హై-పెర్ఫార్మెన్స్ అయస్కాంతాల తయారీతో పాటు అణుశక్తి, జాతీయ భద్రత వంటి వ్యూహాత్మక రంగాలలో కీలకమని వివరించారు.

బంగారు గనులు – ఇసుక అక్రమాలపై నిఘా

రాష్ట్రంలో బంగారు గనుల తవ్వకానికి ఉన్న అవకాశాలను సీఎం ప్రస్తావిస్తూ.. జొన్నగిరి, చిగురుకుంట ప్రాంతాల్లోని బంగారు నిల్వలపై దృష్టి పెట్టాలని, భవిష్యత్ అన్వేషణ కోసం మిగిలిన మినరల్ బ్లాకులను అధ్యయనం చేయాలని చెప్పారు. రాష్ట్రంలో ఇప్పటికే రసాయన, బల్క్, ఇతర విలువైన ఖనిజాలు ఉన్న 126 ప్రాంతాలను గుర్తించామని, మైనింగ్ కార్యకలాపాల మెరుగుదల ద్వారా ఆదాయంలో 18 శాతం వృద్ధి నమోదైందని అధికారులు సీఎంకు వివరించారు.

మైనింగ్ కార్యకలాపాలలో కఠినమైన నిబంధనలు పాటించాలని, ఇసుక తవ్వకాలు, సరఫరాను అత్యాధునిక సాంకేతికతతో పర్యవేక్షించాలని సీఎం ఆదేశించారు. ఇసుక రీచ్‌ల వద్ద సీసీటీవీ కెమెరాల ఏర్పాటు, శాటిలైట్ చిత్రాల ద్వారా క్రమబద్ధమైన విశ్లేషణ, ఇసుక రవాణా చేసే వాహనాలకు జీపీఎస్ ట్రాకింగ్ తప్పనిసరి చేయాలన్నారు. ప్రజల ప్రయోజనం కోసం ప్రభుత్వం ఉచిత ఇసుక విధానాన్ని తీసుకురావడం వల్ల ఏటా దాదాపు రూ. 1,000 కోట్ల ఆదాయాన్ని వదులుకుందని సీఎం గుర్తుచేశారు. ఈ ఉచిత ఇసుక విధానం ఎక్కడా దుర్వినియోగం కాకుండా, అత్యంత పారదర్శకంగా ప్రజలకు అందేలా చూడాలని అధికారులను సీఎం చంద్రబాబు ఆదేశించారు.