మూసీ రివర్బెడ్ నిర్వాసితులకు డబుల్ బెడ్రూమ్ ఇళ్లు: సీఎం రేవంత్ రెడ్డి
రాష్ట్ర ప్రభుత్వం ప్రతిష్టాత్మకంగా చేపట్టిన ‘మూసీ రివర్ ఫ్రంట్ ప్రాజెక్ట్’ పై ప్రజల్లో పూర్తి అవగాహన కల్పించేందుకు నగరంలో ‘మూసీ ఎక్స్పీరియన్స్ సెంటర్’ ను ఏర్పాటు చేయాలని ముఖ్యమంత్రి ఎ. రేవంత్ రెడ్డి అధికారులను ఆదేశించారు.
హుస్సేన్ సాగర్ లేక్ పరిసరాల్లోని నెక్లెస్ రోడ్డు వద్ద ఈ కేంద్రాన్ని ఏర్పాటు చేయాలని సీఎం సూచించారు. ఈ ప్రతిపాదిత ఎక్స్పీరియన్స్ సెంటర్.. మూసీ నది పునరుజ్జీవన ప్రాజెక్టుకు సంబంధించిన వివిధ దశలను, దాని రూపురేఖలను ప్రతిబింబించేలా ఉండాలని, అలాగే ఈ ప్రాజెక్టుపై ప్రజల నుంచి అభిప్రాయాలను, సూచనలను కూడా ఇక్కడే సేకరించాలని ఆయన స్పష్టం చేశారు. శుక్రవారం రాత్రి విడుదలైన అధికారిక ప్రకటన ప్రకారం.. మూసీ రివర్ ఫ్రంట్ ప్రాజెక్ట్ మొదటి దశ ఏర్పాట్లపై ముఖ్యమంత్రి రేవంత్ రెడ్డి ఉన్నతాధికారులతో ఉన్నత స్థాయి సమీక్షా సమావేశం నిర్వహించారు.
ముసీ నది పరివాహక ప్రాంతంలో నివసిస్తున్న కుటుంబాల పునరావాసానికి ప్రత్యేక ప్రాధాన్యం ఇవ్వాలని సీఎం స్పష్టం చేశారు. మూసీ రివర్బెడ్ ప్రాంతాల్లో నివసిస్తున్న అర్హులైన వారికి ప్రభుత్వ డబుల్ బెడ్రూమ్ ఇళ్లను కేటాయించాలని ఆదేశించారు. ప్రాజెక్ట్ కోసం సేకరించే ప్రైవేట్ భూముల యజమానులకు చట్టప్రకారం తగిన నష్టపరిహారం గానీ లేదా ట్రాన్స్ఫరబుల్ డెవలప్మెంట్ రైట్స్ (టీడీఆర్) గానీ అందించాలని స్పష్టం చేశారు. బాపు ఘాట్ వద్ద ప్రతిపాదిత ‘గాంధీ సరోవర్ ప్రాజెక్ట్’ చేపట్టేందుకు రక్షణ శాఖ భూముల్లో ఉన్న నిర్మాణాలను రాష్ట్ర ప్రభుత్వమే వేరే చోటికి తరలించాలని, తద్వారా ప్రాజెక్ట్ అమలులో ఎలాంటి ఆలస్యం జరగకుండా చూసుకోవాలని అధికారులను ఆదేశించారు.
గాంధీ సరోవర్ ప్రాజెక్ట్
మూసీ నది పునరుజ్జీవన కార్యక్రమంలో భాగంగా బాపు ఘాట్ వద్ద ‘గాంధీ సరోవర్ ప్రాజెక్ట్’ పనులను ప్రారంభించడానికి రక్షణ శాఖ అధికారులు ఇటీవలే అనుమతులు మంజూరు చేశారు. మూసీ నది తీరాన ఉన్న బాపు ఘాట్ మహాత్మా గాంధీ స్మారక చిహ్నం. 1948 లో ఈసా, మూసీ నదుల సంగమ ప్రాంతంలోనే జాతిపిత అస్తికలను నిమజ్జనం చేశారు, అక్కడే బాపు ఘాట్ను నిర్మించారు. మొత్తం 55 కిలోమీటర్ల మేర మూసీ నది పునరుజ్జీవనం కోసం రాష్ట్ర ప్రభుత్వం భారీ ప్రణాళికను సిద్ధం చేసింది. ఇందులో భాగంగా చేపట్టే మొదటి దశ ప్రాజెక్ట్ ఉస్మాన్ సాగర్, హిమాయత్ సాగర్ జంట జలాశయాల నుంచి బాపు ఘాట్ లోని గాంధీ సరోవర్ వరకు విస్తరించనుంది.
ఈ సమావేశంలో రాష్ట్ర రెవెన్యూ, గృహనిర్మాణ శాఖల మంత్రి పొంగులేటి శ్రీనివాస రెడ్డి, ఎంపీ వేం నరేందర్ రెడ్డి, ప్రభుత్వ ప్రత్యేక ప్రధాన కార్యదర్శి జయేష్ రంజన్ తో పాటు పలువురు ఉన్నతాధికారులు పాల్గొన్నారు.