ఢిల్లీ ఐఆర్ఎస్ కుమార్తె హత్య కేసు.. నిందితుడు అరెస్ట్
దక్షిణ ఢిల్లీలోని కైలాశ్ హిల్స్ ప్రాంతంలో ఐఆర్ఎస్ అధికారి 22 ఏళ్ల కుమార్తెపై జరిగిన అత్యంత దారుణ అత్యాచారం–హత్య కేసులో సంచలన వివరాలు వెలుగులోకి వచ్చాయి. ఈ ఘటన కేవలం 30 నిమిషాల్లోనే జరిగిందని పోలీసుల ప్రాథమిక దర్యాప్తులో తేలింది. నిందితుడు రాహుల్ మీనా (19)ను పోలీసులు అరెస్ట్ చేసి, నాలుగు రోజుల కస్టడీకి కోర్టు అనుమతి ఇచ్చింది.
స్పృహ కోల్పోయాకే అత్యాచారం?
పోలీసుల వివరాల ప్రకారం, నిందితుడు గతంలో బాధితురాలి ఇంట్లో సహాయకుడిగా పనిచేశాడు. కుటుంబ సభ్యుల దినచర్యపై పూర్తి అవగాహన కలిగి ఉండటంతో, తల్లిదండ్రులు ఉదయం వాకింగ్, జిమ్కు వెళ్లే సమయంలో యువతి ఒంటరిగా ఉంటుందని తెలుసుకుని అదే సమయాన్ని లక్ష్యంగా ఎంచుకున్నాడు. బుధవారం ఉదయం సుమారు 6:30 గంటలకు కాలనీలోకి ప్రవేశించిన నిందితుడు, షూ ర్యాక్లో ఉంచిన స్పేర్ కీతో ఇంట్లోకి వెళ్లాడు. పై అంతస్తులో చదువుకుంటున్న బాధితురాలి గదిలోకి వెళ్లి డబ్బు కోసం వాగ్వాదం జరిపి, అనంతరం ఆమెపై దాడి చేసినట్లు పోలీసులు అనుమానిస్తున్నారు. మొదట గొంతు నులిమి స్పృహ కోల్పోయేలా చేసి, ఆ సమయంలో లైంగిక దాడి చేసినట్లు భావిస్తున్నారు. తర్వాత మొబైల్ చార్జింగ్ కేబుల్తో గొంతు నులిమి హత్య చేశాడు. అనంతరం శరీరాన్ని మెట్లపై నుంచి కిందికి లాగి, ఆమె వేలిముద్రతో లాకర్ తెరవడానికి ప్రయత్నించాడు. విఫలమవడంతో స్క్రూడ్రైవర్తో లాకర్ పగులగొట్టి నగదు, ఆభరణాలు దోచుకుని పారిపోయాడు. సీసీటీవీ ఫుటేజీ ప్రకారం, ఉదయం 6:49కు ఇంట్లోకి ప్రవేశించి, 7:20కు బయటకు వెళ్లినట్లు పోలీసులు గుర్తించారు.
ముమ్మరంగా దర్యాప్తు
బాధితురాలి తండ్రి సమాచారం ఇవ్వడంతో పోలీసులు ఘటనాస్థలానికి చేరుకుని యువతిని ఆసుపత్రికి తరలించగా, అప్పటికే ఆమె మృతి చెందినట్లు వైద్యులు నిర్ధారించారు. కేసు నమోదు చేసి దర్యాప్తు వేగవంతం చేశారు. ఘటన అనంతరం కొద్ది గంటల్లోనే నిందితుడిని ఢిల్లీలోని ద్వారక ప్రాంతంలోని హోటల్లో పోలీసులు అదుపులోకి తీసుకున్నారు. తప్పించుకునే ప్రయత్నంలో అతను తన మొబైల్ను విక్రయించి, వాహనం అద్దెకు తీసుకుని నగరానికి వచ్చినట్లు పోలీసులు తెలిపారు. రాజస్థాన్లోని అల్వార్లో జరిగిన మరో అత్యాచారం కేసు నుంచి తప్పించుకునేందుకే ఇలా చేసినట్లు అనుమానం వ్యక్తమవుతోంది.
పోస్ట్మార్టం నివేదికలో కీలక విషయాలు
పోస్ట్మార్టం నివేదికలో బాధితురాలి శరీరంపై తీవ్రమైన గాయాలు, ముక్కు ఎముక విరగడం, చేతులు–కాళ్లపై గీతలు ఉన్నట్లు తేలింది. ఢిల్లీ ఎయిమ్స్ ఫోరెన్సిక్ విభాగాధిపతి డా. సుధీర్ గుప్తా తెలిపిన వివరాల ప్రకారం, గొంతు నులిమివేయడంతో శ్వాస ఆడక మరణించినట్లు నిర్ధారించారు. మెడలో అంతర్గత రక్తస్రావం కూడా కనిపించినట్లు వెల్లడించారు. అత్యాచారం జరిగిందా అన్నది నిర్ధారించేందుకు నమూనాలను సేకరించి ఫోరెన్సిక్ పరీక్షలకు పంపినట్లు తెలిపారు.
నిందితుడి ప్రవర్తనపై అనుమానాలు
పోలీసుల విచారణలో నిందితుడు ఎలాంటి పశ్చాత్తాపం చూపకపోవడం గమనార్హమని అధికారులు తెలిపారు. అతని మానసిక స్థితి, ఉద్దేశాలపై ప్రత్యేకంగా విశ్లేషణ జరుగుతోంది. సంఘటనల క్రమాన్ని పునర్నిర్మించేందుకు, డిజిటల్, ఫోరెన్సిక్ ఆధారాలను సేకరించేందుకు కస్టడీ అవసరమని పోలీసులు కోర్టుకు తెలిపారు. ఈ కేసులో పూర్తి వివరాలు వెలికితీయడానికి ఢిల్లీతో పాటు రాజస్థాన్లో కూడా దర్యాప్తు కొనసాగుతోంది. అల్వార్లో జరిగిన మరో అత్యాచారం కేసుతో సంబంధాలు ఉన్నాయా అన్న కోణంలో కూడా పోలీసులు విచారణ జరుపుతున్నారు. ఈ దారుణ ఘటన ఢిల్లీలో భద్రతా వ్యవస్థపై తీవ్ర ఆందోళనలకు దారి తీసింది. నిందితుడికి కఠిన శిక్ష పడేలా అన్ని కోణాల్లో దర్యాప్తు కొనసాగిస్తామని పోలీసులు స్పష్టం చేశారు.