కిర్గిజ్స్థాన్లో రక్షణ మంత్రి రాజ్నాథ్ సింగ్ పర్యటన
షాంఘై సహకార సంస్థ (ఎస్సీఓ) రక్షణ మంత్రుల సమావేశంలో పాల్గొనేందుకు భారత రక్షణ మంత్రి రాజ్నాథ్ సింగ్ కిర్గిజిస్తాన్ రాజధాని బిష్కెక్లో పర్యటించనున్నారు. ఆసియా ప్రాంతంలో నెలకొన్న భద్రతా సవాళ్లు, దేశాల మధ్య వ్యూహాత్మక సహకారంపై ఈ సమావేశంలో సభ్య దేశాలు చర్చించనున్నాయి. నిన్ననే (సోమవారం) ఆయన బిష్కెక్కు బయలుదేరుతూ.. ఈ పర్యటన ద్వారా ప్రాంతీయ భద్రత విషయంలో భారత్ తన దృఢమైన వైఖరిని చాటిచెబుతుందని ఆశాభావం వ్యక్తం చేశారు.
ఉగ్రవాదంపై జీరో టాలరెన్స్
ప్రస్తుతం ప్రపంచవ్యాప్తంగా నెలకొన్న అస్థిరత, భద్రతా సవాళ్ల దృష్ట్యా గ్లోబల్ పీస్ (ప్రపంచ శాంతి) పట్ల భారత్ అంకితభావాన్ని ఈ సమావేశంలో నొక్కి చెబుతానని రాజ్నాథ్ సింగ్ పేర్కొన్నారు. ఈ మేరకు ఆయన ‘X’ వేదికగా స్పందిస్తూ.. "ఉగ్రవాదం, తీవ్రవాదంపై భారత్ అనుసరిస్తున్న ‘జీరో టాలరెన్స్’ (సున్నా సహనం) విధానాన్ని సమావేశంలో సభ్యదేశాల ప్రతినిధులకు స్పష్టంగా వివరిస్తాను" అని వెల్లడించారు.
ద్వైపాక్షిక చర్చలు - ప్రవాసులతో భేటీ
ఈ పర్యటనలో రాజ్నాథ్ సింగ్ కేవలం ప్రధాన సమావేశానికే పరిమితం కాకుండా, వివిధ దేశాల రక్షణ మంత్రులతో విడివిడిగా భేటీ కానున్నారు. ఈ చర్చల్లో భాగంగా దేశ సరిహద్దుల రక్షణ, అత్యాధునిక సైనిక సాంకేతికతను పరస్పరం పంచుకోవడం, రక్షణ రంగంలో కొత్త ఒప్పందాల ద్వారా సంబంధాలను మరింత బలోపేతం చేసుకోవడంపై ఆయన దృష్టి సారించనున్నారు. వీటితో పాటు బిష్కెక్లో ఉంటున్న భారతీయులను కలిసి వారి యోగక్షేమాలను అడిగి తెలుసుకోవడమే కాకుండా, అక్కడి భారతీయ సమాజంతో ప్రత్యేకంగా ముచ్చటించనున్నారు.
బలపడుతున్న ఎస్సీఓ కూటమి
2001లో చైనా, రష్యా, మధ్య ఆసియా దేశాలతో ఏర్పడిన ఈ కూటమిలో భారత్ క్రియాశీలక పాత్ర పోషిస్తోంది. 2023లో భారత అధ్యక్షతన ఇరాన్ను పూర్తిస్థాయి సభ్యదేశంగా చేర్చుకోవడంతో ఈ కూటమి మరింత బలపడింది. నేడు జరగబోయే చర్చల్లో ప్రధానంగా ఉగ్రవాదాన్ని సమర్థవంతంగా అడ్డుకోవడం, సభ్య దేశాలన్నీ కలిసి ఉమ్మడి సైనిక విన్యాసాలు నిర్వహించడం, శత్రు దేశాల కదలికలకు సంబంధించిన నిఘా సమాచారాన్ని ఒకరికొకరు వేగంగా పంచుకోవడం వంటి కీలక అంశాలపై రక్షణ మంత్రులు నిర్ణయాలు తీసుకోనున్నారు.
కిర్గిజిస్తాన్తో పటిష్ట రక్షణ బంధం
భారత్-కిర్గిజిస్తాన్ మధ్య రక్షణ సంబంధాలు చారిత్రాత్మకమైనవి. ఈ నెల ప్రారంభంలోనే న్యూఢిల్లీలో జరిగిన 4వ జాయింట్ వర్కింగ్ గ్రూప్ సమావేశంలో 2026-2027 ఆర్థిక సంవత్సరానికి సంబంధించి కొత్త పారిశ్రామిక భాగస్వామ్యాలు, సాంకేతిక మార్పిడిపై కీలక నిర్ణయాలు తీసుకున్నారు. రాజ్నాథ్ సింగ్ నేటి పర్యటనతో ఈ ద్వైపాక్షిక సంబంధాలు మరో మెట్టు పైకి వెళ్తాయని విశ్లేషకులు భావిస్తున్నారు. సరిహద్దుల్లో ఉగ్రవాదాన్ని తుడిచిపెట్టాలని కోరుతున్న భారత్, నేటి సమావేశంలో సభ్యదేశాల మద్దతును కూడగట్టడంలో కీలక పాత్ర పోషించనుంది.