టర్కీలో దావూద్ అనుచరుడు సలీం డోలా అరెస్ట్.. భారత్కు అప్పగింత
అండర్ వరల్డ్ డాన్ దావూద్ ఇబ్రహీం ప్రధాన అనుచరుడు, అంతర్జాతీయ మాదకద్రవ్యాల నెట్వర్క్ సూత్రధారి సలీం డోలా ఎట్టకేలకు భారత భద్రతా సంస్థల చేతికి చిక్కాడు. టర్కీ రాజధాని ఇస్తాంబుల్లో ఆ దేశ పోలీసులు చేపట్టిన మెరుపు దాడిలో పట్టుబడ్డ డోలాను, మంగళవారం ఉదయం ప్రత్యేక విమానంలో ఢిల్లీకి తరలించారు. భారత నిఘా సంస్థలు, అంతర్జాతీయ ఏజెన్సీల సమన్వయంతో సాగిన ఈ ఆపరేషన్ దావూద్ డ్రగ్స్ సామ్రాజ్యానికి పెద్ద దెబ్బగా భావిస్తున్నారు.
టర్కీలో హైడ్రామా.. చిక్కాడిలా!
చాలా కాలంగా ఇంటర్పోల్ 'రెడ్ నోటీసు' జాబితాలో ఉన్న సలీం డోలాను పట్టుకోవడానికి టర్కీలోని నార్కోటిక్స్ క్రైమ్ డివిజన్ భారీ ఆపరేషన్ చేపట్టింది. ఇస్తాంబుల్లోని 'బెయిలిక్దుజు' ప్రాంతంలో ఒక నివాస గృహంలో డోలా తలదాచుకున్నట్లు నిఘా వర్గాలు సమాచారం అందించాయి. సాంకేతిక ఆధారాలతో నిందితుడి కదలికలను నిశితంగా గమనించిన పోలీసులు, ఏప్రిల్ 25న ఆ ఇంటిని చుట్టుముట్టి డోలాను అదుపులోకి తీసుకున్నారు. అవసరమైన చట్టపరమైన ప్రక్రియను పూర్తి చేసిన అనంతరం మంగళవారం అతడిని భారత్కు అప్పగించారు.
ముంబై లింకులే ముంచేశాయి
ఇటీవల ముంబైలోని కుర్లా ప్రాంతంలో నిర్వహించిన దాడులు ఈ అరెస్టుకు కీలకమయ్యాయి. అక్కడ పట్టుబడ్డ కొందరు డ్రగ్స్ వ్యాపారులు తాము సలీం డోలా ఆదేశాల మేరకే పనిచేస్తున్నట్లు ఒప్పుకున్నారు. ఆ సమయంలో పోలీసులు దాదాపు 126 కిలోల మెఫెడ్రోన్ (మత్తు పదార్థం)తో పాటు రూ.25 లక్షలకు పైగా నగదును స్వాధీనం చేసుకున్నారు. ఈ కేసు విచారణలో భాగంగా సలీం డోలా హస్తం బయటపడటంతో నిఘా వర్గాలు గాలింపును ముమ్మరం చేశాయి.
ఎవరీ సలీం డోలా?
దావూద్ ఇబ్రహీంకు చెందిన 'డి-కంపెనీ'లో సలీం డోలా అత్యంత నమ్మకస్తుడు. విదేశాల నుంచి భారత్కు డ్రగ్స్ సరఫరా చేసే మొత్తం వ్యవస్థను ఇతడే పర్యవేక్షిస్తుంటాడు. ముఖ్యంగా సింథటిక్ డ్రగ్స్ తయారీ, సరఫరా, హవాలా లావాదేవీల్లో ఇతడిది అందెవేసిన చేయి. గతంలోనూ పలు ఉగ్రవాద కార్యకలాపాలకు నిధులు సమకూర్చిన ఆరోపణలు ఇతడిపై ఉన్నాయి.
నిఘా సంస్థల విచారణ
టర్కీ నుంచి ఢిల్లీ విమానాశ్రయానికి చేరుకున్న సలీం డోలాను ప్రస్తుతం నిఘా అధికారులు విచారిస్తున్నారు. ప్రాథమిక విచారణ ముగిశాక అతడిని ముంబై పోలీసులకు అప్పగిస్తారు. డోలాపై అత్యంత కఠినమైన మత్తు పదార్థాల నిరోధక చట్టం కింద కేసులు నమోదయ్యాయి. డోలా భారీ ఎత్తున డ్రగ్స్ స్మగ్లింగ్ చేసినట్లు ఆధారాలు ఉండటంతో, కనీసం 10 ఏళ్లకు పైగా జైలు శిక్ష పడటమే కాకుండా బెయిల్ రావడం కూడా చాలా కష్టం. డోలా నోరు విప్పితే అండర్ వరల్డ్ డాన్ దావూద్ ఇబ్రహీం డ్రగ్స్ నెట్వర్క్కు సంబంధించిన మరిన్ని సంచలన నిజాలు వెలుగులోకి వచ్చే అవకాశం ఉందని పోలీసులు భావిస్తున్నారు.
డ్రగ్స్ మాఫియాపై ఉక్కుపాదం: అమిత్ షా
మత్తు పదార్థాల నెట్వర్క్ను కూకటివేళ్లతో సహా పెకిలించాలన్న మోడీ ప్రభుత్వ లక్ష్యంలో భాగంగానే సలీం డోలాను రప్పించామని కేంద్ర హోం మంత్రి అమిత్ షా పేర్కొన్నారు. ఈ సందర్భంగా ఆయన మాట్లాడుతూ.. "నార్కో సిండికేట్ల పట్ల మా ప్రభుత్వం 'జీరో టాలరెన్స్' విధానాన్ని అనుసరిస్తోంది. గ్లోబల్ ఏజెన్సీల సహకారంతో మన నిఘా సంస్థలు అంతర్జాతీయ సరిహద్దులు దాటి మరీ నిందితులను గాలిస్తున్నాయి. ఇకపై డ్రగ్స్ కింగ్పిన్లు ప్రపంచంలో ఎక్కడ దాక్కున్నా వారికి రక్షణ ఉండదు. వారిని పట్టుకుని తీరుతాం" అని స్పష్టం చేశారు. నార్కోటిక్స్ కంట్రోల్ బ్యూరో సాధించిన ఈ విజయం డ్రగ్స్ రహిత భారత్ దిశగా ఒక కీలక అడుగు అని ఆయన కొనియాడారు.