సాయికృష్ణ కేసులో దోషులకు తమిళనాడు తరహాలో ఉరిశిక్ష పడాలి: అంబటి రాంబాబు
సాయికృష్ణ కస్టోడియల్ డెత్ కేసులో ప్రభుత్వం చేపట్టిన మెజిస్టీరియల్ విచారణపై తీవ్ర అనుమానాలు వ్యక్తం చేస్తూ, కేసులో అసలు నిందితులందరినీ గుర్తించి కఠిన చర్యలు తీసుకోవాలని వైఎస్సార్సీపీ డిమాండ్ చేసింది. ఈ కేసులో తమిళనాడులో జరిగిన కస్టోడియల్ డెత్ కేసు తరహాలో సమగ్ర దర్యాప్తు జరిపి, దోషులందరికీ ఉరిశిక్ష విధించేలా చర్యలు తీసుకోవాలని మాజీ మంత్రి అంబటి రాంబాబు ప్రభుత్వాన్ని కోరారు.
ప్రభుత్వం నిర్వహిస్తున్న మెజిస్టీరియల్ విచారణకు వైఎస్సార్సీపీ ప్రతినిధుల బృందం హాజరై తమ అభ్యంతరాలు, అనుమానాలు, డిమాండ్లను లిఖితపూర్వకంగా విచారణ అధికారులకు సమర్పించింది. అనంతరం మాజీ మంత్రి అంబటి రాంబాబు, మాజీ ఎమ్మెల్యేలు టీజేఆర్ సుధాకర్బాబు, మల్లాది విష్ణు మీడియాతో మాట్లాడారు.
అంబటి రాంబాబు మాట్లాడుతూ, సాయికృష్ణ కస్టోడియల్ డెత్ కేసు రాష్ట్రవ్యాప్తంగా కాకుండా దేశవ్యాప్తంగా సంచలనం సృష్టించిన అత్యంత విషాదకర ఘటన అని పేర్కొన్నారు. ఒక యువకుడిని పోలీసు కస్టడీలో హింసించి హత్య చేయడమే కాకుండా, మృతదేహాన్ని మాయం చేసి ఆధారాలను చెరిపివేసే ప్రయత్నం జరిగిందనే అనుమానాలు బలంగా ఉన్నాయని ఆరోపించారు.
ఈ కేసులో సీఐ నాగరాజును మాత్రమే బాధ్యుడిగా చూపించి, అసలు సూత్రధారులు, ఇతర నిందితులను కాపాడే ప్రయత్నం జరుగుతోందని ఆయన ఆరోపించారు. ఈ అనుమానాలన్నింటినీ మెజిస్టీరియల్ విచారణ అధికారుల దృష్టికి తీసుకెళ్లినట్లు తెలిపారు.
పోలీసు కస్టడీలో మరణం సంభవించిన కేసుల్లో అదే రాష్ట్ర పోలీసులతో దర్యాప్తు జరిపించడం న్యాయసమ్మతం కాదని అంబటి అభిప్రాయపడ్డారు. అందువల్ల ఈ కేసులో మెజిస్టీరియల్ విచారణతో పాటు జ్యుడీషియల్ విచారణ కూడా జరగాలని, స్వతంత్ర సంస్థ అయిన సీబీఐతో దర్యాప్తు చేపట్టాలని డిమాండ్ చేశారు.
సీసీటీవీ ఫుటేజీలు, సెల్ఫోన్ డేటా, ఇతర డిజిటల్ ఆధారాలను స్వాధీనం చేసుకుని పూర్తి స్థాయిలో విచారణ నిర్వహించాలని కోరారు. కేసును నీరుగార్చే ప్రయత్నం చేస్తే అది బాధిత కుటుంబానికే కాకుండా సమాజానికే తీవ్ర అన్యాయం అవుతుందని హెచ్చరించారు.
తమిళనాడులో జరిగిన కస్టోడియల్ డెత్ కేసులో దోషులపై తీసుకున్న చర్యలను ఉదాహరణగా ప్రస్తావించిన అంబటి రాంబాబు, అదే తరహాలో ఈ కేసులోనూ నిజమైన నిందితులందరినీ గుర్తించి చట్టం ముందు నిలబెట్టి కఠిన శిక్షలు విధించాలని డిమాండ్ చేశారు. ఎంతటి పెద్ద వ్యక్తులు ఉన్నా చట్టం ముందు నిలబడాల్సిందేనని, బాధిత కుటుంబానికి పూర్తి న్యాయం జరిగే వరకు వైఎస్సార్సీపీ పోరాటం కొనసాగుతుందని స్పష్టం చేశారు.
మాజీ ఎమ్మెల్యే టీజేఆర్ సుధాకర్బాబు మాట్లాడుతూ, మెజిస్టీరియల్ విచారణలో తమ అభ్యంతరాలు, అనుమానాలను లిఖితపూర్వకంగా సమర్పించినట్లు తెలిపారు. ప్రభుత్వం సీఐ నాగరాజును ఒక్కరినే బాధ్యుడిగా చూపించి కేసును ముగించే ప్రయత్నం చేస్తోందనే అనుమానాలు ఉన్నాయని అన్నారు.
సాయికృష్ణను అదుపులోకి తీసుకురావాలని ఆదేశించిన వ్యక్తులు ఎవరో ప్రభుత్వం ప్రజలకు వెల్లడించాలని డిమాండ్ చేశారు. మార్కాపురం నుంచి విజయవాడ వరకు ఉన్న సీసీటీవీ ఫుటేజీలన్నింటినీ స్వాధీనం చేసుకుని బహిర్గతం చేయాలని కోరారు. ఈ కేసు రాజకీయాలకు సంబంధించినది కాదని, పూర్తిగా మానవ హక్కులకు సంబంధించిన అంశమని పేర్కొన్నారు.
ప్రస్తుతం కొనసాగుతున్న సిట్ దర్యాప్తు, మెజిస్టీరియల్ విచారణలపై తమకు ఎలాంటి నమ్మకం లేదని, స్వతంత్ర సీబీఐ దర్యాప్తు ద్వారానే వాస్తవాలు వెలుగులోకి వస్తాయని సుధాకర్బాబు అభిప్రాయపడ్డారు.
మాజీ ఎమ్మెల్యే మల్లాది విష్ణు మాట్లాడుతూ, ప్రస్తుతం జరుగుతున్న సిట్, మెజిస్టీరియల్ విచారణలు కేవలం కంటి తుడుపు చర్యల్లా కనిపిస్తున్నాయని విమర్శించారు. బాధిత కుటుంబానికి పూర్తి న్యాయం జరగాలంటే స్వతంత్ర సీబీఐ దర్యాప్తు ఒక్కటే మార్గమని అన్నారు. అసలు వాస్తవాలు బయటపడి, ఈ ఘటనకు బాధ్యులైన వారందరిపై చట్టపరమైన చర్యలు తీసుకునే వరకు వైఎస్సార్సీపీ ప్రజల తరఫున తన పోరాటాన్ని కొనసాగిస్తుందని మల్లాది విష్ణు స్పష్టం చేశారు.