నోయిడా కార్మికుల హింస వెనుక కుట్ర?: పోలీసులు అనుమానం

ఉత్తరప్రదేశ్‌లోని నోయిడాలో ఏప్రిల్‌ 13న కార్మికుల నిరసన సందర్భంగా జరిగిన హింసాత్మక ఘటనలు సహజంగా జరిగినవికాదని, అవి ముందుగానే పన్నిన కుట్రలో భాగమై ఉండొచ్చని ఉత్తరప్రదేశ్‌ పోలీసు వర్గాలు పేర్కొన్నాయి. కనీస వేతనాల పెంపు కోసం కార్మికులు చేపట్టిన నిరసనలు సోమవారం హింసాత్మకంగా మారి రాళ్లు రువ్వడం, వాహనాలకు నిప్పంటించడం వంటి ఘటనలు చోటుచేసుకున్నాయి. పోలీసుల సమాచారం ప్రకారం ఇప్పటివరకు 350 మందికి పైగా అనుమానితులను అదుపులోకి తీసుకోగా, వారిలో 200 మందికిపైగా వ్యక్తులను అధికారికంగా అరెస్టు చేశారు. వీరిలో కొందరు ముందుగానే ప్రణాళికబద్ధంగా వాహనాలకు నిప్పంటించినట్లు ఆరోపణలు ఉన్నాయి. దర్యాప్తులో భాగంగా 5 నుంచి 6 మంది కీలక వ్యక్తులను గుర్తించినట్లు అధికారులు తెలిపారు. హింసాత్మక ఘటనలను అమలు చేసిన ప్రధాన వ్యక్తులు వీరేనని అనుమానం వ్యక్తమవుతోంది.

నకిలీ వాట్సాప్‌ గ్రూపులు

ప్రాథమిక దర్యాప్తు ప్రకారం శిక్షణ పొందిన ఒక మిలీషియా తరహా గుంపు కార్మికుల నిరసనలను తమ ఆధీనంలోకి తీసుకుని హింసను ప్రేరేపించి ఉండవచ్చని పోలీసులు భావిస్తున్నారు. ఇదే నెట్‌వర్క్‌ హర్యానాలోని ఫరీదాబాద్‌ వంటి ఇతర ప్రాంతాల్లో కూడా కార్యకలాపాలు విస్తరించి ఉండవచ్చని అధికారులు చెబుతున్నారు. దర్యాప్తు అధికారులు తెలిపిన వివరాల ప్రకారం కొంతమంది వ్యక్తులు వివిధ ప్రాంతాల నుంచి పెట్రోల్‌ తీసుకువచ్చి ముందుగానే గుర్తించిన ప్రాంతాల్లో వాహనాలకు నిప్పంటించినట్లు అనుమానం వ్యక్తమవుతోంది. వ్యక్తుల కదలికలు, సామగ్రి రవాణా అన్నీ సమన్వయంతో జరిగాయని పోలీసులు భావిస్తున్నారు. అదేవిధంగా తప్పుడు సమాచారం వ్యాప్తి కోసం నకిలీ వాట్సాప్‌ గ్రూపులను సృష్టించి మరణాలు జరిగినట్లు వంటి పుకార్లు వ్యాపింపజేసినట్లు కూడా పోలీసులు గుర్తించారు. దీనితో ప్రజల్లో భయం, ఉద్రిక్తతలు పెంచే ప్రయత్నం జరిగిందని అధికారులు పేర్కొన్నారు. అయితే పోలీసుల సైబర్‌ యూనిట్లు ఈ పుకార్ల మూలాలను గుర్తించి డిజిటల్‌ ఆధారాలను సేకరిస్తున్నట్లు తెలిపారు. సోషల్‌ మీడియా మానిటరింగ్‌ సెల్‌ జోక్యంతో కొన్ని ఆన్‌లైన్‌ నెట్‌వర్క్‌లను నిలిపివేసినట్లు వెల్లడించారు.

ఇదిలా ఉండగా రాష్ట్ర ప్రభుత్వం వేతనాల పెంపును ప్రకటించినప్పటికీ మంగళవారం కూడా నోయిడా ఫేజ్‌–2లోని హోసియరీ కాంప్లెక్స్‌లో కార్మికుల నిరసనలు కొనసాగాయి. అక్కడ భారీగా పోలీసు బలగాలను మోహరించారు. కార్మికులు కనీస వేతనాలను పెంచాలని డిమాండ్‌ చేస్తున్నారు. సోమవారం పోలీసులతో జరిగిన ఘర్షణల తర్వాత నిరసనలు హింసాత్మకంగా మారి రాళ్లు రువ్వడం, వాహనాలకు నిప్పంటించడం వంటి ఘటనలు చోటుచేసుకున్నాయి.