నేడు పశ్చిమ గోదావరి జిల్లాలో సీఎం చంద్రబాబు పర్యటన
ఆంధ్రప్రదేశ్ ముఖ్యమంత్రి నారా చంద్రబాబు నాయుడు సోమవారం పశ్చిమ గోదావరి జిల్లాలో పర్యటించనున్నారు. ‘మీ భూమి-మీ హక్కు’ కార్యక్రమంలో భాగంగా ఆయన రైతులకు పట్టాదార్ పాస్బుక్కులను పంపిణీ చేయడంతో పాటు, లబ్ధిదారులతో ప్రత్యేకంగా ముఖాముఖి నిర్వహించనున్నారు.
ఆచంట నియోజకవర్గ పరిధిలోని సిద్ధాంతం గ్రామంలో జరిగే ఈ కార్యక్రమంలో సీఎం పాల్గొంటారని ఆదివారం విడుదల చేసిన ఒక అధికారిక ప్రకటనలో ప్రభుత్వం పేర్కొంది. గతంలో జారీ చేసిన పాస్బుక్కులలో దొర్లిన తప్పులను సరిదిద్ది, రైతుల సమక్షంలోనే తిరిగి భూముల రీసర్వేలు నిర్వహించిన అనంతరం ప్రభుత్వం ఈ కొత్త పట్టాదార్ పాస్బుక్కులను అందజేస్తోంది. ‘మీ భూమి-మీ హక్కు’ పథకం కింద సీఎం ప్రతి నెల స్వయంగా రైతులను కలుస్తూ, అధికారులు వారి భూమి వివరాలను చదివి వినిపించిన తర్వాత ఈ పాస్బుక్కులను పంపిణీ చేస్తున్నట్లు ప్రకటన తెలిపింది.
ప్రభుత్వ వివరాల ప్రకారం, గత జనవరి మాసం నుంచి ఇప్పటివరకు రాష్ట్రవ్యాప్తంగా 6,688 గ్రామాలలో రీసర్వే పనులు విజయవంతంగా పూర్తయ్యాయి. అలాగే గత ఆరు నెలల కాలంలో 6,459 గ్రామాలకు చెందిన దాదాపు 26.4 లక్షల మంది రైతులకు పట్టాదార్ పాస్బుక్కులను అందజేశారు. రాబోయే తొమ్మిది నెలల్లో మరో 10,357 గ్రామాలలో రీసర్వే ప్రక్రియను పూర్తి చేయాలని సీఎం లక్ష్యంగా నిర్దేశించారు. దీని ద్వారా రాష్ట్రంలోని రైతులకు మొత్తం 67.3 లక్షల పట్టాదార్ పాస్బుక్కులను పంపిణీ చేయాలని ప్రభుత్వం ప్రణాళికలు సిద్ధం చేసింది.
దేశంలోనే మొదటిసారిగా ‘బ్లాక్చైన్’ టెక్నాలజీ
భూ రికార్డుల భద్రత కోసం ఆంధ్రప్రదేశ్ ప్రభుత్వం దేశంలోనే తొలిసారిగా ‘బ్లాక్చైన్’ ఆధారిత భూ రికార్డుల విధానాన్ని అమలు చేస్తోంది. దీని కింద ప్రతి భూ విభాగానికి ఒక శాశ్వత బ్లాక్చైన్ ఐడీని కేటాయిస్తున్నారు. ఈ సాంకేతికత వల్ల ఒకసారి నమోదైన భూ సమాచారాన్ని మార్చడం ఎవరికీ సాధ్యం కాదు. సర్వే ప్రక్రియ ప్రారంభం నుంచి తుది రికార్డుల తయారీ వరకు ప్రతి దశలోనూ ఈ-కేవైసీ ని తప్పనిసరి చేశారు. రైతులకు మొదట డ్రాఫ్ట్ పాస్బుక్కులను అందించి, వారు వివరాలను సరిచూసుకుని ఇ-కేవైసీ ద్వారా ధృవీకరించిన తర్వాతే తుది పాస్బుక్కులను ప్రింటింగ్కు పంపుతారు.
సీఎం పర్యటన షెడ్యూల్ వివరాలు
సీఎం పర్యటన షెడ్యూల్ ప్రకారం.. ఆయన సోమవారం ఉదయం 10.25 గంటలకు అమరావతి నుంచి బయలుదేరి, ఉదయం 11.00 గంటలకు పెనుగొండ మండలం సిద్ధాంతం గ్రామానికి చేరుకుంటారు. ఉదయం 11.15 గంటలకు అక్కడ ఏర్పాటు చేసిన బహిరంగ సభలో పాల్గొంటారు. అనంతరం మధ్యాహ్నం 2.30 గంటలకు రైతులతో ముఖాముఖి నిర్వహించి వారి సమస్యలను తెలుసుకుంటారు. మధ్యాహ్నం 3.15 గంటలకు తెలుగుదేశం పార్టీ శ్రేణులతో సమీక్షా సమావేశం జరిపి, సాయంత్రం 5.35 గంటలకు తిరిగి అమరావతికి చేరుకుంటారు.