ఆఫ్రికా దేశాల దిగుమతులపై చైనా 'సున్నా' సుంకం

ఆఫ్రికా ఖండంతో తన ఆర్థిక బంధాన్ని మరింత బలోపేతం చేసుకునే దిశగా చైనా కీలక నిర్ణయం తీసుకుంది. మే 1వ తేదీ నుంచి చైనాతో దౌత్య సంబంధాలు కలిగి ఉన్న అన్ని ఆఫ్రికా దేశాలకు 'సున్నా సుంకం' సౌకర్యాన్ని కల్పిస్తున్నట్లు అధికారికంగా ప్రకటించింది. ఈ నిర్ణయంతో ఆయా దేశాల నుంచి చైనాకు వచ్చే వస్తువులపై ఎటువంటి దిగుమతి పన్నులు ఉండవు.

కొత్తగా 20 దేశాలకు వర్తింపు

గతంలోనే 33 వెనుకబడిన ఆఫ్రికా దేశాలకు చైనా ఈ మినహాయింపులను ఇచ్చింది. తాజా నిర్ణయంతో మరో 20 అభివృద్ధి చెందుతున్న ఆఫ్రికా దేశాలకు కూడా ఈ అవకాశం లభించనుంది. మే 1, 2026 నుంచి ఏప్రిల్ 30, 2028 వరకు రెండేళ్ల పాటు ఈ ప్రత్యేక వెసులుబాటు అమల్లో ఉంటుందని చైనా స్టేట్ కౌన్సిల్ స్పష్టం చేసింది. మొత్తం మీద 53 ఆఫ్రికా దేశాలు ఇప్పుడు ఈ ప్రయోజనాన్ని పొందనున్నాయి.

కోటా విధానంలో నిబంధనలు

ఈ సున్నా సుంకం విధానంలో కొన్ని నిబంధనలను కూడా చైనా పొందుపరిచింది. నిర్దేశించిన టారిఫ్ కోటా పరిమితి లోపు వచ్చే ఉత్పత్తులకు మాత్రమే పన్ను పూర్తిగా మాఫీ అవుతుంది. ఒకవేళ కోటాకు మించి దిగుమతులు జరిగితే, పాత పన్ను రేట్లే వర్తిస్తాయని అధికారులు వెల్లడించారు. మరోవైపు ఆఫ్రికా నుంచి వ్యవసాయ ఉత్పత్తుల ఎగుమతులను సులభతరం చేసేందుకు గ్రీన్ ఛానల్‌ను మరింత మెరుగుపరుస్తామని చైనా విదేశాంగ శాఖ తెలిపింది.

విస్తరిస్తున్న డ్రాగన్ వ్యాపారం

గత దశాబ్ద కాలంగా ఆఫ్రికా ఖండంలో చైనా తన పెట్టుబడులను విపరీతంగా పెంచుతోంది. 2024 డిసెంబర్ నుంచి 33 ఆఫ్రికా దేశాలకు 100 శాతం టారిఫ్ మినహాయింపులు ఇచ్చింది. ఇప్పుడు మిగిలిన దేశాలను కూడా ఇందులో చేర్చడం ద్వారా ఆఫ్రికా వనరులపై పట్టు సాధించాలని చైనా భావిస్తోంది. ఆఫ్రికా దేశాలు-చైనా మధ్య ఆర్థిక భాగస్వామ్య ఒప్పందాలను కుదుర్చుకోవడం ద్వారా సంయుక్త అభివృద్ధికి కృషి చేస్తామని చైనా ప్రతినిధి లిన్ జియాన్ పేర్కొన్నారు.

భారీగా పెరుగుతున్న వాణిజ్యం

2025 గణాంకాల ప్రకారం చైనా-ఆఫ్రికా మధ్య మొత్తం వాణిజ్యం 348 బిలియన్ డాలర్లకు చేరుకుంది. ఇందులో చైనా ఎగుమతులు 225 బిలియన్ డాలర్లు కాగా, ఆఫ్రికా ఎగుమతులు కేవలం 123 బిలియన్ డాలర్లు మాత్రమే. ఈ అంతరాన్ని తగ్గించడానికి మరియు ఆఫ్రికా దేశాల్లో తన పెట్టుబడులకు రక్షణ కల్పించుకోవడానికి చైనా ఈ పన్ను మినహాయింపు వ్యూహాన్ని అమలు చేస్తోంది.