భారీ ఓటింగ్తో బెంగాల్లో మార్పు ఖాయం: మోడీ
పశ్చిమ బెంగాల్ అసెంబ్లీ ఎన్నికల తొలి దశలో నమోదైన భారీ ఓటింగ్ బీజేపీకి ఘన విజయం తీసుకురానుందని ప్రధాని నరేంద్ర మోడీ ధీమా వ్యక్తం చేశారు. ఇప్పటివరకు వచ్చిన ఓటింగ్ శాతం ‘మార్పు కోసం ప్రజలు ఇప్పటికే తీర్పు ఇచ్చినట్లే’ అని ఆయన అన్నారు. నదియా జిల్లాలోని కృష్ణానగర్లో నిర్వహించిన ఎన్నికల సభలో మాట్లాడిన ఆయన, ఎన్నికలలో హింసను గణనీయంగా తగ్గించడంలో ఎన్నికల సంఘం పాత్రను అభినందించారు. గత 50 ఏళ్లలో బెంగాల్లో ఇదే తొలిసారి పోలింగ్ సమయంలో హింస తక్కువగా నమోదైందని చెప్పారు. తొలి దశలో సుమారు 90 శాతం వరకు ఓటింగ్ నమోదవడం మార్పుకు సంకేతమని ఆయన వ్యాఖ్యానించారు. అధిక సంఖ్యలో ఓటర్లు పోలింగ్కు రావడం ఎప్పుడూ బీజేపీ విజయానికి దారితీస్తుందని పేర్కొన్నారు. 152 నియోజకవర్గాల్లో జరుగుతున్న పోలింగ్లో కొన్ని ప్రాంతాల్లో చెలరేగిన చిన్నచిన్న హింసాత్మక ఘటనలను తప్పిస్తే, మొత్తం ప్రక్రియ భారీ భద్రతా ఏర్పాట్ల మధ్య సాగుతోందన్నారు. దాదాపు 2400 కేంద్ర పారామిలటరీ బలగాలను మోహరించారు.
మే 4న విజయోత్సవాలు నిర్వహిస్తాం
మే 4న ఫలితాలు వెలువడిన తర్వాత బీజేపీ విజయోత్సవాలు నిర్వహిస్తామని, ప్రజలకు మిఠాయిలతో పాటు ‘జ్హాల్మూరి’ కూడా పంచుతామని మోడీ తెలిపారు. గత వారం జార్గ్రామ్లో తాను జ్హాల్మూరి తిన్న విషయాన్ని ప్రస్తావిస్తూ టీఎంసీపై వ్యంగ్యాస్త్రాలు సంధించారు. టీఎంసీ పాలనలో అవినీతి, మాఫియా ప్రభావం పెరిగిందని ఆరోపించిన మోడీ, కొన్ని జిల్లాల్లో ఆ పార్టీ ఒక్క సీటు కూడా గెలవదని అన్నారు. మతువా సమాజం ఉన్న ప్రాంతంలో మాట్లాడిన ఆయన, బంగ్లాదేశ్ నుంచి వచ్చిన శరణార్థులకు పౌరసత్వం కల్పించే ప్రక్రియను ఎన్నికల తర్వాత వేగవంతం చేస్తామని హామీ ఇచ్చారు. సిటిజన్షిప్ అమెండ్మెంట్ యాక్ట్ (సీఏఏ) అమలును మరింత వేగంగా ముందుకు తీసుకెళ్తామని తెలిపారు.
మహిళల భద్రతకు చర్యలు తీసుకుంటాం
మహిళల భద్రతపై కూడా మోడీ దృష్టి సారిస్తూ, రాష్ట్రంలో మహిళలపై దాడులు పెరిగాయని ఆరోపించారు. మహిళల సాధికారత కోసం పార్లమెంట్లో 33 శాతం రిజర్వేషన్ ఇవ్వాలని బీజేపీ ప్రయత్నిస్తుంటే, టీఎంసీ దానికి వ్యతిరేకంగా వ్యవహరించిందని విమర్శించారు. బీజేపీ ప్రభుత్వం ఏర్పడితే మహిళల సంక్షేమానికి ప్రత్యేక పథకాలు అమలు చేస్తామని హామీ ఇచ్చారు. ‘మాత్రి శక్తి భరోసా కార్డు’ ద్వారా ప్రతి మహిళకు సంవత్సరానికి రూ.36,000 అందజేస్తామని, గర్భిణీ స్త్రీలకు ఆర్థిక సాయం, బాలికల విద్యకు ప్రోత్సాహం, మహిళలకు స్వయం ఉపాధి కోసం రుణాలు వంటి పథకాలు అమలు చేస్తామని వివరించారు. ఇక మహిళల భద్రత కోసం ప్రతి బ్లాక్లో ప్రత్యేక పోలీస్ స్టేషన్లు ఏర్పాటు చేయడంతో పాటు, వీధుల్లో భద్రతా కేంద్రాలు ఏర్పాటు చేస్తామని తెలిపారు. మొత్తంగా బెంగాల్లో మార్పు గాలి స్పష్టంగా కనిపిస్తోందని, మే 4న బీజేపీ విజయంతో అది సాకారం అవుతుందని ప్రధాని విశ్వాసం వ్యక్తం చేశారు.
బేలూర్ మఠాన్ని సందర్శించిన ప్రధాని
పశ్చిమ బెంగాల్లో రామకృష్ణ మఠ్, రామకృష్ణ మిషన్ ప్రధాన కార్యాలయమైన బేలూర్ మఠాన్ని ప్రధాన మంత్రి నరేంద్ర మోడీ గురువారం సందర్శించారు. ఈ ఆధ్యాత్మిక సంస్థను రామకృష్ణ పరమహంస శిష్యుడైన స్వామి వివేకానంద స్థాపించారు. ఈ సందర్భంగా మోడీ బెంగాల్ రాష్ట్రం ఆధ్యాత్మిక, సాంస్కృతిక వారసత్వాన్ని ప్రశంసించారు. ప్రత్యేకంగా మా కాళీ ఆరాధన, అలాగే దుర్గాపూజ వంటి సంప్రదాయాలను ప్రస్తావిస్తూ, శక్తి, సేవ, మార్పు వంటి విలువలను వివరించారు. అదేవిధంగా స్వామి వివేకానంద బోధనలను గుర్తుచేసుకుంటూ యువత సాధికారత, దేశ నిర్మాణం, ఆధ్యాత్మిక జాతీయత వంటి అంశాలపై ఆయన దృష్టి సారించారు. రామకృష్ణ మిషన్ సిద్ధాంతాలతో తనకు చాలా కాలంగా అనుబంధం ఉందని పేర్కొన్నారు. పశ్చిమ బెంగాల్ రాజకీయ పరిస్థితుల నేపథ్యంలో ఈ ఆలోచనల ప్రాముఖ్యతను కూడా ఆయన సూచించారు.