బెంగాల్లో బీజేపీకి 200 సీట్లు వస్తాయి: హిమంత
అస్సాం ముఖ్యమంత్రి హిమంత బిశ్వ శర్మ పశ్చిమ బెంగాల్ అసెంబ్లీ ఎన్నికలపై కీలక వ్యాఖ్యలు చేశారు. ఈ ఎన్నికలు కేవలం ఒక రాష్ట్రానికి మాత్రమే సంబంధించినవి కాకుండా, దేశమంతటిపై ప్రభావం చూపే విధంగా ఉన్నాయని ఆయన పేర్కొన్నారు. బెంగాల్లో జరుగుతున్న అక్రమ చొరబాట్ల ప్రభావం పొరుగు రాష్ట్రాలకు కూడా విస్తరిస్తోందని ఆయన ఆరోపించారు. ఈ ఎన్నికల్లో ప్రతి భారతీయుడికి భాగస్వామ్యం ఉంది. చొరబాట్లు కేవలం పశ్చిమ బెంగాల్ లేదా అస్సాంకే పరిమితం కావు. అవి జార్ఖండ్, బీహార్ వంటి రాష్ట్రాలకు కూడా వ్యాపిస్తున్నాయని తెలిపారు.
పత్రికా సమావేశంలో ఆయన మాట్లాడుతూ, తొలి దశలో నమోదైన అధిక ఓటింగ్ శాతం ప్రజల్లో భయపడే వాతావరణాన్ని తగ్గించిందని ఆయన అన్నారు. ఇది మార్పునకు సంకేతం. బెంగాల్లో బీజేపీ 200కు పైగా సీట్లు గెలుచుకోవడం ఆశ్చర్యం కాదని ఆయన ధీమా వ్యక్తం చేశారు. బెంగాల్ భౌగోళిక పరిస్థితిని ప్రస్తావిస్తూ, భారత్–బంగ్లాదేశ్ సరిహద్దులో 54 శాతం బెంగాల్కే చెందిందని చెప్పారు. ఒక సరిహద్దు బలహీనంగా ఉంటే, దాని ప్రభావం మొత్తం ఈశాన్య రాష్ట్రాలపై పడుతుందని హెచ్చరించారు.
బెంగాల్ నుంచే చొరబాటుదారులు ప్రవేశిస్తున్నారు
మాల్దా, ముర్షీదాబాద్ వంటి జిల్లాల ద్వారా చొరబాట్లు జరుగుతున్నాయని, అక్కడి నుంచి ఇతర రాష్ట్రాలకు వెళ్లేందుకు మార్గంగా బెంగాల్ ఉపయోగపడుతోందని ఆయన ఆరోపించారు. సరిహద్దు కంచె నిర్మాణాన్ని టీఎంసీ ప్రభుత్వం అడ్డుకుంటోందని విమర్శించారు. అలాగే ఓటర్ల సంఖ్య సరిహద్దు జిల్లాల్లో భారీగా పెరిగిందని పేర్కొన్నారు. ఈ పరిస్థితి కొనసాగితే అస్సాం, బెంగాల్ రాష్ట్రాల్లో జనాభా నిర్మాణం మారిపోతుందని, భవిష్యత్తులో హిందూ మెజారిటీ తగ్గే ప్రమాదం ఉందని అన్నారు. బీజేపీ ప్రభుత్వం వస్తే, అమిత్షాతో కలిసి సరిహద్దు రాష్ట్రాల ముఖ్యమంత్రులతో టాస్క్ ఫోర్స్ ఏర్పాటు చేసి చొరబాట్లను అరికట్టేందుకు చర్యలు తీసుకుంటామని తెలిపారు. అలాగే 1948లో అమల్లో ఉన్న లీగల్ ఇమ్మిగ్రెంట్ ఎక్స్పల్షన్ చట్టాన్ని అన్ని సరిహద్దు రాష్ట్రాలకు విస్తరించాలని సూచించారు. ఆ చట్టాన్ని ఇప్పటికే సుప్రీం కోర్టు అస్సాంకు అనుకూలంగా సమర్థించిందని గుర్తు చేశారు. ఆర్థిక పరంగా కూడా బెంగాల్ వెనుకబడుతోందని విమర్శిస్తూ, ఒడిశా ఇప్పటికే కొన్ని సూచికల్లో ముందుకెళ్లిందని, అస్సాం ఆర్థిక వృద్ధి రేటు వేగంగా పెరుగుతోందని అన్నారు. బెంగాల్ గుజరాత్, మహారాష్ట్రలతో పోటీ పడేలా అభివృద్ధి చెందాలి. జనాభా రక్షణతో పాటు పారిశ్రామిక వృద్ధి బీజేపీ ప్రధాన లక్ష్యమని ఆయన చెప్పారు.