డిసెంబర్ నాటికి బీబీనగర్ ఎయిమ్స్ పూర్తి.. ఆరోగ్య రంగంలో భారీ మార్పులు: నడ్డా

ప్రధానమంత్రి నరేంద్ర మోడీ నాయకత్వంలో గత 12 ఏళ్ల కాలంలో దేశ ఆరోగ్య రంగం ఎన్నడూ లేనంతగా అభివృద్ధి చెందిందని కేంద్ర ఆరోగ్య, కుటుంబ సంక్షేమ శాఖ మంత్రి జేపీ నడ్డా పేర్కొన్నారు. కొత్త ఎయిమ్స్ సంస్థల ఏర్పాటు, ప్రాథమిక నుంచి అత్యున్నత స్థాయి వైద్య సేవల విస్తరణ, ఆరోగ్య మౌలిక సదుపాయాల బలోపేతం ద్వారా దేశ వైద్య రంగం సుదీర్ఘ ముందడుగు వేసిందని ఆయన తెలిపారు. గురువారం యాదాద్రి భువనగిరి జిల్లా బీబీనగర్ ఎయిమ్స్‌లో అధికారులతో సమీక్ష నిర్వహించిన అనంతరం మీడియాతో మాట్లాడిన నడ్డా, బీబీనగర్ ఎయిమ్స్ నిర్మాణం 2026 డిసెంబర్ నాటికి పూర్తిస్థాయిలో ముగుస్తుందని ప్రకటించారు.

20వ శతాబ్దం వరకు ఒకే ఎయిమ్స్.. ఇప్పుడు 23

దేశంలో 20వ శతాబ్దం ముగిసే వరకు కేవలం ఢిల్లీలోని ఒకే ఒక్క ఎయిమ్స్ మాత్రమే ఉండేదని నడ్డా గుర్తు చేశారు. అనంతరం 2003లో మాజీ ప్రధాని అటల్ బిహారీ వాజ్‌పేయి ప్రభుత్వ హయాంలో మరో ఆరు ఎయిమ్స్ సంస్థలు ఏర్పాటు చేశారని చెప్పారు. అయితే 2004 నుంచి 2014 వరకు యూపీఏ పాలనలో కేవలం ఒక ఎయిమ్స్ మాత్రమే ఏర్పాటైందని పేర్కొన్నారు.

2014లో ప్రధాని నరేంద్ర మోడీ నాయకత్వంలో కేంద్రంలో ఎన్‌డీఏ ప్రభుత్వం అధికారంలోకి వచ్చిన తర్వాత తృతీయ స్థాయి వైద్య సేవలపై ప్రత్యేక దృష్టి సారించిందని ఆయన తెలిపారు. ఈ కాలంలో దేశవ్యాప్తంగా 19 కొత్త ఎయిమ్స్ సంస్థలకు ఆమోదం లభించిందని, ప్రస్తుతం దేశంలో మొత్తం 23 ఎయిమ్స్ సంస్థలు ఉండగా వాటిలో 18 ఇప్పటికే పూర్తిస్థాయిలో సేవలు అందిస్తున్నాయని, మిగిలినవి నిర్మాణ దశలో ఉన్నాయని వెల్లడించారు.

ప్రాథమికం నుంచి అత్యాధునిక వైద్యం వరకు విస్తరణ

ఎన్‌డీఏ ప్రభుత్వం కేవలం ఎయిమ్స్‌ల నిర్మాణానికే పరిమితం కాలేదని, ప్రాథమిక, ద్వితీయ, తృతీయ స్థాయి ఆరోగ్య సేవలను సమగ్రంగా బలోపేతం చేసిందని నడ్డా తెలిపారు. దేశవ్యాప్తంగా 1.85 లక్షల ఆయుష్మాన్ భారత్ ఆరోగ్య మందిరాలు ఏర్పాటు చేసి గ్రామీణ ప్రాంతాల వరకు నాణ్యమైన వైద్య సేవలను చేరవేసినట్లు చెప్పారు. ప్రజలకు సమీపంలోనే ప్రాథమిక వైద్య సేవలు అందించడం ద్వారా ఆరోగ్య రంగంలో కీలక మార్పులు తీసుకొచ్చామని వివరించారు.

నాలుగేళ్లలోనే బీబీనగర్ ఎయిమ్స్ కార్యాచరణ

బీబీనగర్ ఎయిమ్స్‌కు 2022 జూన్‌లో కేంద్ర ప్రభుత్వం ఆమోదం తెలిపిందని, కేవలం నాలుగేళ్ల వ్యవధిలోనే ఆసుపత్రిని పూర్తిస్థాయిలో కార్యాచరణలోకి తీసుకువచ్చామని కేంద్ర మంత్రి తెలిపారు. ప్రస్తుతం అన్ని ప్రధాన వైద్య విభాగాల్లో ఓపీ సేవలు అందుబాటులో ఉన్నాయని, ప్రతిరోజూ సుమారు 1,800 మంది రోగులు చికిత్స కోసం వస్తున్నారని చెప్పారు.

ఇన్‌పేషెంట్ సేవలు కూడా ప్రారంభమయ్యాయని, టెలీమెడిసిన్ ద్వారా ఇప్పటివరకు 1.56 లక్షల మందికి పైగా వైద్య సేవలు అందించినట్లు వెల్లడించారు. దీంతో దూర ప్రాంతాల ప్రజలకు కూడా నిపుణుల వైద్య సలహాలు అందుబాటులోకి వచ్చాయని పేర్కొన్నారు.

పరిశోధనలకు రూ.64 కోట్ల గ్రాంట్లు

బీబీనగర్ ఎయిమ్స్‌లో వైద్య సేవలతో పాటు పరిశోధనలకు కూడా సమాన ప్రాధాన్యం ఇస్తున్నామని నడ్డా చెప్పారు. ఇప్పటివరకు రూ.64 కోట్ల పరిశోధనా గ్రాంట్లు మంజూరయ్యాయని, దీంతో ఈ సంస్థ పూర్తి స్థాయి రోగుల చికిత్సా కేంద్రంగా మాత్రమే కాకుండా ఆధునిక వైద్య పరిశోధనలకు కేంద్రంగా కూడా ఎదిగిందని వివరించారు.

వైద్య విద్య, వైద్య పరిశోధనలు, సాంకేతిక ఆధారిత వైద్య సేవల విస్తరణలో బీబీనగర్ ఎయిమ్స్ కీలక పాత్ర పోషిస్తోందని ఆయన అభిప్రాయపడ్డారు.

దేశంలోనే తొలి ఎయిమ్స్ కమ్యూనిటీ రేడియో

కమ్యూనిటీ మెడిసిన్ రంగంలో బీబీనగర్ ఎయిమ్స్ చేస్తున్న కృషిని జేపీ నడ్డా ప్రత్యేకంగా అభినందించారు. దేశంలోనే ఎయిమ్స్ ఆధ్వర్యంలో ప్రారంభమైన తొలి కమ్యూనిటీ రేడియో కేంద్రం బీబీనగర్ ఎయిమ్స్‌లోనే ప్రారంభమైందని ఆయన తెలిపారు. ప్రజల్లో ఆరోగ్య అవగాహన పెంపొందించేందుకు ఈ రేడియో కేంద్రం సమర్థవంతంగా పనిచేస్తోందని చెప్పారు.

భవిష్యత్తులో బీబీనగర్ ఎయిమ్స్ దక్షిణ భారత రాష్ట్రాల్లో వైద్య సేవలు, వైద్య విద్య, పరిశోధనల పరంగా అగ్రగామి సంస్థగా ఎదుగుతుందని జేపీ నడ్డా విశ్వాసం వ్యక్తం చేశారు. కేంద్ర ప్రభుత్వం ఈ సంస్థ అభివృద్ధికి అవసరమైన అన్ని విధాల సహకారం అందిస్తుందని స్పష్టం చేశారు.