ప్రకాశ్రాజ్కు బెంగళూరు కోర్టు సమన్లు.. హర్షం వ్యక్తం చేసిన ఎన్వీ సుభాష్
ప్రముఖ నటుడు ప్రకాష్ రాజ్కు బెంగళూరు కోర్టు సమన్లు జారీ చేయడం పట్ల బీజేపీ తెలంగాణ రాష్ట్ర ప్రధాన అధికార ప్రతినిధి, మీడియా ఇన్చార్జ్ ఎన్వీ సుభాష్ సోమవారం హర్షం వ్యక్తం చేశారు. వివిధ వ్యక్తులు, వ్యవస్థలు హిందూ దేవతలకు వ్యతిరేకంగా ప్రకాష్ రాజ్ చేస్తున్న "బాధ్యతారాహిత్య వ్యాఖ్యలను" న్యాయవ్యవస్థ చివరకు పరిగణనలోకి తీసుకుందని ఆయన ఒక ప్రకటనలో పేర్కొన్నారు.
ప్రజలచే ఎన్నికైన ప్రధానమంత్రి నరేంద్ర మోడీ, బీజేపీపై ఇలాంటి వారు చేసే నిరాధారమైన ఆరోపణలను కేవలం న్యాయవ్యవస్థ మాత్రమే అడ్డుకోగలదని సుభాష్ అభిప్రాయపడ్డారు. కొందరు లెఫ్ట్ (వామపక్ష) భావజాలం ఉన్నవారు హిందూ దేవతలను కించపరచడాన్ని ఒక అలవాటుగా మార్చుకున్నారని, సమాజంలో మతపరమైన ఉద్రిక్తతలను, శాంతిభద్రతల సమస్యలను సృష్టించేలా మాట్లాడే బహిరంగ వ్యక్తుల పట్ల కోర్టులు కఠినంగా వ్యవహరించాలని డిమాండ్ చేశారు. కోర్టు పదే పదే సమన్లు జారీ చేసినప్పటికీ ప్రకాష్ రాజ్ మెజిస్ట్రేట్ ముందు హాజరుకాకపోవడంతో, బెంగళూరు కోర్టు ఆయనపై నాన్-బెయిలబుల్ వారెంట్ జారీ చేసిందని, ఇది సరైన చర్యేనని ఎన్వీ సుభాష్ పేర్కొన్నారు.
ప్రకాశ్ రాజ్ కర్ణాటక, ఆంధ్రప్రదేశ్, తెలంగాణ, తమిళనాడు రాష్ట్రాల్లో ఒకే పేరుతో బహుళ ఓటరు గుర్తింపు కార్డులు పొందినట్లు ఆరోపణలు ఉన్నాయని, అవి రుజువైతే ఎన్నికల చట్టాల ఉల్లంఘనగా పరిగణించబడతాయని తెలిపారు. అదనంగా, హిందూ దేవతలపై అభ్యంతరకర వ్యాఖ్యలు చేశారనే ఆరోపణలపై తిరుపతి కోర్టులో బీజేపీ నేత దాఖలు చేసిన మరో క్రిమినల్ ఫిర్యాదు కూడా ప్రకాశ్ రాజ్పై పెండింగ్లో ఉందని సుభాష్ గుర్తు చేశారు.
చట్టం ముందు సెలబ్రిటీలైనా, సామాన్య పౌరులైనా అందరూ సమానమేనని సుభాష్ స్పష్టం చేశారు. కోర్టు సమన్లను ధిక్కరించినందుకు ఒక సామాన్యుడికి ఎలాంటి చట్టపరమైన పరిణామాలు ఎదురవుతాయో.. ప్రకాష్ రాజ్కు కూడా అవే వర్తించాలని అన్నారు. సిద్ధాంతాలతో సంబంధం లేకుండా రాజకీయ పార్టీలన్నీ ఇలాంటి బాధ్యతారాహిత్య ప్రవర్తనను ఖండించాలని, చట్టానికి ఎవరూ చుట్టం కాదనే విషయాన్ని పునరుద్ఘాటించాలని ఆయన పిలుపునిచ్చారు.