వనపర్తిలో విద్యార్థినులకు 500 సైకిళ్లు పంపిణీ చేసిన బ్యాంక్ ఆఫ్ ఇండియా

ప్రభుత్వ రంగ సంస్థ బ్యాంక్ ఆఫ్ ఇండియా తన కార్పొరేట్ సోషల్ రెస్పాన్సిబిలిటీ (సీఎస్ఆర్)లో భాగంగా వనపర్తి జిల్లాలోని పీఎం శ్రీ జిల్లా పరిషత్ బాలికల ఉన్నత పాఠశాలకు చెందిన 500 మంది (బాలికలు) విద్యార్థినులకు సైకిళ్లను పంపిణీ చేసింది. శుక్రవారం బ్యాంక్ విడుదల చేసిన ప్రకటన ప్రకారం, ఈ సైకిళ్లు విద్యార్థినుల ప్రయాణ సౌకర్యాన్ని మెరుగుపరచడమే కాకుండా, వారిని ఉన్నత విద్య దిశగా ప్రోత్సహించేందుకు తోడ్పడతాయి.

గురువారం జరిగిన ఈ కార్యక్రమంలో నాగర్‌కర్నూల్ ఎంపీ మల్లు రవి, వనపర్తి ఎమ్మెల్యే తూడి మేఘారెడ్డి, జిల్లా కలెక్టర్ ఆదర్శ్ సురభి, బ్యాంక్ ఆఫ్ ఇండియా జనరల్ మేనేజర్ మనోజ్ శ్రీవాస్తవ పాల్గొన్నారు. మారుమూల ప్రాంతాల నుంచి పాఠశాలకు వచ్చే బాలికలకు ఈ సైకిళ్లు ఎంతో ఊరటనిస్తాయని అతిథులు పేర్కొన్నారు. బ్యాంక్ ఆఫ్ ఇండియా చేపట్టిన ఈ చొరవ విద్యార్థినుల డ్రాపౌట్ రేటును తగ్గించడానికి, వారి విద్యా సాధికారతకు దోహదపడుతుందని జిల్లా యంత్రాంగం అభినందించింది.