అమరావతిలో తనపై దాడి.. ఆధారాలు ఇచ్చినా చర్యలు లేవు: ఎమ్మెల్సీ అరుణ్కుమార్
అమరావతి రాజధాని ప్రాంతమైన ఉండవల్లి సమీపంలో జూన్ 27న తనపై జరిగిన దాడికి సంబంధించి వైయస్సార్ కాంగ్రెస్ పార్టీ ఎమ్మెల్సీ మొండితోక అరుణ్ కుమార్ తాడేపల్లి పోలీస్ స్టేషన్లో లిఖితపూర్వక ఫిర్యాదు చేశారు. దాడికి సంబంధించిన వీడియో ఆధారాలను సమర్పించినప్పటికీ, నిందితులపై చర్యలు తీసుకోకుండా బాధితులనే ప్రశ్నిస్తున్న తాడేపల్లి సర్కిల్ ఇన్స్పెక్టర్ (సీఐ) తీరును ఆయన తీవ్రంగా తప్పుపట్టారు. దాడికి పాల్పడిన వారిని తక్షణమే అరెస్ట్ చేయాలని ఆయన డిమాండ్ చేశారు.
ఫిర్యాదు చేసిన అనంతరం అరుణ్ కుమార్ మీడియాతో మాట్లాడుతూ.. రాజధాని ప్రాంత రైతుల ఆహ్వానం మేరకే తాము వారిని కలవడానికి వెళ్లామన్నారు. తమ బృందంపై టీడీపీ నాయకులు, మద్దతుదారులు వ్యవస్థీకృతంగా దాడి చేశారని, తన వాహనంపై రాళ్లు రువ్వి, భౌతికంగా గాయపరచడానికి ప్రయత్నించారని ఆరోపించారు. దీనికి సంబంధించిన వీడియోలు, ఫోటోలు ఉన్నప్పటికీ పోలీసులు ఫిర్యాదు తీసుకోవడంలో తీవ్ర నిర్లక్ష్యం ప్రదర్శించారని మండిపడ్డారు.
మాపై దాడి చేసింది స్థానిక రైతులు కాదు, పక్కా ప్రణాళికతో వచ్చిన టీడీపీ నాయకులే. టీడీపీ యువజన నాయకుడు రాయపాటి కిరణ్ నా కారుపై రాళ్లు రువ్వగా, టీడీపీ మండలాధ్యక్షుడు దాసరి కృష్ణ నాపై భౌతిక దాడికి పాల్పడ్డారు. వైయస్సార్సీపీ ఎప్పుడూ అమరావతికి వ్యతిరేకం కాదు, కేవలం రాజధాని ప్రాజెక్టులో జరిగిన అవినీతిని మాత్రమే మేము వ్యతిరేకిస్తున్నామని అరుణ్ కుమార్ పేర్కొన్నారు. ఈ ఘటనపై అసెంబ్లీ ప్రివిలేజెస్ కమిటీ, మానవ హక్కుల కమిషన్, ఎస్సీ కమిషన్ను ఆశ్రయిస్తామని ఆయన స్పష్టం చేశారు. ఒకవేళ పోలీసులు కేసు నమోదు చేసి నిందితులను అరెస్ట్ చేయకపోతే, కోర్టు ద్వారా ప్రైవేట్ కేసు దాఖలు చేసి న్యాయపోరాటం చేస్తామని హెచ్చరించారు.
రాష్ట్రవ్యాప్తంగా వైయస్సార్సీపీ నిరసనలు
అమరావతి పరిధిలోని పెనుమాక, ఉండవల్లి ప్రాంతాల్లో వైయస్సార్సీపీ ఎమ్మెల్సీలు, మాజీ మంత్రులు, నేతలపై జరిగిన దాడులను నిరసిస్తూ ఆంధ్రప్రదేశ్ వ్యాప్తంగా ఆ పార్టీ శ్రేణులు భారీ ఎత్తున నిరసనలు చేపట్టాయి. దాడికి గురైన వారి వాహనాలు ధ్వంసమవడమే కాకుండా, తిరిగి బాధితులపైనే కేసులు పెట్టడాన్ని వివిధ జిల్లాల నేతలు తీవ్రంగా ఖండించారు. కూటమి ప్రభుత్వం ప్రజాస్వామ్య హక్కులను రక్షించాల్సింది పోయి, రాజకీయ హింసను ప్రోత్సహిస్తోందని ఆరోపించారు.
అమరావతి అనేది ప్రజలందరిదా లేక కేవలం టీడీపీకి మాత్రమే సొంతమా అని ఆలూరు ఎమ్మెల్యే బుసినే విరూపాక్షి ప్రశ్నించారు. రాష్ట్రంలో ప్రజాస్వామ్యం ప్రమాదంలో పడిందని, బెదిరింపుల ద్వారా ప్రతిపక్షాల గొంతు నొక్కేస్తున్నారని విమర్శించారు. దాడులు, బెదిరింపులు, అక్రమ కేసులకు భయపడేది లేదని, రైతుల పక్షాన వైయస్సార్సీపీ పోరాటం కొనసాగుతుందని పార్టీ నేతలు స్పష్టం చేశారు.