20 లక్షల ఇండ్లు కట్టి చూపిస్తేనే ఓట్లు అడగండి: మంత్రి పొంగులేటికి కేటీఆర్ సవాల్
తెలంగాణలో ఇందిరమ్మ ఇండ్ల నిర్మాణంపై రాష్ట్ర రెవెన్యూ, గృహనిర్మాణ శాఖ మంత్రి పొంగులేటి శ్రీనివాస్ రెడ్డి చేసిన వ్యాఖ్యలపై బీఆర్ఎస్ వర్కింగ్ ప్రెసిడెంట్ కేటీఆర్ ఘాటుగా స్పందించారు. కాంగ్రెస్ ప్రభుత్వం ఎన్నికల మేనిఫెస్టోలో హామీ ఇచ్చినట్లుగా.. ముందు 20 లక్షల ఇందిరమ్మ ఇండ్లను నిర్మించి చూపించాలని, ఆ తర్వాతే ప్రజలను ఓట్లు అడగాలని ఆయన సవాల్ విసిరారు.
20 లక్షల ఇండ్లు కట్టించిన తర్వాతే ఓట్లు అడుగుతామన్న మంత్రి పొంగులేటి పాత ప్రకటనను గుర్తుచేసిన కేటీఆర్ ఆ మాటకు కట్టుబడే ధైర్యం, చిత్తశుద్ధి మంత్రికి ఉందా? అని ప్రశ్నించారు. పెద్ద పెద్ద సవాళ్లు విసిరి, ఆ తర్వాత బాధ్యత నుంచి తప్పించుకోవడం కాంగ్రెస్ నాయకులకు అలవాటుగా మారిందని విమర్శించారు. కాంగ్రెస్ ప్రభుత్వానికి నిజంగానే విశ్వసనీయత ఉంటే, మేనిఫెస్టోలోని ప్రతి ఒక్క హామీని అమలు చేస్తామని బహిరంగంగా ప్రమాణం చేయాలని డిమాండ్ చేశారు.
గత బీఆర్ఎస్ ప్రభుత్వం పేదల ఆత్మగౌరవాన్ని పెంచేలా నాణ్యమైన డబుల్ బెడ్రూమ్ ఇళ్లను నిర్మించి, దేశానికే ఒక మోడల్గా నిలిపిందని కేటీఆర్ గుర్తుచేశారు. కాంగ్రెస్ ప్రతిపాదిస్తున్న చిన్నపాటి "అగ్గిపెట్టె ఇండ్ల" లాంటివి తాము కట్టలేదన్నారు. కేవలం హైదరాబాద్లోనే బీఆర్ఎస్ ప్రభుత్వం దాదాపు లక్ష డబుల్ బెడ్రూమ్ ఇళ్లను నిర్మించిందని తెలిపారు. గత ప్రభుత్వం కట్టిన ఒక్కో డబుల్ బెడ్రూమ్ ఇల్లు.. కాంగ్రెస్ చెబుతున్న ఏడు ఇందిరమ్మ ఇండ్లతో సమానమైన నాణ్యత, వైశాల్యం కలిగి ఉందని కేటీఆర్ స్పష్టం చేశారు. ప్రభుత్వానికి చేతగానితనం ఉంటే కేవలం పాత ప్రభుత్వంపై ఆరోపణలు చేయడం మాని, హైదరాబాద్లో అంతకంటే మెరుగైన ఉచిత గృహనిర్మాణ ప్రాజెక్టులను కట్టి చూపించాలని సవాల్ విసిరారు.
ఇండ్ల కూల్చివేతలపై ‘శ్వేతపత్రం’ డిమాండ్
తమ ప్రభుత్వం ఇటుక ఇటుక పేర్చి పేదలకు ఇండ్లు కడితే, కాంగ్రెస్ ప్రభుత్వం అధికారంలోకి వచ్చాక సాధారణ ప్రజల ఇండ్లపైకి బుల్డోజర్లు పంపిస్తోందని కేటీఆర్ మండిపడ్డారు. ప్రతి వారాంతంలో పేదల ఇండ్లను కూలుస్తూ ప్రభుత్వం ఆనందం పొందుతోందని ధ్వజమెత్తారు. ఈ నేపథ్యంలో గత రెండున్నరేళ్లలో హైదరాబాద్లో ఎన్ని ఇండ్లు కట్టారు? ఎంతమంది ఇండ్లను కూల్చివేశారు? అనే అంశాలపై ప్రభుత్వం తక్షణమే ఒక శ్వేతపత్రాన్ని విడుదల చేయాలని కేటీఆర్ డిమాండ్ చేశారు.
రాజకీయ మనుగడ కోసం, కేసుల నుంచి తప్పించుకోవడానికి డిల్లీలోని లగ్జరీ హోటళ్లలో అక్కడి నాయకుల కాళ్లపై పడే చరిత్ర బీఆర్ఎస్కు లేదన్నారు. తాము కేవలం తెలంగాణ ఆత్మగౌరవం కోసమే పనిచేస్తామని ఆయన చెప్పారు. కాంగ్రెస్ నాయకత్వం అవినీతి, భూ బ్లేక్మెయిలింగ్, రెవెన్యూ వ్యవస్థ దుర్వినియోగం, సాధారణ ప్రజలను బెదిరించే చర్యలకు పాల్పడుతోందని ఆరోపించారు. తమ కుటుంబ సంస్థలకు పెద్ద పెద్ద కాంట్రాక్టులు ఇప్పించుకుంటూ, అక్రమ క్రషర్లు నడుపుతూ వ్యవస్థలను దోచుకుంటున్నారని మండిపడ్డారు. బలహీన, వెనుకబడిన వర్గాల (బీసీ, ఎస్సీ) నాయకులను కాంగ్రెస్ అవమానిస్తోందని విమర్శించారు. కాంగ్రెస్ ఇచ్చిన ‘420 ఎన్నికల హామీల మోసాన్ని’, 6 గ్యారెంటీలు, 13 డిక్లరేషన్ల వైఫల్యాలను బీఆర్ఎస్ నిరంతరం ఎండగడుతూనే ఉంటుందని కేటీఆర్ స్పష్టం చేశారు.