సంగారెడ్డిలో పోలీస్ వాహనం ఢీకొని ఏఎస్ఐ మృతి

తెలంగాణలోని సంగారెడ్డి జిల్లాలో విషాదకర ఘటన చోటుచేసుకుంది. విధి నిర్వహణలో ఉన్న ఓ అసిస్టెంట్ సబ్ ఇన్‌స్పెక్టర్ (ఏఎస్‌ఐ), పోలీస్ వాహనం ఢీకొనడంతో మృతి చెందారు. అయితే, ఇది ప్రమాదం కాదని, డ్రైవర్ ఉద్దేశపూర్వకంగా హతమార్చాడని మృతుడి కుటుంబ సభ్యులు ఆరోపిస్తుండటం సంచలనంగా మారింది.

పోలీసులు తెలిపిన వివరాల ప్రకారం, మనూర్ పోలీస్ స్టేషన్‌లో పనిచేస్తున్న 58 ఏళ్ల ఏఎస్ఐ, సోమవారం రాత్రి ఒక కానిస్టేబుల్, హోంగార్డు డ్రైవర్‌తో కలిసి నైట్ పెట్రోలింగ్‌కు వెళ్లారు. రాత్రి 10:15 గంటల సమయంలో 'పాయింట్ బుక్ చెకింగ్' నిర్వహిస్తుండగా, హోంగార్డు నిర్లక్ష్యంగా వాహనాన్ని నడుపుతూ ఏఎస్ఐని ఢీకొట్టినట్లు పోలీసులు తెలిపారు. ఘటన అనంతరం గాయపడిన ఏఎస్‌ఐను వెంటనే ఆసుపత్రికి తరలించినప్పటికీ, అప్పటికే ఆయన మృతి చెందినట్లు వైద్యులు ధృవీకరించారు. డ్రైవర్ ఉద్దేశపూర్వకంగానే ఈ పని చేశారని బాధితుడి కుటుంబం ఆరోపిస్తోంది.

ఈ ఘటన తర్వాత హోంగార్డు డ్రైవర్ పరారీలో ఉన్నట్లు అధికారులు తెలిపారు. అతనిపై భారతీయ న్యాయ సంహిత ( బీఎన్ఎస్) కింద పోలీసులు కేసు నమోదు చేశారు. ఇది ప్రమాదమా లేక ఉద్దేశపూర్వక హత్యా అనే కోణంలో లోతైన విచారణ జరుపుతున్నామని ఉన్నతాధికారులు వెల్లడించారు.