ఏపీకి విదేశీ పెట్టుబడులే లక్ష్యం.. బుసాన్లో ‘ఏపెక్స్ కొరియా’ కేంద్రాన్ని ప్రారంభించిన లోకేష్
దక్షిణ కొరియా పర్యటనలో ఆంధ్రప్రదేశ్కు భారీ పెట్టుబడులు తీసుకురావడంపై రాష్ట్ర ఐటీ, విద్యాశాఖ మంత్రి నారా లోకేష్ ప్రత్యేక దృష్టి సారించారు. అంతర్జాతీయ పెట్టుబడిదారులతో వరుస సమావేశాలు నిర్వహిస్తూ, రాష్ట్రాన్ని గ్లోబల్ తయారీ, సాంకేతిక, సముద్ర పరిశ్రమల కేంద్రంగా తీర్చిదిద్దే లక్ష్యంతో పలు కీలక ప్రతిపాదనలు చేశారు. ముఖ్యంగా దక్షిణ కొరియాకు చెందిన ప్రముఖ ఆర్థిక సంస్థ బీఎన్కే ఫైనాన్షియల్ గ్రూప్, బీఎన్కే క్యాపిటల్, హ్వాసెంగ్ గ్రూప్, బూ యంగ్ గ్రూప్, కొరియా మెరైన్ ఎక్విప్మెంట్ అసోసియేషన్ (కోమియా) ప్రతినిధులతో సమావేశమై ఆంధ్రప్రదేశ్లో పెట్టుబడుల అవకాశాలను వివరించారు.
స్టార్టప్లకు బీఎన్కే మెంటరింగ్ కోరిన లోకేష్
దక్షిణ కొరియాలోని ప్రముఖ ఆర్థిక సంస్థ బీఎన్కే ఫైనాన్షియల్ గ్రూప్, బీఎన్కే క్యాపిటల్ ప్రతినిధులతో జరిగిన సమావేశంలో మంత్రి లోకేష్ ఆంధ్రప్రదేశ్లోని స్టార్టప్లు, సూక్ష్మ, చిన్న, మధ్యతరహా పరిశ్రమలకు (ఎస్ఎంఈలు) ప్రత్యేక సహకారం అందించాలని కోరారు. పెట్టుబడులు, నిధుల నిర్వహణ, వ్యాపార సలహాలు, వెంచర్ క్యాపిటల్ సేవల్లో బీఎన్కేకు ఉన్న అనుభవాన్ని రాష్ట్రంలోని యువ పారిశ్రామికవేత్తలకు అందించాలని ఆహ్వానించారు.
రాష్ట్రంలో స్టార్టప్లకు అంతర్జాతీయ స్థాయి మెంటరింగ్ లభిస్తే కొత్త ఆవిష్కరణలు, ఉపాధి అవకాశాలు పెరుగుతాయని, విదేశీ పెట్టుబడులు కూడా మరింతగా ఆకర్షించవచ్చని లోకేష్ అభిప్రాయపడ్డారు.
అమరావతి రాజధాని నిర్మాణం, పారిశ్రామిక పార్కులు, విద్యుత్ మౌలిక సదుపాయాల అభివృద్ధి వంటి కీలక ప్రాజెక్టులకు అవసరమైన మౌలిక వసతుల నిధుల సమీకరణలో భాగస్వామ్యం కావాలని కూడా బీఎన్కే గ్రూప్ను లోకేష్ కోరారు. అలాగే ఎలక్ట్రానిక్స్, సెమీకండక్టర్లు, షిప్బిల్డింగ్, పునరుత్పాదక ఇంధన రంగాల్లో పనిచేస్తున్న తమ ఖాతాదారులను ఆంధ్రప్రదేశ్లో పెట్టుబడులు పెట్టేలా ప్రోత్సహించాలని విజ్ఞప్తి చేశారు. గ్రీన్ఫీల్డ్ రాజధాని అమరావతిలో బీఎన్కే ఫైనాన్షియల్ గ్రూప్ శాఖను ఏర్పాటు చేసి రాష్ట్ర దీర్ఘకాలిక అభివృద్ధిలో భాగస్వాములు కావాలని ఆహ్వానించారు.
బీఎన్కే గ్రూప్ బలమైన ఆర్థిక వ్యవస్థ
మంత్రి ప్రతిపాదనలకు స్పందించిన బీఎన్కే ఫైనాన్షియల్ గ్రూప్ మేనేజింగ్ డైరెక్టర్ లీ క్వాంగ్ జున్, బీఎన్కే క్యాపిటల్ సీఈఓ సన్ డే జిన్ తమ సంస్థ కార్యకలాపాలను వివరించారు. బీఎన్కే గ్రూప్ పరిధిలో బుసాన్ బ్యాంక్, క్యోంగ్నామ్ బ్యాంక్, బీఎన్కే సేవింగ్స్ బ్యాంక్తో పాటు సెక్యూరిటీస్, క్యాపిటల్, అసెట్ మేనేజ్మెంట్, క్రెడిట్ ఇన్ఫర్మేషన్, ఐటీ సిస్టమ్స్, వెంచర్ క్యాపిటల్ విభాగాలు పనిచేస్తున్నాయని తెలిపారు.
ఈ గ్రూప్కు దక్షిణ కొరియాలో 398 శాఖలు ఉండగా, భారత్, చైనా, ఆగ్నేయాసియా, మధ్య ఆసియా దేశాల్లో 75 విదేశీ కార్యాలయాలు ఉన్నాయి. దక్షిణ కొరియాలోని మూడు ప్రధాన ప్రాంతీయ ఆర్థిక హోల్డింగ్ సంస్థల్లో ఒకటైన ఈ సంస్థ సుమారు 101.9 బిలియన్ అమెరికన్ డాలర్లు (దాదాపు రూ.9.64 లక్షల కోట్లు) విలువైన ఆస్తులను నిర్వహిస్తోంది.
బుసాన్లో ‘ఏపెక్స్ కొరియా’ కేంద్రం ప్రారంభం
పర్యటనలో మరో కీలక ఘట్టంగా బుసాన్ నగరంలో ఏపెక్స్ కొరియా (ఆంధ్రప్రదేశ్ ఎక్స్టర్నల్ ఎంగేజ్మెంట్-కొరియా) కేంద్రాన్ని మంత్రి లోకేష్ ప్రారంభించారు. ఆంధ్రప్రదేశ్ ఆర్థికాభివృద్ధి బోర్డు (ఏపీఈడీబీ) ఆధ్వర్యంలో ఏర్పాటైన ఈ కేంద్రం రాష్ట్రానికి ఇదే తొలిసారి విదేశాల్లో ఏర్పాటు చేసిన శాశ్వత పెట్టుబడిదారుల సహాయ వేదిక.
ఈ కేంద్రం ద్వారా కొరియా సంస్థలు ఆంధ్రప్రదేశ్లో పెట్టుబడులు పెట్టేందుకు అవసరమైన సమాచారం, ప్రభుత్వ అనుమతులు, భూముల కేటాయింపు, పరిశ్రమల ఏర్పాటు, ప్రభుత్వ విభాగాలతో సమన్వయం వంటి సేవలు ఒకే చోట అందుబాటులో ఉంటాయి.
ఇప్పటికే రాష్ట్రంలో కార్యకలాపాలు నిర్వహిస్తున్న కొరియా కంపెనీలకు కూడా పెట్టుబడుల అనంతర సహాయక సేవలు (ఇన్వెస్టర్ ఆఫ్టర్కేర్) అందించనున్నట్లు మంత్రి తెలిపారు.
ఏపెక్స్ కొరియా ఏర్పాటు ద్వారా పెట్టుబడుల ప్రచారాన్ని కేవలం రోడ్షోలు, సమావేశాలకే పరిమితం చేయకుండా, విదేశాల్లో శాశ్వత వ్యవస్థను ఏర్పాటు చేసినట్లు లోకేష్ పేర్కొన్నారు. కొరియా పరిశ్రమలతో దీర్ఘకాలిక సంబంధాలు ఏర్పరచుకుని మరిన్ని పెట్టుబడులను ఆకర్షించడంలో ఇది కీలక పాత్ర పోషిస్తుందని తెలిపారు.
దుగరాజపట్నం షిప్బిల్డింగ్ క్లస్టర్పై దృష్టి
రూ.30 వేల కోట్ల అంచనా వ్యయంతో ప్రతిపాదించిన దుగరాజపట్నం షిప్బిల్డింగ్ క్లస్టర్లో పెట్టుబడులు పెట్టాలని మంత్రి కొరియా కంపెనీలను ఆహ్వానించారు.
కొరియా మెరైన్ ఎక్విప్మెంట్ అసోసియేషన్ నిర్వహించిన సముద్ర పరిశ్రమల పెట్టుబడుల సమావేశంలో పాల్గొన్న ఆయన, 1,053 కిలోమీటర్ల సముద్ర తీరం, వేగంగా అభివృద్ధి చెందుతున్న పోర్టులు, పారిశ్రామిక మౌలిక సదుపాయాల కారణంగా ఆంధ్రప్రదేశ్ భారతదేశంలో ప్రముఖ సముద్ర తయారీ కేంద్రంగా ఎదుగుతోందని వివరించారు.
అలాగే ఆంధ్రప్రదేశ్ మెరిటైమ్ బోర్డుతో కలిసి ప్రత్యేక కొరియా మెరైన్ ఎక్విప్మెంట్ డెస్క్, ఇండియా షిప్ టెక్నాలజీ సెంటర్, నైపుణ్యాభివృద్ధి కార్యక్రమాలు, సంయుక్త పరిశోధన, సాంకేతిక అభివృద్ధి కార్యక్రమాలు చేపట్టాలని కోమియాను ఆహ్వానించారు.
ఫుట్వేర్ రంగంలో భారీ అవకాశాలు
ప్రపంచ ప్రఖ్యాత ఫుట్వేర్ తయారీ సంస్థ హ్వాసెంగ్ గ్రూప్తో కూడా మంత్రి లోకేష్ సమావేశమయ్యారు. కుప్పంలో రూ.900 కోట్లతో ఏర్పాటు చేయనున్న నాన్-లెదర్ ఫుట్వేర్ తయారీ పరిశ్రమకు ధన్యవాదాలు తెలిపారు.
ఈ పెట్టుబడిని మరింత విస్తరించి, ఫుట్వేర్ విడిభాగాల తయారీ కేంద్రం, ముడి పదార్థాల పరిశ్రమలు, అత్యాధునిక అథ్లెటిక్ ఫుట్వేర్ పరిశోధన–అభివృద్ధి కేంద్రం, ఆసియా–పసిఫిక్ ఇన్నోవేషన్ సెంటర్ను కూడా రాష్ట్రంలో ఏర్పాటు చేయాలని ప్రతిపాదించారు.
హ్వాసెంగ్ కార్పొరేషన్ అనుబంధ సంస్థ సీఈఓ హియో సియోంగ్ రియోన్ మాట్లాడుతూ, కుప్పం పరిశ్రమలో ప్రతి ఏడాది రెండు కోట్ల జతల స్పోర్ట్స్ షూలను తయారు చేస్తామని తెలిపారు. మొదట అడిడాస్ వంటి ప్రపంచ ప్రఖ్యాత బ్రాండ్లకు ఎగుమతులు నిర్వహించి, అనంతరం దేశీయ మార్కెట్లోకి కూడా ప్రవేశిస్తామని వెల్లడించారు.
బూ యంగ్ గ్రూప్ ఆసక్తి
మరో ప్రముఖ సంస్థ బూ యంగ్ గ్రూప్ కూడా ఆంధ్రప్రదేశ్లో పాదరక్షలు, వాటి విడిభాగాల తయారీ పరిశ్రమలను ఏర్పాటు చేయడానికి ఆసక్తి వ్యక్తం చేసింది. ప్రస్తుతం రాష్ట్రంలో పెట్టుబడుల అవకాశాలను పరిశీలిస్తున్నట్లు సంస్థ ప్రతినిధులు మంత్రి లోకేష్కు తెలిపారు.
లోకేష్ తన పర్యటనలో భాగంగా కియా మోటార్స్ గ్లోబల్ ఆపరేషన్స్ ఎగ్జిక్యూటివ్ వైస్ ప్రెసిడెంట్ టే హన్ లీ, ఇతర ఉన్నతస్థాయి బృందంతో సియోల్ లో సమావేశం అయ్యారు. కియా మోటార్స్ ప్రత్యేకంగా డిజైన్ చేసిన పీబీవీ వాహనాలతో సహా ఇంటిగ్రేటెడ్ ఈవీ, హైబ్రిడ్ వాహనాల తయారీ కేంద్రాన్ని ఏర్పాటుచేసి, ఏపీలో తమ కార్యకలాపాలను మరింత విస్తరించాలని కోరారు. ప్రపంచ మార్కెట్లకు సేవలందించడానికి విశాఖపట్నం పోర్టు సమీపంలో ఒక సీకేడీ అసెంబ్లింగ్, ఎక్స్ పోర్ట్ సెంటర్ ను ఏర్పాటు చేయాలని ఈ సందర్భంగా విజ్ఞప్తి చేశారు.
మొత్తంగా, దక్షిణ కొరియా పర్యటనలో మంత్రి నారా లోకేష్ చేపట్టిన వరుస సమావేశాలు, ఏపెక్స్ కొరియా ఏర్పాటు, సముద్ర పరిశ్రమలు, ఫుట్వేర్, సెమీకండక్టర్లు, ఎలక్ట్రానిక్స్ వంటి కీలక రంగాల్లో పెట్టుబడుల కోసం చేసిన ప్రయత్నాలు రాష్ట్రానికి కొత్త అవకాశాలను తెరచేలా కనిపిస్తున్నాయి. విదేశీ పెట్టుబడులను ఆకర్షించడంతో పాటు, ప్రపంచ స్థాయి తయారీ, సాంకేతిక కేంద్రంగా ఆంధ్రప్రదేశ్ను తీర్చిదిద్దాలనే ప్రభుత్వ లక్ష్యానికి ఈ పర్యటన కీలకంగా మారనుందని అధికారులు భావిస్తున్నారు.