‘బెస్ట్ టూరిజం ప్రమోషన్ స్టేట్’గా ఏపీకి జాతీయ గుర్తింపు

ఆంధ్రప్రదేశ్ పర్యాటక రంగానికి జాతీయ స్థాయిలో అరుదైన గౌరవం దక్కింది. దక్షిణాదిలోనే అతిపెద్ద ట్రావెల్ అండ్ ట్రేడ్ ఎక్స్‌పో అయిన 'గ్లోబల్ ట్రావెల్ మార్కెట్స (జీటీఎం 2026) ఆంధ్రప్రదేశ్‌ను "బెస్ట్ టూరిజం ప్రమోషన్ స్టేట్" గా ఎంపిక చేసింది. ఈ నేపథ్యంలో కేరళలో జరగనున్న ‘జీటీఎం ఎక్స్ పో -2026’లో ప్రతిష్ఠాత్మక పురస్కారాన్ని అందుకోవడానికి రాష్ట్ర పర్యాటక, సినిమాటోగ్రఫీ శాఖ మంత్రి కందుల దుర్గేష్ మూడు రోజుల కేరళ పర్యటనకు బయలుదేరి వెళ్లారు.

మంత్రి కందుల దుర్గేష్ కేరళ పర్యటన షెడ్యూల్

జూన్ 3:

తిరువనంతపురంలోని కోవాలం ‘ఉదయ్ సముద్ర లీజర్ బీచ్ హోటల్ అండ్ స్పా’లో జరిగే జీటీఎం ఎక్స్ పో ప్రారంభోత్సవంలో మంత్రి పాల్గొంటారు.

జూన్ 4:

తిరువనంతపురం ‘గోల్డెన్ ప్యాలెస్ కన్వెన్షన్ సెంటర్’ లో జరిగే కార్యక్రమాలకు హాజరవుతారు. అదే రోజు సాయంత్రం 4 గంటలకు కోవాలంలోని ‘లీలా తిరువనంతపురం రావిజ్ హోటల్’ లో దేశవిదేశాల ప్రముఖుల సమక్షంలో 'మెట్రో ఎక్స్‌పెడిషన్ – జీటీఎం టూరిజం అవార్డు 2026' ను స్వీకరిస్తారు.

జూన్ 5:

తిరువనంతపురం నుంచి ముంబయి పర్యటనకు బయలుదేరుతారు.

ఈ అరుదైన పురస్కారం లభించడంపై మంత్రి కందుల దుర్గేష్ హర్షం వ్యక్తం చేశారు. ఇది ముఖ్యమంత్రి నారా చంద్రబాబునాయుడు, ఉప ముఖ్యమంత్రి పవన్ కళ్యాణ్ ల దార్శనికతకు, దిశానిర్దేశానికి దక్కిన గౌరవమని ఆయన అభివర్ణించారు. కేంద్ర ప్రభుత్వ సహకారంతో పర్యాటక శాఖ స్పెషల్ చీఫ్ సెక్రటరీ అజయ్ జైన్, ఎండీ ఆమ్రపాలి కాట, అధికారుల బృందం అంతర్జాతీయ స్థాయిలో చేసిన కృషి వల్లే ఈ విజయం సాధ్యమైందన్నారు.

కూటమి ప్రభుత్వం తీసుకొచ్చిన నూతన పర్యాటక పాలసీ 2024-29, టూరిజం రంగానికి పారిశ్రామిక హోదా కల్పించడం, ప్రతి జిల్లాలో పర్యాటక ఉత్సవాల నిర్వహణ, సృజనాత్మక డిజిటల్ ప్రమోషన్ల ద్వారా ‘బ్రాండ్ ఏపీ’ ముఖచిత్రం మారిపోయిందని మంత్రి వివరించారు. ఈ అవార్డు ఏపీ పర్యాటక వైభవ ప్రపంచ స్థాయి విజయాలకు ఒక ఘనమైన ఆరంభం మాత్రమేనని, ఈ ఎక్స్‌పో ద్వారా రాష్ట్రానికి మరిన్ని పెట్టుబడులు, పర్యాటకులు వచ్చే అవకాశం ఉందని మంత్రి దుర్గేష్ ఆశాభావం వ్యక్తం చేశారు.