ఎయిర్ ఇండియా ఏఐ-171 ప్రమాద దర్యాప్తు తుది దశలో: కేంద్ర మంత్రి రామ్మోహన్ నాయుడు
గతేడాది జరిగిన ఎయిర్ ఇండియా ఏఐ-171 విమాన ప్రమాదానికి సంబంధించిన విచారణ చివరి దశకు చేరుకుందని, ఈ దర్యాప్తు అత్యంత పారదర్శకంగా, నిష్పక్షపాతంగా, బాధ్యతాయుతంగా జరుగుతోందని కేంద్ర పౌర విమానయాన శాఖ మంత్రి రామ్మోహన్ నాయుడు బుధవారం స్పష్టం చేశారు. జార్ఖండ్ రాజధాని రాంచీలో మీడియా ప్రతినిధులతో మాట్లాడిన ఆయన, ప్రమాదానికి గురైన విమానం అంతర్జాతీయ సర్వీసు కావడం వల్ల ఈ విచారణకు అంతర్జాతీయ ప్రాధాన్యత ఉందన్నారు.
ఈ విమాన ప్రమాద దర్యాప్తు తుది దశకు వచ్చింది. ఇది అంతర్జాతీయ విమానం కావడంతో కేవలం భారతదేశానికి మాత్రమే పరిమితమైన అంశం కాదు. ఈ విచారణను ప్రపంచంలో ఎవరైనా పరిశీలించవచ్చు. అందుకే మేము దీనిని పూర్తిగా పారదర్శకంగా, న్యాయబద్ధంగా ఉంచాలనుకుంటున్నాము. అతి త్వరలోనే పూర్తి నివేదిక మాకు అందుతుందని నమ్ముతున్నాను అని మంత్రి తెలిపారు.
260 మంది ప్రాణాలు తీసిన ఘోర ప్రమాదం
గతేడాది జూన్ 12న అహ్మదాబాద్లోని సర్దార్ వల్లభాయ్ పటేల్ అంతర్జాతీయ విమానాశ్రయం నుంచి టేకాఫ్ అయిన కొద్దిసేపటికే ఎయిర్ ఇండియాకు చెందిన బోయింగ్ 787-8 (ఏఐ-171) విమానం ఘోర ప్రమాదానికి గురైంది. ఈ దుర్ఘటనలో 229 మంది ప్రయాణికులు, 12 మంది విమాన సిబ్బందితో పాటు భూమిపై ఉన్న మరో 19 మంది, మొత్తంగా 260 మంది ప్రాణాలు కోల్పోయారు.
రాంచీ ఎయిర్పోర్టులో ‘ఉడాన్ యాత్రీ కేఫే’ ప్రారంభం
విమానాశ్రయాలలో ప్రయాణికులకు తక్కువ ధరలకే నాణ్యమైన ఆహార, పానీయాల వసతులను కల్పించాలనే లక్ష్యంతో రాంచీ ఎయిర్పోర్టులో ‘ఉడాన్ యాత్రీ కేఫే’ ను ప్రారంభించనున్నట్లు కేంద్ర మంత్రి ప్రకటించారు. ప్రయాణికుల నుంచి వచ్చిన భారీ డిమాండ్ మేరకు దీనిని ఏర్పాటు చేసినట్లు చెప్పారు. దేశంలోని పలు విమానాశ్రయాలలో ఇప్పటికే ఈ కేఫేలను ప్రారంభించామని, ప్రజల నుంచి దీనికి అద్భుతమైన స్పందన లభిస్తోందని ఆయన పేర్కొన్నారు.
అలాగే రాంచీ నగరం ఎంతో అందమైనదని, తాను స్వయంగా బైక్పై ప్రయాణిస్తూ ఇక్కడి వాతావరణాన్ని దగ్గరగా చూశానని మంత్రి కొనియాడారు. ప్రస్తుతం పశ్చిమాసియా (మిడిల్ ఈస్ట్) లో నెలకొన్న ఉద్రిక్త పరిస్థితుల వల్ల ఏర్పడిన అంతర్జాతీయ సంక్షోభాన్ని దేశమంతా ఏకతాటిపైకి వచ్చి ఎలా ఎదుర్కోవాలనే దానిపై ఉమ్మడి ప్రయత్నాలు అవసరమని ఈ సందర్భంగా రామ్మోహన్ నాయుడు పిలుపునిచ్చారు.