ఆర్టీఈ కింద విద్యార్థుల అడ్మిషన్ తప్పనిసరి: సుప్రీంకోర్టు

సుప్రీంకోర్టు మంగళవారం కీలక తీర్పు వెలువరించింది. విద్యా హక్కు చట్టం (ఆర్టీఈ) కింద ప్రభుత్వం కేటాయించిన విద్యార్థులను పక్కపక్కనున్న పాఠశాలలు ఆలస్యం లేకుండా తప్పనిసరిగా చేర్చుకోవాలని స్పష్టం చేసింది. ప్రీ-ప్రైమరీ స్థాయిలో అడ్మిషన్లను జాతీయ మిషన్‌గా చూడాలని కోర్టు పేర్కొంది. న్యాయమూర్తులు పి.ఎస్. నరసింహ, అలోక్ అరాధేల ధర్మాసనం ఈ తీర్పు ఇచ్చింది. ఆర్టికల్ 21ఏ కింద హామీ ఇచ్చిన విద్య హక్కును అమలు చేయడంలో ఆలస్యం లేదా నిరాకరణ రాజ్యాంగ విరుద్ధమని స్పష్టం చేసింది. విద్యా హక్కు చట్టం 2009లోని సెక్షన్ 12 ప్రకారం, ప్రైవేట్ అన్‌ఎయిడెడ్ పాఠశాలలు తమ సీట్లలో 25 శాతం వరకు బలహీన వర్గాలు, వెనుకబడిన వర్గాల పిల్లలకు కేటాయించాల్సిన బాధ్యత ఉందని కోర్టు గుర్తు చేసింది. ఈ నిబంధన సమాజంలో సమానత్వాన్ని సాధించడంలో కీలక పాత్ర పోషిస్తుందని తెలిపింది.

లక్నోలోని లక్నో పబ్లిక్ స్కూల్ దాఖలు చేసిన అప్పీల్‌ను కోర్టు కొట్టివేసింది. 2024-25 విద్యాసంవత్సరానికి ఒక విద్యార్థిని ఆర్టీఈ కింద ఎంపిక చేసినప్పటికీ, అర్హతపై అనుమానం వ్యక్తం చేస్తూ పాఠశాల అడ్మిషన్ నిరాకరించింది. ఈ వ్యవహారంపై హైకోర్టు విద్యార్థి తరఫున తీర్పు ఇచ్చి, ప్రభుత్వ నిర్ణయాలపై ప్రైవేట్ పాఠశాలలు ప్రశ్నించే అధికారం లేదని పేర్కొంది. ఈ తీర్పును సుప్రీంకోర్టు సమర్థించింది. రాష్ట్ర ప్రభుత్వం పంపిన జాబితా ప్రకారం విద్యార్థులను చేర్చుకోవడం పాఠశాలలకు తప్పనిసరి అని స్పష్టం చేసింది. లేదంటే ఆర్టికల్ 21ఏ కింద ఉన్న విద్య హక్కు ‘ఖాళీ హామీ’గా మిగిలిపోతుందని కోర్టు వ్యాఖ్యానించింది. అలాగే, విద్యా హక్కు అమలులో ప్రభుత్వం, స్థానిక సంస్థలు, కోర్టులు సమన్వయంతో పనిచేయాలని సూచించింది. విద్యార్థులకు సులభంగా న్యాయం అందేలా చర్యలు తీసుకోవాలని కూడా ఆదేశించింది.