జపాన్‌లో 6.1 తీవ్రతతో భారీ భూకంపం

జపాన్‌లోని ఉత్తర ప్రాంతం సోమవారం తెల్లవారుజామున మరోసారి భూకంపంతో వణికిపోయింది. హోక్కైడో ప్రాంతంలో సంభవించిన ఈ భూకంప తీవ్రత రిక్టర్ స్కేలుపై 6.1గా నమోదైనట్లు జపాన్ వాతావరణ సంస్థ వెల్లడించింది. స్థానిక కాలమానం ప్రకారం సోమవారం తెల్లవారుజామున 5:24 గంటల సమయంలో ఒక్కసారిగా భూమి కంపించడంతో గాఢనిద్రలో ఉన్న ప్రజలు ఉలిక్కిపడ్డారు.

81 కిలోమీటర్ల లోతులో భూకంప కేంద్రం

యూఎస్ జియోలాజికల్ సర్వే నివేదిక ప్రకారం.. హోక్కైడోలోని సారబెత్సు పట్టణానికి పశ్చిమ దిశగా 18 కిలోమీటర్ల దూరంలో, భూ అంతర్భాగంలో సుమారు 81 కిలోమీటర్ల లోతులో ఈ భూకంపం కేంద్రీకృతమై ఉంది. జపాన్ ప్రమాణాల ప్రకారం మధ్య టోకాచి ప్రాంతంలో దీని తీవ్రత '5+'గా నమోదైంది. తీవ్రమైన ప్రకంపనలు వచ్చినప్పటికీ, ఇప్పటివరకు ఎలాంటి ప్రాణ, ఆస్తి నష్టాలు జరిగినట్లు నివేదికలు అందలేదు.

వారం వ్యవధిలో రెండోసారి వణికిన జపాన్

గత సోమవారమే (ఏప్రిల్ 20) జపాన్‌లో 7.5 తీవ్రతతో అత్యంత శక్తివంతమైన భూకంపం వచ్చింది. ఆ సమయంలో సముద్రపు అలలు ఎగిసిపడటంతో కుజీ నౌకాశ్రయం వద్ద 80 సెంటీమీటర్ల ఎత్తులో సునామీ కనిపించింది. తీర ప్రాంతాలకు దాదాపు 3 మీటర్ల ఎత్తు వరకు సునామీ వచ్చే ప్రమాదం ఉందని అప్పట్లో అధికారులు ప్రజలను అప్రమత్తం చేశారు. ఈ భయంకర పరిస్థితుల వల్ల టోక్యో నుంచి షిన్-అమోరీ వైపు వెళ్లే బుల్లెట్ రైళ్లను కూడా అధికారులు కొద్దిసేపు నిలిపివేసి, ప్రయాణికులను సురక్షిత ప్రాంతాలకు తరలించారు. అప్పట్లో తలెత్తిన ఆ ఆందోళన మరవకముందే, ఇప్పుడు మళ్లీ వారం తిరగకముందే మరో భారీ భూకంపం రావడం అక్కడి ప్రజలను కలవరపెడుతోంది.

అణు ప్లాంట్లు సురక్షితం

తాజా భూకంపం నేపథ్యంలో అధికారులు అణు విద్యుత్ కేంద్రాల భద్రతపై దృష్టి సారించారు. అమోరీలోని హిగాషిడోరి, మియాగీలోని ఒనాగావా, అలాగే ఫుకుషిమా దైచీ మరియు దైనీ ప్లాంట్లలో ఎలాంటి అసాధారణ పరిస్థితులు తలెత్తలేదని, అన్నీ సురక్షితంగా ఉన్నాయని నిర్వాహక సంస్థలు ప్రకటించాయి.

ప్రజలు సంయమనం పాటించాలి: ప్రధాని

భూకంపంపై స్పందించిన జపాన్ ప్రధాన మంత్రి సనే తకైచి, ప్రభావిత ప్రాంత ప్రజలు ఆందోళన చెందకుండా ప్రశాంతంగా ఉండాలని కోరారు. ప్రకంపనలు వచ్చిన వెంటనే అప్రమత్తమై సురక్షిత ప్రాంతాలకు లేదా ఎత్తైన ప్రదేశాలకు వెళ్లాలని సూచించారు. వారం రోజుల పాటు ఇలాంటి ప్రకంపనలు మరిన్ని వచ్చే అవకాశం ఉందని వాతావరణ సంస్థ హెచ్చరించింది.