400 డ్రోన్లతో ఉక్రెయిన్‌పై రష్యా భీకర దాడి

నాలుగేళ్లుగా కొనసాగుతున్న రష్యా-ఉక్రెయిన్ యుద్ధం మరోసారి అత్యంత భీకర స్థాయికి చేరుకుంది. మంగళవారం తెల్లవారుజామున రష్యా సైన్యం ఉక్రెయిన్‌పై భీకర దాడికి దిగింది. ఏకంగా 400 సుదూర లక్ష్యాలను ఛేదించే డ్రోన్లతో పాటు 23 క్రూయిజ్ మిస్సైళ్లు, 7 బాలిస్టిక్ క్షిపణులతో విరుచుకుపడింది. ఈ దాడుల్లో నలుగురు పౌరులు ప్రాణాలు కోల్పోగా, మరో 27 మంది తీవ్రంగా గాయపడ్డారు. దేశవ్యాప్తంగా కనీసం 10 ప్రధాన ప్రాంతాల్లో రష్యా క్షిపణులు విధ్వంసాన్ని సృష్టించాయి. ముఖ్యంగా రాజధాని కీవ్ నగరాన్ని లక్ష్యంగా చేసుకుని పగటిపూట కూడా డ్రోన్ దాడులు కొనసాగడం గమనార్హం.

'స్ప్రింగ్ అఫెన్సివ్' షురూ!

శీతాకాలం ముగిసి వాతావరణం అనుకూలించడంతో రష్యా తన 'స్ప్రింగ్ అఫెన్సివ్' మొదలుపెట్టినట్లు తెలుస్తోంది. గత నాలుగు రోజుల్లోనే రష్యా సేనలు 619 సార్లు దాడులకు తెగబడ్డాయని ఉక్రెయిన్ సాయుధ దళాల కమాండర్-ఇన్-చీఫ్ జనరల్ ఒలెక్సాండర్ సిర్స్కీ వెల్లడించారు. సుమారు 1,250 కిలోమీటర్ల పొడవైన సరిహద్దు రేఖ వెంబడి రష్యా తన భారీ యంత్ర సామాగ్రిని, అదనపు బలగాలను మోహరిస్తోందని అమెరికాకు చెందిన 'ఇన్‌స్టిట్యూట్ ఫర్ ది స్టడీ ఆఫ్ వార్' వెల్లడించింది. వ్యూహాత్మక ప్రాంతాల్లో రక్షణ కవచాలను ఛేదించేందుకు శతవిధాలా ప్రయత్నిస్తున్న శత్రువును అడ్డుకునేందుకు ఉక్రెయిన్ తన అదనపు బలగాలను రంగంలోకి దించింది.

ఉక్రెయిన్ కొత్త వ్యూహం

ప్రస్తుతం ప్రపంచ దేశాల దృష్టి ఇరాన్ యుద్ధం, మధ్యప్రాచ్యంపై మళ్లడంతో ఉక్రెయిన్ పరిస్థితి అగమ్యగోచరంగా మారింది. గత ఏడాది కాలంగా అమెరికా జరిపిన రాయబార చర్చలు విఫలమవ్వడమే కాకుండా, ఉక్రెయిన్ ప్రతిపాదించిన కాల్పుల విరమణను రష్యా తిరస్కరించింది. ఈ నేపథ్యంలో ఉక్రెయిన్ ఒక సరికొత్త ప్రతిపాదనను తెరపైకి తెచ్చింది. తమ వద్ద ఉన్న అత్యాధునిక 'డ్రోన్ డిఫెన్స్' సాంకేతికతను అమెరికా, గల్ఫ్ భాగస్వామ్య దేశాలకు అందించేందుకు సిద్ధమైంది. దీనికి బదులుగా రష్యా క్షిపణులను అడ్డుకోవడానికి తమకు అత్యవసరంగా కావాల్సిన 'పేట్రియాట్' వైమానిక రక్షణ వ్యవస్థలను కోరుతోంది.

ప్రతిదాడికి సిద్ధమైన కీవ్

రష్యా దాడులను ధీటుగా ఎదుర్కొంటున్న ఉక్రెయిన్, తన స్వదేశీ డ్రోన్లతో రష్యాలోని యుద్ధ సహకార కేంద్రాలపై విరుచుకుపడుతోంది. రష్యా గగనతలం, క్రిమియా, నల్ల సముద్రం మీదుగా వచ్చిన 55 ఉక్రెయిన్ డ్రోన్లను తమ వైమానిక దళం అడ్డుకుందని రష్యా రక్షణ శాఖ ప్రకటించింది. ప్రస్తుతం ఉక్రెయిన్ దేశంలో సుమారు 20 శాతం భూభాగం రష్యా ఆధీనంలో ఉంది. రెండు దేశాల మధ్య ఒక్క అడుగు భూమి కోసం కూడా భయంకరమైన యుద్ధం జరుగుతోంది. ఎక్కడా శాంతి చర్చల ఊసే లేకపోవడంతో రానున్న రోజుల్లో ఈ దాడులు మరింత తీవ్రమయ్యే అవకాశం ఉందని విశ్లేషకులు హెచ్చరిస్తున్నారు.