40 జపాన్ కంపెనీలపై చైనా ఆర్థిక ఆంక్షలు
జపాన్పై చైనా తన వైఖరిని మరింత కఠినతరం చేసింది. తైవాన్ అంశంపై జపాన్ ప్రధాని సనే తకైచి చేసిన వ్యాఖ్యలతో ఆగ్రహించిన చైనా, ఆ దేశానికి చెందిన 40 సంస్థలపై ఆంక్షలు విధించింది. ఇందులో భాగంగా 20 సంస్థలను ఎగుమతి నియంత్రణ జాబితాలో చేర్చగా, మరో 20 సంస్థలను నిఘా జాబితాలో ఉంచినట్లు చైనా వాణిజ్య మంత్రిత్వ శాఖ మంగళవారం ప్రకటించింది.
ఆంక్షల వెనుక అసలు కథ ఏంటి?
గత నవంబర్లో జపాన్ ప్రధాని సనే తకైచి చేసిన వ్యాఖ్యలు ఈ వివాదానికి ప్రధాన కారణం. ఒకవేళ చైనా తైవాన్పై దాడి చేస్తే, జపాన్ సైనిక జోక్యం చేసుకునే అవకాశం ఉందని ఆమె పరోక్షంగా వ్యాఖ్యానించారు. తైవాన్ను తమ భూభాగంలో భాగంగా భావించే చైనాకు, ఇతర దేశాల నుంచి వచ్చే ఇటువంటి ప్రకటనలు ఏమాత్రం రుచించవు. ఈ నెల ప్రారంభంలో జరిగిన ఎన్నికల్లో తకైచి పార్టీ ఘనవిజయం సాధించడంతో, ఆమె తన భద్రతా విధానాలను మరింత కఠినతరం చేసే దిశగా అడుగులు వేస్తున్నారు. దీనిని 'రీమిలిటరైజేషన్' (సైనిక సన్నద్ధత)గా భావించిన చైనా, కౌంటర్ అటాక్గా ఈ ఆంక్షలను తెరపైకి తెచ్చింది.
నిషేధిత జాబితాలో దిగ్గజ సంస్థలు
చైనా వాణిజ్య మంత్రిత్వ శాఖ పేర్కొన్న జాబితాలో జపాన్కు చెందిన పలు కీలక కంపెనీలు ఉన్నాయి. నిషేధిత జాబితా (20 సంస్థలు): ఇందులో మిత్సుబిషి హెవీ ఇండస్ట్రీస్ అనుబంధ సంస్థలు (నౌకానిర్మాణం, విమాన ఇంజిన్లు, సముద్ర యంత్రాల తయారీ), కవాసాకి హెవీ ఇండస్ట్రీస్, ఫుజిట్సు వంటి దిగ్గజ సంస్థలు ఉన్నాయి. వీటితో ఇకపై ఎటువంటి వ్యాపార సంబంధాలు ఉండకూడదని, వెంటనే అన్ని కార్యకలాపాలు నిలిపివేయాలని చైనా స్పష్టం చేసింది. నిఘా జాబితా (20 సంస్థలు): ఇందులో సుబారు కార్పొరేషన్, మిత్సుబిషి మెటీరియల్స్, ఇన్స్టిట్యూట్ ఆఫ్ సైన్స్ టోక్యో ఉన్నాయి. ఈ సంస్థలకు ఎగుమతులు చేయాలంటే, ప్రత్యేక లైసెన్సులతో పాటు, ఆ వస్తువులను జపాన్ సైన్యం ఉపయోగించబోదని లిఖితపూర్వక హామీని చైనా ఎగుమతిదారులు సమర్పించాల్సి ఉంటుంది.
'చట్టబద్ధమైన చర్యలే' అంటున్న చైనా
ఈ ఆంక్షలు జపాన్ అణు, సైనిక ఆశయాలను అదుపు చేసేందుకేనని చైనా వాణిజ్య మంత్రిత్వ శాఖ సమర్థించుకుంది. "ఇవి పూర్తిగా చట్టబద్ధమైన, సహేతుకమైన చర్యలు. ఇవి కేవలం కొన్ని సంస్థలకే పరిమితం. జపాన్తో జరుగుతున్న సాధారణ ఆర్థిక, వాణిజ్య కార్యకలాపాలకు వీటివల్ల ఎటువంటి ఆటంకం ఉండదు. చట్టబద్ధంగా నడుచుకునే వారికి ఎలాంటి ఇబ్బంది లేదు" అని ఆ శాఖ వివరణ ఇచ్చింది. ఏది ఏమైనా, ప్రపంచ ఆర్థిక వ్యవస్థలో కీలక పాత్ర పోషించే ఈ రెండు దేశాల మధ్య తలెత్తిన ఈ తాజా వివాదం, ఆసియా ప్రాంత భద్రతపై ప్రభావం చూపే అవకాశం ఉందని విశ్లేషకులు ఆందోళన వ్యక్తం చేస్తున్నారు.