24 వేల నకిలీ అకౌంట్లతో డేటా చోరీ.. చైనా సంస్థలపై ఆంత్రోపిక్ సంచలన ఆరోపణలు
కృత్రిమ మేధ (ఏఐ) సాంకేతికతలో ప్రపంచ అగ్రరాజ్యాల మధ్య పోటీ రోజురోజుకూ ముదురుతోంది. తాజాగా అమెరికాకు చెందిన ప్రముఖ ఏఐ సంస్థ 'ఆంత్రోపిక్' చేసిన ఆరోపణలు సాంకేతిక ప్రపంచంలో పెను సంచలనం సృష్టిస్తున్నాయి. చైనాకు చెందిన డీప్సీక్, మూన్షాట్ ఏఐ, మినీమాక్స్ సంస్థలు తమ 'క్లాడ్' మోడల్లోని అత్యున్నత స్థాయి మేధస్సును అక్రమంగా దొంగిలిస్తున్నాయని ఆంత్రోపిక్ ఆధారాలతో సహా బయటపెట్టింది.
అసలేం జరిగింది? వివాదం ఏమిటి?
సాధారణంగా ఒక ఏఐ మోడల్ను అభివృద్ధి చేయడానికి వందల కోట్ల డాలర్లు, వేల గంటల సమయం అవసరమవుతుంది. అయితే అమెరికన్ ఏఐ సామర్థ్యాలను అక్రమ మార్గంలో పొంది, తమ సొంత మోడళ్లను మెరుగుపరుచుకోవడానికి చైనా సంస్థలు ప్రయత్నించాయని ఆంత్రోపిక్ ఆరోపించింది. ఈ అక్రమ ప్రక్రియను 'ఇండస్ట్రియల్-స్కేల్ డిస్టిలేషన్'గా పేర్కొంది. అంటే క్లాడ్ ఇచ్చే ప్రతిస్పందనలను, విశ్లేషణలను నిరంతరం గమనిస్తూ, ఆ నమూనాలను దొంగిలించి తమ మోడళ్లకు శిక్షణ ఇవ్వడం. ఇలా సేకరించిన సమాచారాన్ని ఆ దేశాలు తమ సైనిక, గూఢచారి, నిఘా వ్యవస్థలను బలోపేతం చేయడానికి ఉపయోగించే ప్రమాదం ఉందని ఆంత్రోపిక్ తీవ్ర ఆందోళన వ్యక్తం చేసింది.
ఎలా జరిగింది?
ఈ మొత్తం ఉదంతాన్ని ఆంత్రోపిక్ విశ్లేషించిన తీరు దిగ్భ్రాంతిని కలిగిస్తోంది. చైనాకు చెందిన సదరు మూడు సంస్థలు ఏకంగా 24,000కు పైగా నకిలీ ఖాతాలను సృష్టించి, ఆంత్రోపిక్ సర్వర్లపై భారీగా ఒత్తిడిని పెంచాయి. ఈ ఖాతాల ద్వారా క్లాడ్ మోడల్తో 1.6 కోట్ల సంభాషణలు జరిపి, దాని కోడింగ్, లాజికల్ రీజనింగ్ వంటి కీలక సామర్థ్యాలను కాజేశాయి. ముఖ్యంగా మినీమాక్స్ 1.3 కోట్ల సంభాషణలతో అగ్రస్థానంలో ఉండగా, మూన్షాట్ ఏఐ 34 లక్షలు, డీప్సీక్ 1.5 లక్షల సంభాషణలతో ఈ ప్రక్రియలో భాగస్వాములయ్యాయి. ట్రాఫిక్ సరళిని నిశితంగా పరిశీలించిన ఆంత్రోపిక్, ఇవి యాదృచ్ఛికంగా జరిగినవి కావని, నిర్దిష్ట పరిశోధకుల పర్యవేక్షణలో జరిగిన సమన్వయ దాడులని నిర్ధారించింది.
అది దొంగతనం.. ఇది శిక్షణ: ఆంత్రోపిక్ వాదన
ఈ ఆరోపణలపై భిన్నాభిప్రాయాలు వ్యక్తమవుతున్నాయి. ఆంత్రోపిక్ తన వాదనను సమర్థించుకుంటూ, "పబ్లిక్ వెబ్ డేటా నుంచి ఏఐ మోడళ్లకు శిక్షణ ఇవ్వడం వేరు, మా పేయిడ్ ఏపీఐ నిబంధనలను ఉల్లంఘించి, మోసపూరిత ఖాతాల ద్వారా సమాచారాన్ని దొంగిలించడం వేరు" అని స్పష్టం చేసింది. ఇది కేవలం వ్యాపార పోటీ కాదని, జాతీయ భద్రతకు సంబంధించిన విషయమని ఆంత్రోపిక్ పేర్కొంది.
ఎలోన్ మస్క్ వ్యంగ్యాస్త్రాలు
మరోవైపు, ఈ వివాదంపై ఎలాన్ మస్క్ స్పందిస్తూ ఆంత్రోపిక్ను ఉక్కిరిబిక్కిరి చేశారు. గతంలో ఆంత్రోపిక్ సంస్థ పుస్తకాల డేటాను అక్రమంగా సేకరించిన వివాదాలను, ఆ తర్వాత జరిగిన సెటిల్మెంట్లను మస్క్ గుర్తు చేస్తూ ఎద్దేవా చేశారు. ఆంత్రోపిక్ ఇప్పుడు నీతులు చెబుతోందని ఆయన విమర్శించారు.
నియంత్రణ లేమి - భవిష్యత్తు సవాళ్లు
ప్రస్తుతం అమెరికాలో గానీ, చైనాలో గానీ ఈ తరహా 'ఏఐ డిస్టిలేషన్' దాడులను అరికట్టేందుకు ఎటువంటి నిర్దిష్ట చట్టాలు లేవు. ఇది ఆంత్రోపిక్ వంటి సంస్థలకు పెద్ద సవాలుగా మారింది. ఈ ఘటనపై డీప్సీక్, మూన్షాట్, మినీమాక్స్ సంస్థల నుంచి ఇప్పటివరకు ఎటువంటి అధికారిక వివరణ రాలేదు. ఈ పరిణామాలు అంతర్జాతీయ ఏఐ రాజకీయాల్లో ప్రకంపనలు సృష్టిస్తున్నాయి. ఈ ప్రమాదాన్ని అరికట్టేందుకు పరిశ్రమ దిగ్గజాలు, ప్రభుత్వ విధానకర్తలు సమన్వయంతో వ్యవహరించాల్సిన సమయం ఆసన్నమైందని, బలమైన రక్షణ వ్యవస్థలను నిర్మించుకోవాలని ఆంత్రోపిక్ పిలుపునిచ్చింది. ఈ ఘటన భవిష్యత్తులో ఏఐ నియంత్రణ చట్టాలకు పునాది వేస్తుందా? లేక దేశాల మధ్య ఏఐ యుద్ధానికి దారితీస్తుందా? అన్నది వేచి చూడాలి.