ఫోన్పేకు రూ.21 లక్షల జరిమానా

డిజిటల్ పేమెంట్స్ రంగంలో అగ్రగామిగా ఉన్న ఫోన్పేకు రిజర్వ్ బ్యాంక్ ఆఫ్ ఇండియా (ఆర్బీఐ) భారీ జరిమానా విధించింది. 'ప్రీపెయిడ్ పేమెంట్ ఇన్స్ట్రుమెంట్స్ (పీపీఐ)’కు సంబంధించిన నిబంధనలను పాటించనందుకు రూ. 21 లక్షల పెనాల్టీ విధించినట్లు ఆర్బీఐ ఒక ప్రకటనలో తెలిపింది.

జరిమానా ఎందుకు?

పీపీఐ నిబంధనల ప్రకారం, డిజిటల్ వ్యాలెట్లు నిర్వహించే కంపెనీలు తమ వినియోగదారుల బ్యాలెన్స్లకు సమానంగా, మర్చంట్లకు చెల్లించాల్సిన మొత్తానికి తక్కువ కాకుండా ఎస్క్రో ఖాతాలలో డబ్బును నిర్వహించాలి. ఫోన్పే ఈ నిబంధనలను పాటించడంలో విఫలమైందని ఆర్బీఐ తన పర్యవేక్షణలో గుర్తించింది. ఈ విషయంలో కంపెనీకి నోటీసులు జారీ చేసి వివరణ కోరింది. కంపెనీ ఇచ్చిన సమాధానం, వ్యక్తిగత విచారణల తర్వాత ఆర్బీఐ ఈ జరిమానా విధించింది. ఫోన్పేకు ఆర్బీఐ జరిమానా విధించడం ఇది మొదటిసారి కాదు. గతంలో 2019లో పీపీఐ నిబంధనలను ఉల్లంఘించినందుకు రూ.కోటి, 2020లో ఇతర నియంత్రణ నిబంధనలను ఉల్లంఘించినందుకు రూ.1.39 కోట్లు జరిమానా విధించింది.

కస్టమర్లపై ప్రభావం ఉంటుందా?

ఈ జరిమానా కేవలం నిబంధనల ఉల్లంఘన కారణంగా విధించిందని, ఇది ఫోన్పే కస్టమర్ల లావాదేవీలపై లేదా ఒప్పందాలపై ఎలాంటి ప్రభావం చూపదని ఆర్బీఐ స్పష్టం చేసింది. డిజిటల్ చెల్లింపుల వ్యవస్థలో విశ్వసనీయతను, నియంత్రణను పటిష్టం చేయడమే తమ లక్ష్యమని ఆర్బీఐ తెలిపింది. ఈ జరిమానా ఫిన్టెక్ కంపెనీలు నియంత్రణ నిబంధనలను ఎంత పకడ్బందీగా పాటించాలో మరోసారి గుర్తు చేస్తుంది.