2025 అబుదాబి టి10 సీజన్ ప్రారంభ౦

2025 అబుదాబి టి10 తాజా ఎడిషన్ కర్టెన్ రైజర్ సందర్భంగా జాయెద్ క్రికెట్ స్టేడియం స్టార్ పవర్‌తో వెలిగిపోయింది. టోర్నమెంట్‌కు ముందు ఎనిమిది ఫ్రాంచైజీ జట్ల 'గ్లోబల్ లెజెండ్స్', 'ఐకాన్' ఆటగాళ్లు వేదిక వద్దకు చేరుకున్నారు. వీరిలో కిరాన్ పొలార్డ్ (యూఏఈ బుల్స్), తిసారా పెరీరా (నార్తరన్ వారియర్స్), ఏంజెలో మాథ్యూస్ (రాయల్ ఛాంప్స్), ఫాఫ్ డు ప్లెసిస్ (విస్టా రైడర్స్), సామ్ బిల్లింగ్స్ (ఆస్పిన్ స్టాలియన్స్), తిసారా పెరీరా (క్వెట్టా ఖవాల్రీ), నికోలస్ పూరన్ (డెక్కన్ గ్లాడియేటర్స్), మొయిన్ అలీ (అజ్మాన్ టైటాన్స్) ఉన్నారు, అని అబుదాబి టి 10 విడుదల చేసిన ప్రకటనలో పేర్కొంది.

సీజన్ ప్రారంభానికి ముందు మాట్లాడిన ది యూఏఈ బుల్స్ ఆటగాడు కిరాన్ పొలార్డ్, "స్థానిక ప్రతిభ అభివృద్ధి చెందడాన్ని చూడటం గొప్ప విషయం, వారితో పాటు ఈ టోర్నమెంట్‌లో భాగం కావడం నాకు ప్రత్యేకమైనది. రోహిద్ వంటి ఆటగాళ్లతో ఆడేందుకు నేను ఎదురుచూస్తున్నాను," అని అబుదాబి టి10 విడుదల చేసిన ప్రకటనలో పేర్కొన్నారు.

అజ్మాన్ టైటాన్స్ కెప్టెన్ మొయిన్ అలీ మాట్లాడుతూ, "యూఏఈ గ్లోబల్ క్రికెట్ హబ్‌గా తనను తాను స్థాపించుకుంది. మీరు దానిని అబుదాబి టి10 వంటి టోర్నమెంట్‌లతో చూడవచ్చు. ఇక్కడి సదుపాయాలు ప్రపంచ స్థాయికి ఏమాత్రం తక్కువకాదు. క్రికెట్ పట్ల మక్కువ క్రీడాభిమానుల్లో ప్రతి సంవత్సరం పెరుగుతోంది. యూఏఈ క్రికెట్‌ను ప్రపంచ క్రికెట్ మ్యాప్‌లో ఉంచేందుకు ప్రపంచం నలుమూలల నుండి ఉత్తమ ఆటగాళ్లను ఆకర్షించే దానిలో నేను భాగం కావడం చాలా బాగుంది" అన్నారు.

ఈ టోర్నమెంట్‌లో 12 రోజుల పాటు మొత్తం 32 హై-ఆక్టేన్ మ్యాచ్‌లు జరుగుతాయి. ఇది క్రికెట్‌లో అత్యంత వేగవంతమైన ఫార్మాట్‌. ఇక్కడ ప్రతి జట్టు కేవలం 10 ఓవర్లకు మాత్రమే బ్యాటింగ్ చేస్తుంది, 90 నిమిషాల పాటు మ్యాచ్ జరుగుతుంది. ప్రారంభ మ్యాచ్‌లో కొత్తగా ప్రవేశించిన క్వెట్టా ఖవాల్రీ జట్టు నార్తరన్ వారియర్స్‌తో తలపడింది. ఆ తర్వాత డిఫెండింగ్ ఛాంపియన్స్ డెక్కన్ గ్లాడియేటర్స్, యూఏఈ బుల్స్ మధ్య ఉత్కంఠభరితమైన పోరు జరిగింది.

డెక్కన్ గ్లాడియేటర్స్ కెప్టెన్ నికోలస్ పూరన్ మాట్లాడుతూ, "నేను ఎప్పుడూ యూఏఈలో క్రికెట్ ఆడటాన్ని ఇష్టపడతాను. చాలా చిన్న వయస్సు నుంచీ నేను ఇక్కడికి వస్తున్నాను. ఇది నా క్రికెట్ ప్రయాణంలో ఒక ప్రత్యేక స్థానాన్ని కలిగి ఉంది. ఇక్కడి పరిస్థితులు, వాతావరణం, అభిమానులు, ఆడటం.. ఇలా ప్రతిదీ నాకు సరైన అనుభూతిని ఇస్తుంది. ఇది నాకు ఇల్లు లాంటిది, ఈ ప్రాంతంలో క్రికెట్ ఆడటం నాకు ఎప్పుడూ ఉత్సాహాన్నిస్తుంది” అని అన్నారు.

ఈ టోర్నమెంట్ రౌండ్ రాబిన్ ఫార్మాట్‌లో జరుగుతుంది, ఇక్కడ మొదటి దశలో ప్రతి జట్టు మిగతా జట్లన్నింటితో తలపడుతుంది. 28 గ్రూప్ మ్యాచ్‌లు పూర్తయిన తర్వాత, పాయింట్ల పట్టికలో అగ్రస్థానంలో ఉన్న నాలుగు జట్లు ప్లేఆఫ్స్‌కు చేరుకుంటాయి. ప్లేఆఫ్స్ దశ నవంబర్ 29న క్వాలిఫైయర్ 1 (1వ vs 2వ) ఎలిమినేటర్ (3వ vs 4వ) తో ప్రారంభమవుతుంది. నవంబర్ 30న ఎలిమినేటర్ విజేత క్వాలిఫైయర్ 1 లో ఓడిపోయిన జట్టు మధ్య క్వాలిఫైయర్ 2 లో ఆడుతుంది. ఆ తర్వాత అదే రోజు ఫైనల్ మ్యాచ్‌లో ఛాంపియన్‌ను ప్రకటిస్తారు. అన్ని మ్యాచ్‌లు అబుదాబిలోని ప్రతిష్టాత్మక జాయెద్ క్రికెట్ స్టేడియంలో జరుగుతాయి.