19న ఎన్టీఆర్ స్టేడియంలో 38వ జాతీయ పుస్తక ప్రదర్శన ప్రారంభం

పుస్తక ప్రియులకు శుభవార్త. హైదరాబాద్‌లో ప్రతిష్ఠాత్మక 38వ హైదరాబాద్ జాతీయ పుస్తక ప్రదర్శన ప్రారంభానికి సిద్ధమైంది.ఈ నెల 19న‌ సాయంత్రం 5 గంటలకు ఘనంగా ప్రారంభం కానుంది. పుస్తక ప్రియులు, విద్యార్థులు, అధ్యాపకులు, పరిశోధకులు పెద్ద సంఖ్యలో హాజరయ్యే ఈ ప్రదర్శనను హైదరాబాద్ బుక్ ఫెయిర్ ట్రస్ట్ ఆధ్వర్యంలో నిర్వహిస్తున్నారు.

ఈ పుస్తక ప్రదర్శనలో 300కు పైగా స్టాళ్లు ఏర్పాటు చేయనున్నారు. తెలుగు, ఇంగ్లిష్‌తో పాటు ఇతర భారతీయ భాషల్లోని పుస్తకాలు, విజ్ఞాన గ్రంథాలు, సాహిత్య రచనలు, పిల్లల పుస్తకాలు, పోటీ పరీక్షల పుస్తకాలు, అకాడమిక్ ప్రచురణలు ఒకేచోట అందుబాటులో ఉండనున్నాయి. ప్రముఖ ప్రచురణ సంస్థలు తమ తాజా పుస్తకాలతో పాటు పాఠకులకు ప్రత్యేక రాయితీలను కూడా ప్రకటించే అవకాశముంది.

ఈ ప్రదర్శన ఈ నెల 29వ తేదీ వరకు కొనసాగుతుంది. ప్రతిరోజూ మధ్యాహ్నం 1 గంటల నుంచి రాత్రి 9 గంటల వరకు సందర్శకులకు అందుబాటులో ఉంటుంది. పుస్తకాల కొనుగోలుతో పాటు పఠన సంస్కృతిని ప్రోత్సహించే వివిధ కార్యక్రమాలు, రచయితలతో ముఖాముఖి చర్చలు, సాహిత్య సమావేశాలు కూడా నిర్వహించే అవకాశం ఉంది. హైదరాబాద్ నగరంలో పుస్తకాల పట్ల ఆసక్తి ఉన్న వారందరికీ ఈ జాతీయ పుస్తక ప్రదర్శన ఒక గొప్ప వేదికగా నిలవనుంది. విద్యార్థులు, యువత, కుటుంబాలతో కలిసి పుస్తక ప్రదర్శనను సందర్శించాలని నిర్వాహకులు విజ్ఞప్తి చేస్తున్నారు.