14మంది మావోయిస్టుల లొంగుబాటు
ఛత్తీస్గఢ్లో నక్సల్ ఉద్యమానికి మరో భారీ దెబ్బ. వెటరన్ నక్సల్ నాయకుడు వికాస్ తో పాటు 14 మంది మావోయిస్టులు (మొత్తం 15 మంది) ఆదివారం మహాసముంద్ జిల్లాలో ఆయుధాలు వదిలి పోలీసుల ముందు లొంగిపోయారు. వీరిపై మొత్తం 73 లక్షల రూపాయల బహుమతి ఉండగా, ఈ సరెండర్తో రాయ్పూర్-సంబల్పూర్ బెల్ట్లో 'రెడ్ టెర్రర్' పూర్తిగా అంతమైందని పోలీసు అధికారులు ప్రకటించారు.
ఛత్తీస్గఢ్-ఒడిశా సరిహద్దులో క్రియాశీలకంగా ఉన్న బలాంగీర్-బర్గఢ్-మహాసముంద్ (బీబీఎం) డివిజన్కు చెందిన ఈ 15 మంది (9 మహిళలు సహా) మావోయిస్టులు ఆయుధాలు సమర్పించారు. మహాసముంద్ జిల్లా కేంద్రంలో జరిగిన కార్యక్రమంలో ఛత్తీస్గఢ్ అదనపు డీజీపీ (యాంటీ-నక్సల్ ఆపరేషన్స్) వివేకానంద్ సిన్హా, ఒడిశా సంబల్పూర్ రేంజ్ ఐజీ హిమాంశు లాల్, రాయ్పూర్ రూరల్ జోన్ ఐజీ అమరేష్ మిశ్రా తదితరుల సమక్షంలో ఈ లొంగుబాట్లు జరిగాయి.
1985 నుంచి ఉద్యమంలో
వికాస్ (57) – సుదర్శన్, జంగు, బాబన్నా, రాజన్న, ముప్పిడి సంబయ్య అనే అలియాస్లతో పిలుచుకునే ఈ నాయకుడు తెలంగాణలోని వరంగల్ జిల్లాకు చెందినవాడు. 1985 నుంచి నక్సల్ ఉద్యమంలో చురుకుగా ఉన్నాడు. తెలంగాణ స్టేట్ జోనల్ కమిటీ సభ్యుడిగా, దండకారణ్య స్పెషల్ జోనల్ కమిటీ (డీకేఎస్ జడ్ సీ) దక్షిణ సబ్-జోన్ సెక్రటరీగా 10 ఏళ్లు, గడ్చిరోలి డివిజన్ ఇన్చార్జ్గా 2 ఏళ్లు పనిచేశాడు. ఒడిశా స్టేట్ కమిటీ ఏర్పాటులో కీలక పాత్ర పోషించాడు. అతనిపై 25 లక్షల రూపాయల బహుమతి ఉంది.
మిగిలిన వారిలో డివిజనల్ కమిటీ సభ్యులు మంగేష్, బాబు (ప్రతి ఒక్కరిపై 8 లక్షలు), 5 ఏరియా కమిటీ సభ్యులు (ప్రతి ఒక్కరిపై 5 లక్షలు), 7 పార్టీ సభ్యులు (ప్రతి ఒక్కరిపై 1 లక్ష) రివార్డులు ఉన్నారు. సరెండర్ అయిన వారు 14 ఆయుధాలు (3 ఏకే-47 రైఫిళ్లు, 2 ఎస్ఎల్ఆర్, 2 ఇన్సాస్, 4 .303 రైఫిళ్లు, 3 12-బోర్ గన్లు) అప్పగించారు. ఒడిశా స్టేట్ కమిటీ పశ్చిమ సబ్-జోన్ పూర్తిగా కూలిపోయింది – అడిషనల్ డీజీపీ సిన్హా మాట్లాడుతూ, గత ఏడాది వరకు ఈ సబ్-జోన్లో 2 డివిజన్లు, 7 ఏరియా కమిటీలు ఉండేవి. ఇప్పుడు రాయ్పూర్ పోలీస్ రేంజ్ (ఛత్తీస్గఢ్), సంబల్పూర్ రేంజ్ (ఒడిశా) పూర్తిగా నక్సల్ రహితమయ్యాయని తెలిపారు.
మార్చి 2026 నాటికి దేశవ్యాప్తంగా నక్సలిజం పూర్తిగా అంతమవుతుందనే లక్ష్యంలో ఇది ముఖ్యమైన అడుగని అన్నారు.
సరెండర్ వెనుక కారణాలు
మావోయిస్ట్ భావజాలం , అడవుల్లో జీవితం కష్టాలు, కుటుంబాల నుంచి దూరం కావడం వల్ల వీరు నిరాశకు గురయ్యారు. ముందు సరెండర్ అయిన మాజీ మావోయిస్టులు స్థిరమైన జీవితం గడుపుతున్నారని, రాష్ట్ర ప్రభుత్వం సరెండర్, రిహాబిలిటేషన్ పాలసీ (ర్యాంక్ ఆధారంగా ఆర్థిక ప్రోత్సాహకాలు, ఆయుధాలతో సరెండర్ చేస్తే అదనపు రివార్డ్, ఆరోగ్యం, ఇల్లు, ఉపాధి సహాయం) గురించి ఆకాశవాణి, బ్యానర్లు, పోస్టర్లు, పాంఫ్లెట్ల ద్వారా విస్తృతంగా ప్రచారం చేయడం వల్ల ప్రభావితమయ్యారని అధికారులు తెలిపారు. గత ఏడాది జనవరిలో గరియాబంద్ జిల్లాలో ఎన్కౌంటర్లో మరణించిన సెంట్రల్ కమిటీ సభ్యుడు జైరాం అలియాస్ చలపతికి గార్డ్లుగా పనిచేసిన 6 మంది (నీల, సోను, రీనా, దినేష్, దీప్నా, రనిలా) తర్వాత బీబీఎం డివిజన్కు బదిలీ అయ్యారు.
రాష్ట్ర ఉప ముఖ్యమంత్రి విజయ్ శర్మ (హోం శాఖ) రాయ్పూర్లో మాట్లాడుతూ, ఇది పునరావాస విధానం కింద ముఖ్యమైన అడుగని, బీబీఎం డివిజన్లో మిగిలిన 15 మంది సరెండర్ అయ్యారని తెలిపారు. గత రెండేళ్లలో ఛత్తీస్గఢ్లో 532 మావోయిస్టులు మరణించగా, 2,700 మందికి పైగా సరెండర్ అయ్యారు, 2,000 మందికి పైగా అరెస్టు అయ్యారు. కేంద్ర ప్రభుత్వం మార్చి 31, 2026 నాటికి దేశవ్యాప్తంగా లెఫ్ట్ వింగ్ ఎక్స్ట్రీమిజంను పూర్తిగా అంతం చేయాలనే సంకల్పంతో భద్రతా బలగాలు నిరంతరం కార్యాచరణ చేపడుతున్నాయి. మిగిలిన నక్సలైట్లు, ముఖ్యంగా బస్తర్లోని వారు, ఒడిశాలో తూర్పు సబ్-జోన్లోని వారు ఆయుధాలు వదిలి రాజ్యాంగం, త్రివర్ణ పతాకాన్ని స్వీకరించి మెయిన్స్ట్రీమ్లోకి రావాలని పోలీసులు పిలుపునిచ్చారు.