11 ఏళ్ల క్రితం అదృశ్యమైన విమానం కోసం అన్వేషణ పునఃప్రారంభం

ప్రపంచంలోనే అతిపెద్ద విమానయాన రహస్యాలలో ఒకటిగా మిగిలిపోయిన మలేషియా ఎయిర్‌లైన్స్ విమానం ఎంహెచ్370 కోసం అన్వేషణ మళ్లీ ప్రారంభం కానుంది. దాదాపు 11 సంవత్సరాల క్రితం ఆచూకీ లేకుండా మాయమైన ఈ విమానాన్ని కనుగొనేందుకు డిసెంబర్ 30 నుండి సముద్రంలో గాలింపు చర్యలు తిరిగి మొదలు పెట్టనున్నట్లు మలేషియా రవాణా మంత్రిత్వ శాఖ బుధవారం ప్రకటించింది.

అసలేమైంది?

బోయింగ్ 777 రకానికి చెందిన ఈ విమానం, 2014 మార్చి 8న మలేషియా రాజధాని కౌలాలంపూర్ నుండి చైనా రాజధాని బీజింగ్‌కు వెళుతుండగా రాడార్‌ల నుండి అదృశ్యమైంది. ఆ సమయంలో విమానంలో 227 మంది ప్రయాణికులు, 12 మంది సిబ్బంది సహా మొత్తం 239 మంది ఉన్నారు. వీరిలో ఎక్కువ మంది చైనీయులు, మిగిలిన వారు మలేషియా, ఇండోనేషియా, ఆస్ట్రేలియా, భారత్‌తో సహా ఇతర దేశాలకు చెందినవారు. పైలట్ వియత్నాం గగనతలంలోకి ప్రవేశించే ముందు చివరిసారిగా "గుడ్ నైట్, మలేషియన్ త్రీ సెవెన్ జీరో" అని సందేశం ఇచ్చారు. ఆ తర్వాత ట్రాన్స్‌పాండర్ ఆఫ్ అయ్యి, విమానం సిగ్నల్స్ నిలిచిపోయాయి. మిలటరీ రాడార్ మరియు శాటిలైట్ డేటా ప్రకారం, విమానం దాని నిర్ణీత మార్గం నుండి మళ్లి, తిరిగి దక్షిణ భారత మహాసముద్రం వైపు ప్రయాణించింది. ఇంధనం అయిపోయి అది అక్కడే కూలిపోయిందని భావిస్తున్నారు.

మునుపటి గాలింపులు ఎందుకు విఫలమయ్యాయి?

ఆస్ట్రేలియా, మలేషియా, చైనా దేశాలు కలిసి దాదాపు మూడు సంవత్సరాల పాటు 1,20,000 చదరపు కిలోమీటర్ల మేర సముద్రంలో గాలింపు చర్యలు చేపట్టాయి. ఇది చరిత్రలోనే అతిపెద్ద అండర్ వాటర్ సెర్చ్ ఆపరేషన్. ఈ భారీ ఆపరేషన్‌లో విమానానికి సంబంధించిన పెద్ద శకలాలు కానీ, మృతదేహాలు కానీ దొరకలేదు. కేవలం తూర్పు ఆఫ్రికా తీరం, ఇండియన్ ఓషన్ దీవులైన మడగాస్కర్, రీయూనియన్ ఐలాండ్ తీరాలకు కొట్టుకువచ్చిన చిన్న శకలాలు మాత్రమే లభ్యమయ్యాయి. 2018లో యూఎస్ సంస్థ ఓషన్ ఇన్ఫినిటీ కూడా ఒక ప్రైవేట్ గాలింపు చేపట్టినా అది కూడా విజయవంతం కాలేదు. దక్షిణ భారత మహాసముద్రంలోని ఆ ప్రాంతం ప్రపంచంలోనే అత్యంత సుదూరమైన, అతి లోతైన (సగటున 4 కిలోమీటర్ల లోతు) ప్రాంతం కావడం వల్ల విమానాన్ని కనుగొనడం కష్టంగా మారింది.

తొమ్మిదేళ్లుగా ఈ విమానం ఆచూకీ తెలియకపోవడంతో, దీని చుట్టూ అనేక కుట్ర సిద్ధాంతాలు ప్రచారంలోకి వచ్చాయి. అయితే బాధితుల కుటుంబాలకు న్యాయం చేయాలనే తమ నిబద్ధతను చూపుతూ మలేషియా ప్రభుత్వం తాజాగా గాలింపునకు అనుమతినిచ్చింది. యూఎస్-ఆధారిత మెరైన్ రోబోటిక్స్ సంస్థ ఓషన్ ఇన్ఫినిటీ ఈ గాలింపును చేపట్టనుంది. ఇది "నో-ఫైండ్, నో-ఫీ" ఒప్పందం. అంటే, విమాన శకలాలను కనుగొంటే మాత్రమే ఓషన్ ఇన్ఫినిటీకి 70 మిలియన్ల అమెరికన్ డాలర్లు చెల్లిస్తారు. శకలాలు దొరకకపోతే ఒక్క పైసా కూడా చెల్లించరు. డిసెంబర్ 30 నుండి మొత్తం 55 రోజుల పాటు విరామాలలో గాలింపు జరుగుతుంది.

విమానం దొరికే అవకాశం అత్యధికంగా ఉన్నట్లు భావిస్తున్న 15,000 చదరపు కిలోమీటర్ల కొత్త ప్రాంతంలో ఈ అన్వేషణ జరుగుతుంది. ఏప్రిల్‌లో వాతావరణం బాలేనందున తాత్కాలికంగా నిలిచిపోయిన గాలింపు ఇప్పుడు తిరిగి ప్రారంభమవుతుంది. ఓషన్ ఇన్ఫినిటీ సంస్థ ఈసారి కొత్త సాంకేతికతను ఉపయోగించి, నిపుణులతో సంప్రదించి ఆ ప్రాంతాన్ని మరింతగా కుదించింది. ఈ తాజా ప్రయత్నం విమానయాన చరిత్రలోని అతిపెద్ద మిస్టరీని ఛేదిస్తుందని బాధితుల కుటుంబ సభ్యులు, ప్రపంచం ఆశిస్తోంది.