హ్యుందాయ్ 'జెనెసిస్' సరికొత్త రికార్డు.. పదేళ్లలో 15 లక్షల కార్ల విక్రయం

హ్యుందాయ్ మోటార్స్ కంపెనీకి చెందిన లగ్జరీ కార్ల బ్రాండ్ ‘జెనెసిస్’ ప్రపంచ మార్కెట్లో ఒక సరికొత్త చరిత్ర సృష్టించింది. 2015 నవంబర్‌లో 'జీ90' అనే విలాసవంతమైన కారుతో ప్రయాణాన్ని మొదలుపెట్టిన ఈ బ్రాండ్, సరిగ్గా పదేళ్లు పూర్తయ్యేసరికి ప్రపంచవ్యాప్తంగా 15 లక్షల కార్ల అమ్మకాల మైలురాయిని దాటింది. దక్షిణ కొరియాకు చెందిన ‘పల్స్’ పత్రిక నివేదిక ప్రకారం, 2025 నవంబర్ నాటికి మొత్తం 15,10,368 వాహనాలు అమ్ముడయ్యాయి. జపాన్‌కు చెందిన ప్రముఖ లగ్జరీ బ్రాండ్ ‘లెక్సస్’ తన ప్రారంభ రోజుల్లో సాధించిన వేగం కంటే, జెనెసిస్ చాలా రెట్లు వేగంగా దూసుకుపోతుండటం విశేషం.

అంచలంచెలుగా ఎదుగుదల

ప్రారంభ ఏడాదిలోనే జెనెసిస్ మంచి స్పందన పొందింది. 2015లో కేవలం రెండు నెలల్లోనే 530 కార్లు విక్రయించగా, 2016లో ఈ సంఖ్య ఒక్కసారిగా 64,000 యూనిట్లకు చేరింది. ఆ తర్వాత ప్రతి ఏడాది విక్రయాలు క్రమంగా పెరుగుతూ వచ్చాయి. 2021లో 2,01,415, 2022లో 2,15,128, 2023లో 2,25,189, 2024లో 2,29,532 కార్లు విక్రయించినట్లు ‘పల్స్’ నివేదిక తెలిపింది.

విదేశాల్లో పెరుగుతున్న ఆదరణ

అయితే 2025 నవంబర్ వరకు విక్రయాలు 2,00,878 యూనిట్లుగా ఉండగా, ఇది గత ఏడాదితో పోలిస్తే సుమారు 5 శాతం తగ్గుదలగా నమోదైంది. అయినప్పటికీ, అంతర్జాతీయ మార్కెట్లలో జెనెసిస్ బలపడుతూనే ఉందని కంపెనీ పేర్కొంది. ఈ కాలంలో విదేశీ మార్కెట్లలో విక్రయాల వాటా 43 శాతం నుంచి 46 శాతానికి పెరగడం బ్రాండ్ గుర్తింపు పెరుగుతోందనడానికి నిదర్శనమని తెలిపింది.

అత్యధికంగా అమ్ముడైన కారు 'జీ80'

జెనెసిస్ బ్రాండ్ సాధించిన ఈ భారీ విజయంలో 'జీ80' మోడల్ కారు కీలక పాత్ర పోషించింది. గత పదేళ్లలో ఈ బ్రాండ్ నుండి అత్యధికంగా అమ్ముడైన కారుగా నిలిచిన జీ80, 2025 నవంబర్ నాటికి ఏకంగా 5 లక్షలకు పైగా (5,01,517) అమ్మకాలను సాధించి రికార్డు సృష్టించింది. జెనెసిస్ కంపెనీ రాబోయే రోజుల్లో మరిన్ని కొత్త లక్ష్యాలను చేరుకోవడానికి కూడా ఈ జీ80 మోడలే ప్రధాన ఆధారంగా నిలుస్తుందని నిపుణులు విశ్లేషిస్తున్నారు. మొత్తంగా చూస్తే, చాలా తక్కువ కాలంలోనే జెనెసిస్ బ్రాండ్ లగ్జరీ కార్ల ప్రపంచంలో తనకంటూ ఒక ప్రత్యేక స్థానాన్ని సంపాదించుకుని, ప్రపంచంలోనే వేగంగా ఎదుగుతున్న బ్రాండ్‌గా నిలిచింది.