హోలీకి దేశవ్యాప్తంగా 1,244 ప్రత్యేక రైళ్లు

హోలీ పండుగను పురస్కరించుకుని సొంతూళ్లకు వెళ్లే ప్రయాణికుల రద్దీని దృష్టిలో ఉంచుకుని భారతీయ రైల్వే కీలక నిర్ణయం తీసుకుంది. ప్రయాణికులు ఎటువంటి ఇబ్బందులు లేకుండా సురక్షితంగా, సౌకర్యవంతంగా తమ గమ్యస్థానాలకు చేరుకునేలా రైల్వే శాఖ భారీ ఏర్పాట్లు చేసింది. ఇందులో భాగంగా దేశవ్యాప్తంగా వివిధ రైల్వే జోన్ల పరిధిలో ఏకంగా 1,244 ప్రత్యేక రైలు ట్రిప్పులను నడుపుతున్నట్లు రైల్వే మంత్రిత్వ శాఖ ప్రకటించింది.

ఫిబ్రవరి 25 నుంచే ప్రారంభం

హోలీ ప్రత్యేక రైలు సేవలు ఇప్పటికే (ఫిబ్రవరి 25న) ప్రారంభమయ్యాయి. ఈ ప్రత్యేక సర్వీసులు వచ్చే నెల మార్చి 18 వరకు కొనసాగుతాయని రైల్వే శాఖ వెల్లడించింది. అయితే, ప్రయాణికుల నుంచి వచ్చే డిమాండ్‌ను బట్టి ఈ రైళ్ల సంఖ్యను మరింత పెంచే అవకాశం ఉందని అధికారులు పేర్కొన్నారు. ముఖ్యంగా ప్రధాన నగరాలు, రాష్ట్రాల రాజధానులు, కీలక ప్రాంతీయ కేంద్రాల మధ్య ఈ రైళ్లు రాకపోకలు సాగిస్తాయి. దీనివల్ల సాధారణ రైళ్లపై భారం తగ్గడంతో పాటు, ప్రయాణికులకు కన్ఫర్మ్ టికెట్లు సులభంగా దొరికే అవకాశం ఉంటుంది.

జోన్ల వారీగా ప్రత్యేక రైళ్ల కేటాయింపు

రద్దీని సమర్థవంతంగా నిర్వహించేందుకు దేశవ్యాప్తంగా వివిధ రైల్వే జోన్లు ప్రత్యేక సర్వీసులను సిద్ధం చేశాయి. ఇందులో భాగంగా తూర్పు మధ్య రైల్వే అత్యధికంగా 50 ప్రత్యేక రైలు సర్వీసులతో 275 ట్రిప్పులను నడుపుతుండగా, ఉత్తర రైల్వే 48 ప్రత్యేక సర్వీసులతో 204 ట్రిప్పులను అందుబాటులోకి తెచ్చింది. అలాగే పశ్చిమ రైల్వే 32 సర్వీసులతో 120 ట్రిప్పులు, ఆగ్నేయ రైల్వే 28 సర్వీసులతో 107 ట్రిప్పులను నడుపుతున్నాయి. వీటితో పాటు మధ్య రైల్వే కూడా 20 ప్రత్యేక రైలు సర్వీసులతో 129 ట్రిప్పులను ప్రయాణికుల సౌకర్యార్థం సిద్ధం చేసింది.

దక్షిణ మధ్య రైల్వే ప్రత్యేక సర్వీసులు

తెలుగు రాష్ట్రాల ప్రయాణికుల కోసం దక్షిణ మధ్య రైల్వే 16 ప్రత్యేక రైలు సర్వీసులతో 40 ట్రిప్పులను ప్రకటించింది. ఇవి ప్రధానంగా చర్లపల్లి, తిరుపతి, సికింద్రాబాద్, చంద్రపూర్ స్టేషన్ల నుంచి ఉత్తర, తూర్పు, ఈశాన్య భారత ప్రాంతాలకు నడుస్తాయి.

ముఖ్యమైన రైళ్లు:

చర్లపల్లి-దానాపూర్ (07092), చర్లపల్లి-మాదార్ (07119/07120), చర్లపల్లి-షాలిమార్ (07512/07513), చర్లపల్లి-రక్సాల్ (07005/07006), తిరుపతి-రక్సాల్ (07051/07052), సికింద్రాబాద్-నహర్లగున్ (07046/07047), చర్లపల్లి-హజ్రత్ నిజాముద్దీన్ (07023/07024), చర్లపల్లి-తిరుచిరాపల్లి (07615/07616). ఈ రైళ్లు ఫిబ్రవరి 25 నుంచి మార్చి 17 వరకు వివిధ తేదీల్లో అందుబాటులో ఉంటాయి.

ప్రయాణికులకు విజ్ఞప్తి

పండుగ సీజన్‌లో లక్షలాది మందికి అసౌకర్యం కలగకూడదనే ఉద్దేశంతో రైల్వే శాఖ ఈ ముందస్తు ప్రణాళికలను సిద్ధం చేసింది. రద్దీని సమర్థవంతంగా నియంత్రించడం ద్వారా సాధారణ ప్రయాణికులకు ఇబ్బందులు లేకుండా చూడటమే లక్ష్యమని రైల్వే మంత్రిత్వ శాఖ పేర్కొంది. ప్రయాణికులు రైల్వే అధికారిక వెబ్‌సైట్ లేదా యాప్‌ల ద్వారా ఈ ప్రత్యేక రైళ్ల సమయాలను, లభ్యతను ఎప్పటికప్పుడు చూసుకుని టికెట్లను ముందుగానే బుక్ చేసుకోవాలని సూచించింది.