హోర్ముజ్ మూతపడితే ఆహార ధరలు పైపైకి: ఐరాస హెచ్చరిక

పశ్చిమ ఆసియాలో జరుగుతున్న ఉద్రిక్తతల కారణంగా హోర్ముజ్ జలసంధి మూతపడితే ప్రపంచ వ్యాప్తంగా ఆహార ధరలు, జీవన వ్యయం భారీగా పెరిగే ప్రమాదం ఉందని ఐక్యరాజ్యసమితి హెచ్చరించింది. ఐక్యరాజ్యసమితి వాణిజ్య-అభివృద్ధి సంస్థ (యూఎన్‌సీటీఏడీ) విడుదల చేసిన నివేదికలో ఈ హెచ్చరికలు వెల్లడయ్యాయి. అమెరికా-ఇజ్రాయెల్ దాడులు, ఇరాన్ ప్రతిదాడులతో ఈ ప్రాంతంలో సైనిక ఉద్రిక్తతలు పెరిగిన నేపథ్యంలో హోర్ముజ్ జలసంధి ద్వారా జరిగే నౌకా రవాణా తీవ్రంగా ప్రభావితమవుతోందని తెలిపింది.

ప్రపంచ సముద్ర మార్గం ద్వారా జరిగే చమురు వ్యాపారంలో సుమారు 25 శాతం చమురు ఈ జలసంధి ద్వారానే వెళ్తుంది. అలాగే భారీ మొత్తంలో లిక్విఫైడ్ నేచురల్ గ్యాస్ (ఎల్ఎన్‌జీ), ఎరువులు కూడా ఈ మార్గం ద్వారా రవాణా అవుతాయి. అందువల్ల ఇక్కడ సమస్యలు వస్తే ప్రభావం ప్రపంచ మార్కెట్లపై పడుతుంది.

యూఎన్ ప్రకారం, చమురు, గ్యాస్, ఎరువుల ధరలు పెరిగితే వాటి ప్రభావం చివరకు ఆహార ధరలపై కూడా పడుతుంది. రవాణా ఖర్చులు, ఇంధన ధరలు, బీమా ఖర్చులు పెరగడం వల్ల ప్రపంచవ్యాప్తంగా వస్తువుల ధరలు పెరిగే అవకాశం ఉంది. ముఖ్యంగా పేద దేశాల్లో ప్రజల జీవన వ్యయం మరింత పెరిగే ప్రమాదం ఉందని నివేదిక పేర్కొంది.

2024లో రోజుకు సుమారు 2 కోట్ల బ్యారెళ్ల చమురు ఈ జలసంధి ద్వారా వెళ్లింది. అందులో ఎక్కువ భాగం ఆసియా దేశాలకు చేరింది. మొత్తం చమురు సరఫరాలో దాదాపు 84 శాతం ఆసియా దేశాలకే వెళ్తుంది. అలాగే ఎల్ఎన్‌జీ సరఫరాలో కూడా పెద్ద భాగం ఆసియాకే చేరుతుంది. ఇటీవల ఫిబ్రవరి 28 తర్వాత అమెరికా-ఇజ్రాయెల్ దాడులు ప్రారంభమైన తరువాత హోర్ముజ్ జలసంధి ద్వారా నౌకా రవాణా దాదాపు 97 శాతం తగ్గింది అని యూఎన్‌సీటీఏడీ తెలిపింది. ఇది కొనసాగితే ప్రపంచ సరఫరా వ్యవస్థలు, వాణిజ్యం, ఇంధన మార్కెట్లు తీవ్రంగా దెబ్బతినే అవకాశం ఉందని హెచ్చరించింది.

ప్రస్తుతం చాలా అభివృద్ధి చెందుతున్న దేశాలు అప్పుల భారంతో, ఆర్థిక ఒత్తిడితో ఇప్పటికే ఇబ్బందులు పడుతున్నాయి. ఈ పరిస్థితుల్లో ఇంధనం, రవాణా, ఆహార ధరలు పెరిగితే ప్రభుత్వాలపై, ప్రజలపై మరింత భారమవుతుందని ఐక్యరాజ్యసమితి పేర్కొంది. అందుకే ఈ ప్రాంతంలో ఉద్రిక్తతలు తగ్గించడం, సముద్ర రవాణా మార్గాలను భద్రంగా ఉంచడం అత్యంత అవసరమని యూఎన్ సూచించింది. పరిస్థితి ఎంతకాలం కొనసాగుతుందో అనేదానిపై ప్రపంచ ఆర్థిక వ్యవస్థపై ప్రభావం ఆధారపడి ఉంటుందని నివేదిక తెలిపింది.