హైదరాబాద్ నగరంలో నేరాలు15 శాతం తగ్గాయి: సీపీ సజ్జనార్

గత ఏడాదితో పోలిస్తే 2025లో హైదరాబాద్ నగరంలో నేరాల సంఖ్య గణనీయంగా తగ్గింది. శనివారం ఏర్పాటు చేసిన మీడియా సమావేశంలో హైదరాబాద్ పోలీస్ కమిషనర్ వీసీ సజ్జనార్ నగర వార్షిక నేర నివేదికను విడుదల చేశారు. 2024లో 35,944 కేసులు నమోదు కాగా, 2025లో ఆ సంఖ్య 30,690కి చేరిందని, అంటే దాదాపు 15 శాతం నేరాలు తగ్గాయని ఆయన వెల్లడించారు.

నేరాల తగ్గుదలకు ప్రధాన కారణంగా కఠినమైన చట్ట అమలు, నిరంతర నిఘా, ప్రజలకు కనిపించే విధంగా పోలీసింగ్ (విజిబుల్ పోలీసింగ్) అమలు చేయడమేనని సజ్జనార్ తెలిపారు. నగరంలో భద్రతను మరింత పటిష్టం చేయడానికి తీసుకున్న చర్యలు ఫలితాలు ఇచ్చాయని పేర్కొన్నారు. అయితే, మహిళలపై జరిగే నేరాలు 2025లో 6 శాతం పెరిగినట్లు ఆయన తెలిపారు. అలాగే పిల్లలపై లైంగిక నేరాలకు సంబంధించిన పోక్సో కేసులు 27 శాతం పెరగడం ఆందోళనకరమన్నారు. దీనిపై ప్రత్యేక దృష్టి సారించి, విచారణ వేగవంతం చేస్తామని ఆయ‌న‌ చెప్పారు.

సైబర్ నేరాల విషయంలో మాత్రం కొంత ఊరట కనిపించిందని సజ్జనార్ తెలిపారు. 2024లో 4,042 సైబర్ నేర కేసులు నమోదు కాగా, 2025లో అవి 3,735కి తగ్గి 8 శాతం తగ్గుదల నమోదైందన్నారు. డిజిటల్ మోసాలపై ప్రజలకు అవగాహన పెంచడం, సాంకేతికతను సమర్థవంతంగా వినియోగించడం వల్ల ఈ తగ్గుదల సాధ్యమైందని ఆయ‌న‌ చెప్పారు. హత్యలు, హత్యాయత్నాలు, కిడ్నాప్‌లు, తీవ్రమైన శారీరక నేరాలు, తేలికపాటి శారీరక నేరాలు, అలాగే ఆస్తి సంబంధిత నేరాలన్నింటిలోనూ తగ్గుదల నమోదైనట్లు కమిషనర్ తెలిపారు. అయితే మాదకద్రవ్యాల నియంత్రణ చట్టం (ఎన్‌డీపీఎస్) కింద 2025లో 368 కేసులు నమోదు కాగా, 2024లో ఇవి 322 మాత్రమే ఉండటంతో ఈ విభాగంలో కేసులు పెరిగాయని ఆయ‌న‌ చెప్పారు.

2026లో పోలీసింగ్‌ను మరింత ఆధునికంగా తీర్చిదిద్దేందుకు సాంకేతికతను విస్తృతంగా వినియోగించనున్నట్లు సజ్జనార్ తెలిపారు. నేరాల అంచనా, హాట్‌స్పాట్ మ్యాపింగ్, ముఖ గుర్తింపు వ్యవస్థల భద్రత, డేటా ఆధారిత పోలీస్ బలగాల మోహరింపు వంటి అంశాల్లో కృత్రిమ మేధస్సు (ఏఐ) వినియోగాన్ని పెంచనున్నట్లు ఆయ‌న‌ చెప్పారు. డ్రోన్ పోలీసింగ్, బాడీ-వోర్న్ కెమెరాలు, సీసీటీవీ సమగ్రత, డిజిటల్ కేసు నిర్వహణను విస్తరించడంతో పాటు గోప్యత, చట్టబద్ధత, నైతిక ప్రమాణాలకు ప్రాధాన్యం ఇస్తామని తెలిపారు. సైబర్ క్రైమ్ సెల్‌లను బలోపేతం చేసి, డిజిటల్ మోసాలపై వేగవంతమైన స్పందన అందిస్తామన్నారు.

మహిళలు, పిల్లలపై నేరాల నియంత్రణకు షీ టీమ్‌లను మరింత సాంకేతికంగా అభివృద్ధి చేస్తామని, బాధిత కేంద్రిత పోలీసింగ్, సమాజ ఆధారిత నివారణ చర్యలు అమలు చేస్తామని కమిషనర్ తెలిపారు. అదనంగా, ఆహార కల్తీపై ప్రత్యేక దర్యాప్తు బృందాన్ని త్వరలో ఏర్పాటు చేస్తామని, ట్రాఫిక్ సమస్యల పరిష్కారానికి స్మార్ట్ ట్రాఫిక్ సిస్టమ్‌లు, ఏఐ ఆధారిత సిగ్నల్ నిర్వహణ, ఈ-చలాన్ అమలు చేపడతామని కమిషనర్ వెల్లడించారు.