హైదరాబాద్లో ‘సండేస్ ఆన్ సైకిల్’: కేంద్ర మంత్రి కిషన్ రెడ్డి సైక్లింగ్
దేశంలోని అపారమైన మానవ వనరుల సామర్థ్యాన్ని పరిరక్షించడంలో, బలోపేతం చేయడంలో ‘ఫిట్ ఇండియా’ ఉద్యమం వంటి కార్యక్రమాలు కీలక పాత్ర పోషిస్తున్నాయని కేంద్ర బొగ్గు, గనుల శాఖ మంత్రి జి. కిషన్ రెడ్డి అన్నారు. ఆదివారం హైదరాబాద్లో నిర్వహించిన ‘ఫిట్ ఇండియా – సండేస్ ఆన్ సైకిల్’ కార్యక్రమంలో ఆయన పాల్గొని ప్రసంగించారు. 57వ ఎడిషన్లో ఆయన స్వయంగా పాల్గొని సైకిల్ తొక్కారు.
తన ప్రసంగానంతరం కిషన్ రెడ్డి స్వయంగా సైకిల్ తొక్కుతూ హైదరాబాద్ వీధుల్లో ర్యాలీలో పాల్గొన్నారు. ఈ కార్యక్రమంలో ప్రఖ్యాత బ్యాడ్మింటన్ కోచ్ పుల్లెల గోపీచంద్, స్పోర్ట్స్ అథారిటీ ఆఫ్ ఇండియా అధికారులు, క్రీడాకారులు, ఫిట్నెస్ అభిమానులు పెద్ద సంఖ్యలో పాల్గొని ఉత్సాహంగా సందడి చేశారు.
‘ఎక్స్’ (ట్విట్టర్) వేదికగా మంత్రి స్పందిస్తూ, జీవనశైలి మార్పులు, ఆహార అలవాట్లు, తగిన శారీరక చురుకుదనం లేకపోవడం, పర్యావరణ కారకాలు ముఖ్యంగా ఊబకాయం వంటి ఆరోగ్య సమస్యలు పెరుగుతున్నాయని పేర్కొన్నారు. పౌరులు ఆరోగ్యంగా ఉన్నప్పుడే కుటుంబం, సమాజం, దేశ సంక్షేమానికి సార్థకమైన సేవలు అందించగలరని ఆయన తెలిపారు.
తెలంగాణ ప్రభుత్వ సహకారంతో స్పోర్ట్స్ అథారిటీ ఆఫ్ ఇండియా ఆధ్వర్యంలో నగరంలో ఫిట్ ఇండియా ‘సండేస్ ఆన్ సైకిల్’ 57వ ఎడిషన్ను నిర్వహించారు. గచ్చిబౌలి స్టేడియం నుంచి ప్రారంభమైన ఈ 6 కిలోమీటర్ల సైకిల్ ర్యాలీ తిరిగి స్టేడియం వద్దే ముగిసింది. అంతేకాకుండా యోగా ప్రదర్శనలు, వ్యాయామాలు, ప్రజలతో పరస్పర చర్చలు వంటి కార్యక్రమాలు నిర్వహించి ఆరోగ్యంపై అవగాహన కల్పించారు. ఈ కార్యక్రమం నగరవాసుల్లో ఆరోగ్య జీవనశైలిపై కొత్త ఉత్సాహాన్ని నింపింది.