హెచ్-1బీ వీసా దరఖాస్తుదారులకు భారీ ఊరట

భారతీయ ఐటీ నిపుణులకు, విద్యార్థులకు భారీ ఊరట లభించింది. హెచ్-1బీ వీసా దరఖాస్తు రుసుమును ఏకంగా లక్ష డాలర్లకు పెంచుతూ అమెరికా అధ్యక్షుడు డొనాల్డ్ ట్రంప్ జారీ చేసిన ప్రకటనపై నెలకొన్న గందరగోళానికి తెరదించుతూ, యూఎస్ సిటిజన్‌షిప్‌ అండ్‌ ఇమ్మిగ్రేషన్‌ సర్వీసెస్‌ (యూఎస్‌సీఐఎస్) తాజాగా కీలక మార్గదర్శకాలను విడుదల చేసింది.

కొత్త మార్గదర్శకాల ప్రకారం, ఈ భారీ రుసుము కేవలం అమెరికా వెలుపల ఉండి, మొట్టమొదటిసారిగా కొత్త హెచ్-1బీ వీసా కోసం దరఖాస్తు చేసుకునే వారికి మాత్రమే వర్తిస్తుంది. దీంతో అమెరికాలో ఉంటూనే తమ వీసా స్టేటస్‌ను మార్చుకోవాలని చూస్తున్న వేలాది మంది టెక్ నిపుణులు, విద్యార్థులు ఊపిరి పీల్చుకున్నారు.

లక్ష డాలర్ల ఫీజు: ఎవరికి మినహాయింపు?

'స్టేటస్ మార్పు' దరఖాస్తుదారులు: అమెరికాలో ఎఫ్-1 వీసా (విద్యార్థి వీసా)పై చదువుకుంటున్న విదేశీ విద్యార్థులు తమ వీసా స్టేటస్‌ను హెచ్-1బీకి మార్చుకోవడానికి దరఖాస్తు చేసుకుంటే వారు ఈ లక్ష డాలర్లు చెల్లించాల్సిన అవసరం లేదు. ఇది భారతీయ విద్యార్థులకు అతి పెద్ద ఉపశమనం. ఎల్-1 వీసా (ఇంటర్‌కంపెనీ ట్రాన్స్‌ఫర్ వీసా)పై ఉన్న వృత్తి నిపుణులు హెచ్-1బీకి మారినా మినహాయింపు ఉంటుంది.

పొడిగింపు, సవరణ దరఖాస్తుదారులు: ఇప్పటికే చెల్లుబాటు అయ్యే హెచ్-1బీ వీసా కలిగిన ఉద్యోగులు, తమ వీసాను పొడిగించుకోవడానికి లేదా ఉద్యోగ మార్పులు/ఇతర కారణాల వల్ల సవరణలు చేసుకోవడానికి దరఖాస్తు చేసుకుంటే వారికి ఈ భారీ రుసుము వర్తించదు.

ప్రస్తుత హెచ్-1బీ హోల్డర్ల ప్రయాణం: ప్రస్తుతం హెచ్-1బీ వీసా కలిగి ఉన్నవారు అంతర్జాతీయంగా ప్రయాణించడానికి (అమెరికా నుంచి ఇతర దేశాలకు, లేదా తిరిగి అమెరికాకు) ఈ కొత్త ఫీజు నిబంధన ఎటువంటి పరిమితులను విధించదు.

ఫీజు ఎవరికి వర్తిస్తుంది?

లక్ష డాలర్ల అదనపు రుసుము కేవలం అమెరికా వెలుపల ఉండి, కొత్తగా హెచ్-1బీ వీసా కోసం దరఖాస్తు చేసుకునే వారికి మాత్రమే వర్తిస్తుంది. అంటే అమెరికాలో చెల్లుబాటు అయ్యే వీసా స్టేటస్ లేని లేదా వీసా లేకుండా బయట దేశాల నుంచి కొత్తగా అమెరికాలోకి ప్రవేశించాలని చూస్తున్న దరఖాస్తుదారుల కోసం కంపెనీలు దాఖలు చేసే పిటిషన్లకు ఈ ఫీజు చెల్లించాలి. సెప్టెంబర్ 21 తర్వాత సమర్పించిన దరఖాస్తులకు మాత్రమే ఈ నిబంధనలు వర్తిస్తాయి.

ఫీజు చెల్లింపు విధానం

ఫీజు చెల్లించాల్సిన యజమానులు pay.gov వెబ్‌సైట్ ద్వారా చెల్లింపులు చేయాల్సి ఉంటుంది. హెచ్-1బీ దరఖాస్తు (పిటిషన్) దాఖలు చేసే సమయంలో యజమాని తప్పనిసరిగా ఫీజు చెల్లింపు రుజువు కాపీని లేదా హోంల్యాండ్ సెక్యూరిటీ కార్యదర్శి నుంచి పొందిన రుసుము మినహాయింపు ఆధారాన్ని సమర్పించాలి. ఈ ఆధారాలు లేకుండా దాఖలు చేసిన పిటిషన్లు తక్షణమే తిరస్కరించబడతాయి.

చారిత్రక నేపథ్యం, న్యాయపరమైన సవాళ్లు

ట్రంప్ ప్రభుత్వం అమెరికన్లకు ఉద్యోగాలు దక్కాలని, తక్కువ వేతనానికి విదేశీ నిపుణులను నియమించుకోవడాన్ని నిరోధించాలని ఉద్దేశించి ఈ భారీ ఫీజును ప్రకటించింది. అయితే, ఈ నిర్ణయంపై దేశంలో తీవ్ర గందరగోళం నెలకొంది. అమెరికాలోని అతిపెద్ద వాణిజ్య సంస్థ అయిన 'యూఎస్ ఛాంబర్ ఆఫ్ కామర్స్' ఈ ఫీజు నిర్ణయం చట్టవిరుద్ధం అని ఆరోపిస్తూ ఇటీవల కోర్టులో దావా కూడా వేసింది. ఈ నేపథ్యంలో, ప్రభుత్వం తాజాగా విడుదల చేసిన మార్గదర్శకాలు వేలాది మందికి, ముఖ్యంగా హెచ్-1బీ వీసాలలో 70 శాతం కంటే ఎక్కువ వాటా కలిగి ఉన్న భారతీయ నిపుణులకు, ఉపశమనం కలిగించినట్లయింది

.

హెచ్-1బీ వీసా ప్రయోజనాలు

హెచ్-1బీ వీసా అనేది అమెరికాలో విదేశీ నిపుణులను తాత్కాలికంగా నియమించుకోవడానికి అమెరికా కంపెనీలకు వీలు కల్పించే ఒక నాన్-ఇమ్మిగ్రెంట్ వీసా. ఇది ప్రత్యేకం నైపుణ్యం, అవసరమైన ఉద్యోగాలకు ఇస్తారు, దీనికి కనీసం బ్యాచిలర్ డిగ్రీ లేదా దానికి సమానమైన విద్యార్హత ఉండాలి. సాఫ్ట్‌వేర్ ఇంజనీరింగ్, సైన్స్, ఫైనాన్స్ వంటి రంగాల్లోని ఉద్యోగాలకు ఎక్కువగా జారీ చేస్తారు.

ప్రయోజనాలు: నిపుణులు తమ రంగంలో అమెరికాలో చట్టబద్ధంగా ఉద్యోగం చేయవచ్చు. ఇది ద్వంద్వ ఉద్దేశం కలిగి ఉంటుంది. అంటే వీసాపై ఉంటూనే శాశ్వత నివాసం (గ్రీన్ కార్డ్) కోసం దరఖాస్తు చేసుకోవచ్చు. వీసా హోల్డర్ జీవిత భాగస్వామి (హెచ్-4), 21 ఏళ్లలోపు పిల్లలు అమెరికాలో వచ్చి ఉండవచ్చు. ఉద్యోగికి ఆ ప్రాంతంలో చెల్లుబాటు అయ్యే కనీస వేతనం చెల్లించాలి.