హెచ్-1బీ వీసా ఆంక్షలు తాత్కాలికమే: సీఎం

అమెరికాలో హెచ్-1బీ వీసా నిబంధనలు కఠినతరం కావడంపై ఆంధ్రప్రదేశ్ ముఖ్యమంత్రి నారా చంద్రబాబు నాయుడు ఆసక్తికరమైన వ్యాఖ్యలు చేశారు. ఇది కేవలం తాత్కాలిక ఆటంకం మాత్రమేనని, భారతీయ ఐటీ నిపుణుల ఖర్చు, ప్రతిభ ప్రాధాన్యం అమెరికాను తిరిగి వారి వైపు ఆకర్షిస్తుందని ఆయన గట్టి ధీమా వ్యక్తం చేశారు.

ఖర్చు చాలా కీలకం... భారతీయ టెకీలు అత్యంత ఖర్చు-సౌకర్యవంతమైన సేవలు అందిస్తున్నారు. అమెరికా మన ప్రతిభపై ఆధారపడకుండా ఉండలేదు. ఇది ఖచ్చితంగా జరుగుతుంది," అని చంద్రబాబు నాయుడు పీటీఐ వార్తా సంస్థకు ఇచ్చిన ఇంటర్వ్యూలో స్పష్టం చేశారు. అంతేకాక అధునాతన నైపుణ్యం, తక్కువ వ్యయం ఈరెండు లక్షణాలే వారిని అంతర్జాతీయ మార్కెట్‌లో అత్యంత పోటీదారులుగా నిలిపాయని ఆయన వివరించారు.

లక్ష డాలర్ల అదనపు ఫీజు ప్రభావం

మాజీ అధ్యక్షుడు డొనాల్డ్ ట్రంప్ ఇటీవల హెచ్-1బీ వీసా వ్యవస్థలో ప్రధాన మార్పులు చేస్తూ, 2025 సెప్టెంబర్ 21 తర్వాత దాఖలు చేసే కొత్త వీసా దరఖాస్తులపై (యూఎస్ డి) 1 లక్ష అదనపు ఫీజు విధించారు. ఈ చర్య వీసా "దుర్వినియోగాన్ని తగ్గించడానికి" అని ట్రంప్ పేర్కొన్నప్పటికీ, అమెరికా అంతర్గతంగా అత్యంత నైపుణ్య అవసరాలు తీర్చడానికి విదేశీ ప్రతిభను తీసుకురావాల్సిందేనని తరువాత అంగీకరించారు.

దీనిపై సీఎం మాట్లాడుతూ భారతీయులపై ఏ ఆంక్షలు వచ్చినా వారి ఎదుగుదలను అడ్డుకోలేవని, ప్రస్తుత పరిస్థితి తాత్కాలికమని చెప్పారు. "కొంతమంది ఇబ్బందులు పడవచ్చు. కానీ ఈపరిస్థితినే మనకు అనుకూలంగా మార్చుకోవాలి అని ఆయన పిలుపునిచ్చారు. అధునాతన నైపుణ్యం, తక్కువ వ్యయం ఈ రెండు అంశాలు భారతీయ ఇంజనీర్లను అంతర్జాతీయ మార్కెట్‌లో అత్యంత పోటీదారులుగా నిలిపాయని ఆయన వివరించారు. అమెరికాకు వెళ్లే హెచ్-1బీ వీసాదారుల్లో ఆంధ్రప్రదేశ్, తెలంగాణ రాష్ట్రాలవారే అత్యధికమని తెలిపారు.

స్వదేశంలో సరికొత్త అవకాశాలు

కొత్త వీసా నిబంధనల కారణంగా ఉద్యోగాలు కోల్పోయే టెక్ నిపుణులకు స్వదేశంలో అవకాశాలు కల్పించేందుకు సిద్ధంగా ఉన్నామని ముఖ్యమంత్రి స్పష్టం చేశారు. కొత్త వీసా నిబంధనల ఉద్యోగాలు కోల్పోయి ఇబ్బందులు ఎదుర్కొనే టెకీలకు స్వదేశంలో భారీ అవకాశాలు ఉన్నాయని చంద్రబాబు నాయుడు అన్నారు. భారత్ ప్రస్తుతం ముందు తరాల సాంకేతికతలను వేగంగా స్వీకరిస్తోందని, స్థానిక 4జీ టెక్ స్టాక్, ఉపగ్రహాలు, డ్రోన్లు, ఆర్టిఫిషియల్ ఇంటెలిజెన్స్ (ఏ ఐ), క్వాంటమ్ కంప్యూటింగ్ వంటి రంగాల్లో సహజంగానే కొత్త ఉద్యోగాలు వస్తాయని చెప్పారు. ఉద్యోగాలు సృష్టించేందుకు ప్రభుత్వం చర్యలు తీసుకుంటుందని ఆయన పేర్కొన్నారు.

ప్రపంచవ్యాప్తంగా డిమాండ్

అమెరికా వీసా పరిశీలన కఠినతరం అవుతున్నప్పటికీ, కెనడా, ఆస్ట్రేలియా, యుకే, యూరప్, మధ్యప్రాచ్య దేశాలు సాఫ్ట్‌వేర్ డెవలప్‌మెంట్, ఏఐ, సైబర్ సెక్యూరిటీ, క్లౌడ్ రంగాల్లో నైపుణ్యం గల భారతీయ ఇంజనీర్లను చురుకుగా ఆహ్వానిస్తున్నాయి. అంతేకాకుండా అనేక గ్లోబల్ కంపెనీలు తమ నియామక వ్యూహాలను మారుస్తూ, భారత్‌లో రిమోట్ హైరింగ్ లేదా ఇంజనీరింగ్ సెంటర్ల విస్తరణకు మొగ్గు చూపుతున్నాయి. ఈ మార్పుల ద్వారా ఆంధ్రప్రదేశ్‌తో సహా మొత్తం భారతీయ టెకీలకు మరిన్ని అవకాశాలు రూపుదిద్దుకుంటున్నాయని విశ్లేషకులు చెబుతున్నారు. డిజిటల్ ట్రాన్స్‌ఫర్మేషన్ కొనసాగుతున్న నేపథ్యంలో భారతీయ టెకీ నిపుణుల గ్లోబల్ అవకాశాలు దృఢంగానే కొనసాగుతాయని పరిశ్రమ సంస్థలు ధీమా వ్యక్తం చేస్తున్నాయి.