హెచ్-1బీ వీసాలకు లాటరీ విధానం రద్దు: అమెరికా

అమెరికాలో ఉద్యోగం చేయాలనుకునే విదేశీయులకు అత్యంత కీలకమైన హెచ్-1బీ వర్క్ వీసా విధానంలో డొనాల్డ్ ట్రంప్ ప్రభుత్వం భారీ మార్పులను ప్రకటించింది. దశాబ్దాలుగా కొనసాగుతున్న 'లాటరీ' పద్ధతిని పక్కన పెట్టి, ఇకపై అధిక జీతం, అధిక నైపుణ్యం ఉన్నవారికే ప్రాధాన్యత ఇవ్వనున్నట్లు హోమ్ ల్యాండ్ సెక్యూరిటీ విభాగం స్పష్టం చేసింది.

‘లాటరీ’ పోయి.. 'వెయిటెడ్ సెలక్షన్' వచ్చే!

ఇప్పటివరకు వీసాల కోసం దరఖాస్తులు ఎక్కువగా వస్తే కంప్యూటర్ ద్వారా లాటరీ తీసేవారు. దీనివల్ల నైపుణ్యం తక్కువ ఉన్నా, అదృష్టం బాగుంటే వీసా వచ్చేది. కానీ కొత్త నిబంధన ప్రకారం.. అభ్యర్థికి ఇచ్చే జీతం ఎంత ఎక్కువగా ఉంటే, వారికి వీసా వచ్చే అవకాశం అంత ఎక్కువగా ఉంటుంది. దరఖాస్తులను వారి జీతాల స్థాయిని బట్టి (లెవల్ 1 నుండి లెవల్ 4 వరకు) వర్గీకరిస్తారు. అత్యధిక జీతం పొందే 'లెవల్ 4' నిపుణులకు మొదటి ప్రాధాన్యత దక్కుతుంది. ఈ కొత్త విధానం 2026 ఫిబ్రవరి 27 నుండి అమలులోకి రానుంది.

అదనపు భారాలు - కొత్త అవకాశాలు

ఈ మార్పులతో పాటు అధ్యక్షుడు ట్రంప్ మరికొన్ని కీలక నిర్ణయాలు కూడా తీసుకున్నారు. హెచ్-1బీ వీసాపై ఏడాదికి అదనంగా 1 లక్ష డాలర్ల (సుమారు రూ. 88 లక్షలు) భారీ రుసుమును విధించారు. అయితే ధనవంతుల కోసం 10 లక్షల డాలర్ల పెట్టుబడితో నేరుగా అమెరికా పౌరసత్వం పొందేలా “గోల్డ్ కార్డ్” వీసాను కూడా ప్రవేశపెట్టారు. ప్రస్తుతం అమెరికాలో అమెజాన్, టీసీఎస్, మైక్రోసాఫ్ట్, ఆపిల్, గూగుల్ వంటి సంస్థలు అత్యధికంగా ఈ వీసాలను పొందుతున్నాయి.

భారతీయులపై దీని ప్రభావం ఎలా ఉంటుంది?

ఈ కొత్త నిబంధనల వల్ల భారతీయ ఐటీ నిపుణులపై రెండు రకాల ప్రభావం పడనుంది. ఇప్పటికే అమెరికాలో ఉంటూ, సీనియర్ సాఫ్ట్‌వేర్ ఇంజనీర్లుగా మంచి జీతాలు తీసుకుంటున్న వారికి ఈ నిర్ణయం బాగా కలిసి వస్తుంది. వారి జీతాలు ఎక్కువగా ఉండటం వల్ల వీసా దక్కే అవకాశాలు పెరుగుతాయి. అయితే అమెరికాలో చదువు పూర్తి చేసి ఇప్పుడిప్పుడే కెరీర్ ప్రారంభించాలనుకునే విద్యార్థులకు (ఎంట్రీ లెవెల్) ఇది పెద్ద సవాలుగా మారనుంది. వారికి ప్రారంభంలో జీతాలు తక్కువగా ఉండటం వల్ల, కొత్త సెలక్షన్ పద్ధతిలో వీసా లభించడం కష్టమవుతుంది.

ఎందుకు ఈ మార్పులు?

తక్కువ జీతాలకే విదేశీయులను తెచ్చుకుంటూ అమెరికా కంపెనీలు లాటరీ విధానాన్ని దుర్వినియోగం చేస్తున్నాయని ప్రభుత్వం భావిస్తోంది. దీనివల్ల స్థానిక అమెరికన్ల ఉద్యోగ అవకాశాలు దెబ్బతింటున్నాయని, అందుకే కేవలం అత్యున్నత ప్రతిభ ఉన్నవారినే నియమించుకోవాలనే ఉద్దేశంతో ఈ కఠిన నిబంధనలు తెచ్చారు. ఏటా ఇచ్చే 65 వేల సాధారణ వీసాలు, 20 వేల మాస్టర్స్ డిగ్రీ వీసాల కోటాలో ఇకపై తీవ్రమైన పోటీ ఉండొచ్చని నిపుణులు చెబుతున్నారు.