హార్వర్డ్ వేదికగా ‘తెలంగాణ రైజింగ్ 2047’: విద్యార్థులతో సీఎం రేవంత్ రెడ్డి ఆత్మీయ భేటీ
అమెరికా పర్యటనలో భాగంగా హార్వర్డ్ విశ్వవిద్యాలయంలో తన అధికారిక కార్యక్రమాలను ముగిస్తూ, ముఖ్యమంత్రి రేవంత్ రెడ్డి చివరి రోజున విద్యార్థులు, పూర్వ విద్యార్థులతో సుదీర్ఘంగా సంభాషించారు. హార్వర్డ్తో పాటు ప్రతిష్టాత్మకమైన ఎంఐటీ, కొలంబియా యూనివర్సిటీలకు చెందిన ప్రతినిధి బృందాలు ముఖ్యమంత్రితో భేటీ అయ్యాయి.
ఈ ముఖాముఖిలో నాయకత్వ లక్షణాలు, విజయం సాధించే మార్గాలు, ఆర్థిక వృద్ధి, అభివృద్ధి నమూనాలు, స్థిరత్వం, పర్యావరణ సవాళ్లు, రైతులు, మహిళలు, యువతకు కేంద్రంగా ఉండే సంక్షేమ విధానాలు వంటి అనేక కీలక అంశాలపై విద్యార్థులు ముఖ్యమంత్రిని ప్రశ్నించారు. వాటికి స్పందించిన ముఖ్యమంత్రి తన పాలనా అనుభవాలను, సంస్కరణాత్మక నాయకత్వంలో ఎదురయ్యే సవాళ్లను, దీర్ఘకాలిక దృష్టికోణాన్ని విపులంగా వివరించారు.
ప్రత్యేకంగా తెలంగాణ భవిష్యత్ను నిర్దేశించే “తెలంగాణ రైజింగ్ 2047” విజన్ను ఆయన వివరించారు. ఈ దృక్కోణం ద్వారా సమగ్ర వృద్ధి, అన్ని వర్గాల భాగస్వామ్యం, సాధికారత ఆధారిత అభివృద్ధికి విస్తృత అవకాశాలు ఏర్పడతాయని పేర్కొన్నారు. తెలంగాణను, హైదరాబాద్ను ముందుండి దేశానికి ఆదర్శంగా నిలిపేలా రూపొందించిన ఈ విజన్, రాబోయే దశాబ్దాల్లో రాష్ట్రాన్ని గ్లోబల్ స్థాయిలో మరింత బలోపేతం చేస్తుందని ఆయన అన్నారు.
ఒక ఆసక్తికర సన్నివేశంలో, నాయకత్వం, విజన్ గురించి తమకు పాఠాలు చెప్పాలని విద్యార్థులు కోరగా, రేవంత్ రెడ్డి తనదైన శైలిలో చమత్కరించారు. ఇలాంటి పాఠాలు చెప్పే బాధ్యతను హార్వర్డ్ ప్రొఫెసర్లకే వదిలేయాలి. నేను ఇక్కడికి 'ఇంపోస్టర్ ప్రొఫెసర్' లాగా బోధించడానికి రాలేదు, అని వ్యాఖ్యానించారు. తాత్విక ప్రసంగాల కంటే, పరస్పర అనుభవాలను పంచుకోవడం సంభాషణల ద్వారా నేర్చుకోవడమే తనకు ఇష్టమని ఆయన స్పష్టం చేశారు.
తెలంగాణ బ్రాండ్ అంబాసిడర్లుగా ఉండండి
భారతదేశ భవిష్యత్తుపై ధీమా వ్యక్తం చేసిన ముఖ్యమంత్రి, అభివృద్ధి పథంలో హైదరాబాద్, తెలంగాణ దేశానికే రోల్ మోడల్గా నిలుస్తాయని పేర్కొన్నారు. విదేశాల్లో చదువుకుంటున్న విద్యార్థులు తమ మాతృభూమి అభివృద్ధి ప్రయాణంలో భాగస్వాములు కావాలని, 'తెలంగాణ రైజింగ్'కు ప్రపంచవ్యాప్త బ్రాండ్ అంబాసిడర్లుగా వ్యవహరించాలని పిలుపునిచ్చారు.
ముఖ్యమంత్రి పిలుపునకు స్పందించిన విద్యార్థులు, తమ నైపుణ్యాలను, విజ్ఞానాన్ని తెలంగాణ అభివృద్ధికి, గ్లోబల్ స్థాయిలో రాష్ట్ర ప్రతిష్టను పెంచడానికి వెచ్చిస్తామని స్వచ్ఛందంగా ముందుకు వచ్చారు. ఈ పర్యటనతో తెలంగాణ ప్రభుత్వం అంతర్జాతీయ విద్యావేత్తలు, యువ మేధావులతో బలమైన సంబంధాలను ఏర్పరచుకుంది.