హార్ముజ్‌లో అమెరికా, ఇజ్రాయెల్ నౌకలకు నో ఎంట్రీ

పశ్చిమాసియాలో యుద్ధ జ్వాలలు ఎగిసిపడుతున్న వేళ, ప్రపంచ చమురు రవాణాకు అత్యంత కీలకమైన 'హార్ముజ్ జలసంధి' వద్ద ఉద్రిక్తతలు తీవ్ర స్థాయికి చేరుకున్నాయి. ఈ వ్యూహాత్మక జలమార్గం అంతర్జాతీయ నౌకాయానానికి తెరిచే ఉందని చెబుతున్న ఇరాన్.. అమెరికా, ఇజ్రాయెల్ సంబంధిత నౌకలపై మాత్రం కఠిన నిషేధం విధించింది. తమ దేశ ప్రయోజనాల పరిరక్షణలో తమకు ఎటువంటి 'రెడ్ లైన్స్' (పరిమితులు) లేవని ఇరాన్ విదేశాంగ మంత్రి అబ్బాస్ అరాగ్చీ హెచ్చరించారు.

స్తంభించిన నౌకాయానం

హార్ముజ్ జలసంధిని తాము పూర్తిగా మూసివేయలేదని ఇరాన్ ప్రకటించినప్పటికీ, క్షేత్రస్థాయిలో పరిస్థితి భిన్నంగా ఉంది. పర్షియన్ గల్ఫ్, గల్ఫ్ ఆఫ్ ఒమన్ మధ్య ఉన్న ఈ ఇరుకైన సముద్ర మార్గంలో ప్రస్తుతం వందలాది నౌకలు చిక్కుకుపోయాయి. వీటిలో భారత్‌కు చెందిన అనేక నౌకలు కూడా ఉండటం గమనార్హం. భద్రతా కారణాల దృష్ట్యా కొన్ని షిప్పింగ్ కంపెనీలు స్వచ్ఛందంగా ఈ మార్గాన్ని నివారించడం వల్ల ఈ స్తంభన ఏర్పడిందని అరాగ్చీ వ్యాఖ్యానించారు. ఇరాన్ వైపు నుంచి అధికారిక దిగ్బంధనం లేకపోయినప్పటికీ, యుద్ధ భయంతో నౌకలు ముందుకు కదలలేని పరిస్థితి నెలకొంది.

ఆ రెండు దేశాలకే ఆంక్షలు

అమెరికన్ కేబుల్ న్యూస్ ఛానెల్‌కు ఇచ్చిన ఇంటర్వ్యూలో అరాగ్చీ మాట్లాడుతూ.. "హార్ముజ్ జలసంధి కేవలం అమెరికా, ఇజ్రాయెల్ నౌకలకు మాత్రమే మూసివేయబడింది" అని స్పష్టం చేశారు. మిగిలిన దేశాల నౌకలు యథావిధిగా ప్రయాణించవచ్చని ఆయన పేర్కొన్నారు. తమ ప్రజలను, ప్రయోజనాలను కాపాడుకునేందుకు ఏ స్థాయికైనా వెళ్తామని, ఇజ్రాయెల్ దాడులకు ప్రతీకారం తీర్చుకునే విషయంలో వెనకడుగు వేసే ప్రసక్తే లేదని ఆయన నొక్కి చెప్పారు.

ప్రపంచ ఇంధన మార్కెట్‌పై ప్రభావం

ప్రపంచ చమురు ఎగుమతుల్లో దాదాపు మూడో వంతు ఈ జలసంధి గుండానే సాగుతుంది. ఇక్కడ నెలకొన్న అనిశ్చితి వల్ల అంతర్జాతీయంగా చమురు ధరలు పెరిగే అవకాశం ఉందని ఆర్థిక విశ్లేషకులు ఆందోళన వ్యక్తం చేస్తున్నారు. ఒకవైపు ఇరాన్ ఆంక్షలు, మరోవైపు అమెరికా తన యుద్ధనౌకలను మోహరిస్తామన్న హెచ్చరికలతో ఈ ప్రాంతం ఇప్పుడు గ్లోబల్ పవర్ పాలిటిక్స్‌కు కేంద్రబిందువుగా మారింది.