హంగేరీ నూతన ప్రధానిగా పీటర్ మాగ్యార్!

హంగేరీ రాజకీయాల్లో చారిత్రాత్మక మార్పు చోటుచేసుకుంది. దాదాపు 16 ఏళ్ల పాటు తిరుగులేని నాయకుడిగా వెలుగొందిన ప్రధాని విక్టర్ ఓర్బన్ సుదీర్ఘ పాలనకు తెరపడింది. సోమవారం వెలువడిన పార్లమెంటు ఎన్నికల ఫలితాల్లో విపక్ష నేత పీటర్ మాగ్యార్ నేతృత్వంలోని ‘టిస్జా’ పార్టీ సంచలన విజయం నమోదు చేసింది. 97.35 శాతం ఓట్ల లెక్కింపు పూర్తయ్యేసరికి, 199 స్థానాలున్న పార్లమెంటులో మాగ్యార్ పార్టీ ఏకంగా 138 సీట్లను కైవసం చేసుకుని ప్రభంజనం సృష్టించింది. ఓర్బన్ నేతృత్వంలోని ఫిడెజ్ పార్టీ కేవలం 55 స్థానాలకే పరిమితమై, ఘోర పరాజయాన్ని మూటగట్టుకుంది. తన ఓటమిని అంగీకరించిన ఓర్బన్.. అధికార మార్పిడికి సిద్ధమయ్యారు.

ప్రజా తీర్పు స్పష్టం.. మార్పు దిశగా అడుగులు

ఈ ఎన్నికల్లో పీటర్ మాగ్యార్‌కు ప్రజలు బ్రహ్మరథం పట్టారు. టిస్జా పార్టీకి 53.6 శాతం ఓట్లు పోలవ్వగా, అధికార ఫిడెజ్ పార్టీ 37.8 శాతం ఓట్లతో సరిపెట్టుకుంది. బుడాపెస్ట్ నగరంలో వేలాది మంది మద్దతుదారుల మధ్య విజయ ప్రసంగం చేసిన మాగ్యార్.. హంగేరీని తిరిగి ఐరోపా దేశాల కూటమిలో కీలక భాగస్వామిగా మారుస్తానని ఆయన హామీ ఇచ్చారు. "హంగేరీ ప్రయోజనాలే పరమావధిగా మా ప్రభుత్వం పనిచేస్తుంది. మన దేశ భవిష్యత్తు ఐరోపా సమాఖ్యతోనే ముడిపడి ఉంది" అని ఆయన స్పష్టం చేశారు. బాధ్యతలు చేపట్టిన వెంటనే పోలాండ్, ఆస్ట్రియా దేశాల్లో పర్యటించి, అనంతరం బ్రసెల్స్‌కు వెళ్లి హంగేరీకి నిలిపివేసిన బిలియన్ల కొద్దీ యూరోల నిధులను విడుదల చేయిస్తానని ఆయన ధీమా వ్యక్తం చేశారు.

వ్యవస్థాగత ప్రక్షాళనకు పిలుపు

అధికారంలోకి రాగానే కీలక సంస్కరణలు చేపడతామని మాగ్యార్ ప్రకటించారు. గత ప్రభుత్వం నియమించిన కీలక అధికారులందరూ తక్షణమే తప్పుకోవాలని ఆయన డిమాండ్ చేశారు. ముఖ్యంగా న్యాయవ్యవస్థ, మీడియా నియంత్రణ సంస్థ, ఆడిట్ కార్యాలయం వంటి స్వయంప్రతిపత్తి గల సంస్థల అధిపతులు రాజకీయ పక్షపాతంతో వ్యవహరించారని ఆరోపిస్తూ, వారు స్వచ్ఛందంగా రాజీనామా చేయాలని కోరారు. అలాగే దేశంలో ప్రజాస్వామ్య విలువలను పునరుద్ధరించడానికి, అవినీతిని అరికట్టడానికి యూరోపియన్ పబ్లిక్ ప్రాసిక్యూటర్ కార్యాలయంలో హంగేరీ చేరుతుందని ఆయన వెల్లడించారు. గౌరవప్రదమైన అధికార మార్పిడి జరగాలని, ఈ లోపు దేశ ప్రయోజనాల దృష్ట్యా ఏవైనా కీలక నిర్ణయాలు తీసుకోవాల్సి వస్తే తనను సంప్రదించాలని ప్రస్తుత ప్రభుత్వానికి సూచించారు.

ఎవరీ పీటర్ మాగ్యార్?

పీటర్ మాగ్యార్ రాజకీయ ప్రస్థానం ఒక సంచలనం. వృత్తిరీత్యా న్యాయవాది, దౌత్యవేత్త అయిన ఆయన.. ఒకప్పుడు ఓర్బన్ ప్రభుత్వంలోనే కీలక పదవుల్లో పనిచేశారు. అయితే ప్రభుత్వంలో జరుగుతున్న అవినీతిని, తప్పులను ఎదిరిస్తూ బయటకు వచ్చి 'టిస్జా' పార్టీ ద్వారా ప్రజల్లోకి వెళ్లారు. ఓర్బన్ పాలనపై ఆయన చేసిన సాహసోపేతమైన పోరాటం, వ్యవస్థలో మార్పు రావాలన్న ఆయన తపన యువతను, మధ్యతరగతి ప్రజలను విశేషంగా ఆకట్టుకుంది. అతి తక్కువ కాలంలోనే ప్రజల మద్దతు కూడగట్టిన ఆయన, 16 ఏళ్లుగా సాగుతున్న ఓర్బన్ అధికారాన్ని దించి హంగేరీలో కొత్త మార్పునకు నాంది పలికారు.

హంగేరీ నూతన ప్రధానికి మోడీ శుభాకాంక్షలు

హంగేరీ ఎన్నికల్లో ఘనవిజయం సాధించిన పీటర్ మాగ్యార్‌కు భారత ప్రధాని నరేంద్ర మోడీ అభినందనలు తెలియజేశారు. భారత్, హంగేరీ దేశాల మధ్య ఎంతో కాలంగా మంచి స్నేహబంధం ఉందని, రెండు దేశాలు ఒకరినొకరు గౌరవించుకుంటాయని ఈ సందర్భంగా ఆయన గుర్తుచేశారు. రాబోయే రోజుల్లో పీటర్ మాగ్యార్‌తో కలిసి పని చేస్తూ, రెండు దేశాల మధ్య సంబంధాలను మరింత బలోపేతం చేయాలని ఆశిస్తున్నట్లు మోడీ పేర్కొన్నారు. అలాగే భారత్-ఐరోపా సమాఖ్య మధ్య భాగస్వామ్యాన్ని పెంచుతూ, ప్రజలందరి సంక్షేమం కోసం కృషి చేస్తామని ఆయన తన సందేశంలో వివరించారు.